(ពោធិ៍សាត់)៖ ប្រជាពលរដ្ឋនៅក្នុងស្រុកក្រគរ ខេត្តពោធិ៍សាត់ នៅថ្ងៃទី១៩ ខែមីនា ឆ្នាំ២០១៧ បានយកអាវុធធុន B40, 50 ជាប់គ្រាប់នៅនឹងកាណុង ១ដើម ដែលគាត់បានប្រទះឃើញពេលទៅកាប់ចំការ កាលពីថ្ងៃម្សិលមិញ នៅចំណុចថ្មបាក់​ស្ថិតក្នុងភូមិអន្សក្តាម ឃុំស្នាអន្សា ស្រុកក្រគរ មកប្រគល់ជូនកម្លាំង សមត្ថកិច្ចប៉ុស្តិ៍នគរបាលរដ្ឋបាលស្នាអន្សា ដើម្បីរក្សាទុក​បន្ត ក្រោយទទួលបានការផ្សព្វផ្សាយទូលំទូលាយ ពាក់ព័ន្ធផ្លូវច្បាប់ និងគោលនយោបាយ «ភូមិ-ឃុំ មានសុវត្ថិភាព»។

សេចក្តីរាយការណ៍ពីភ្នាក់ងារ Fresh News បានឲ្យដឹងថា លោក ម៉ា ម៉ុន អាយុ៥៩ឆ្នាំ និងលោក ស៊ឹង កីន ភេទប្រុស អាយុ​៣១ឆ្នាំ អ្នកទាំងពីររស់នៅភូមិអន្សក្តាម ឃុំស្នាអន្សា ស្រុកក្រគរ ខេត្តពោធិ៍សាត់ បានប្រគល់អាវុធធុនរ៉េ B40, 50 ជាប់​គ្រាប់នៅនឹងកាណុង១ដើម មកឲ្យសមត្ថកិច្ចដោយខ្លួនឯង។

ដោយឡែក កាលពីវេលាម៉ោង០១៖៣០នាទីរសៀលម្សិលមិញ លោក ថោង វន អាយុ៥៥ឆ្នាំ រស់នៅភូមិស្ទឹងថ្មី ឃុំប្រម៉ោយ ស្រុកវាលវែង ខេត្តពោធិ៍សាត់ ក៏បានប្រគល់អាវុធកែច្នៃ ដែលគាត់បានប្រទះឃើញពេលទៅកាប់ចម្ការ នៅចំណុចអូរដេការ មកប្រគល់ជូនកងកម្លាំងអធិការដ្ឋាននគរបាលស្រុកវាលវែង ដើម្បីរក្សាទុកផងដែរ។

គួរបញ្ជាក់ថា ការដែលប្រជាពលរដ្ឋប្រគល់អាវុធ២ដើម ខាងលើនេះ ធ្វើឡើងក្រោយពីពួកគាត់បានយល់ច្បាស់អំពីច្បាប់ និងចូលរួមអនុវត្តន៍គោលនយោបាយ «ភូមិ-ឃុំមានសុវត្ថិភាព» ព្រោះថាការរក្សាទុកអាវុធជាតិផ្ទុះ គឺជាអំពើខុសច្បាប់ ប្រសិនបើសមត្ថកិច្ចរកឃើញ និងត្រូវទទួលទោសតាមផ្លូវច្បាប់៕