(ប៉ៃលិន)៖ លោកស្រី យឹម ឆៃលីន ហ៊ុន ម៉ានី បានអញ្ជើញជួបសំណេះសំណាលជាមួយយុវជន និងជនពិការ ក្នុងខេត្តប៉ៃលិន ដើម្បីផ្តល់កម្លាំងចិត្ត និងលើកទឹកចិត្ត ដោយពិធីនេះមានការអញ្ជើញចូលរួមពីលោកស្រី បាន ស្រីមុំ អ្នកតំណាងរាស្រ្តមណ្ឌលប៉ៃលិន ជនពិការ សិស្សានុសិស្ស និងយុវជន ស.ស.យ.កខេត្តប៉ៃលិន យ៉ាងច្រើនកុះករ នារសៀលថ្ងៃទី១៧ ខែមីនា ឆ្នាំ២០១៧។
ក្នុងឱកាសនោះលោកស្រី បានសម្តែងក្តីរីករាយ និងបាននាំបណ្តាំផ្ញើសួរសុខទុក្ខដោយក្តីនឹក រលឹកបំផុតពីសំណាក់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ជូនចំពោះបងប្អូនប្រជាពលរដ្ឋទាំងអស់ក្នុងខេត្តប៉ៃលិន។
ក្នុងឱកាសនោះដែរលោកជំទាវ ក៏បានសម្តែងការសោកស្តាយចំពោះបងប្អូនជនពិការទាំងអស់ ដែលបានបាត់បង់នៅកាយសម្បរទា ដោយសារសង្រ្គាម បានធ្វើឲ្យប្រទេសជាតិអាក់ខានការអភិវឌ្ឍន៍ និងប្រជាពលរដ្ឋរងគ្រោះយ៉ាងធ្ងន់ធ្ងរ ទាំងអាយុជីវិត កាយសម្បរទា និងស្មារតីមិនអាចបំភ្លេចបាន។
លោកស្រីបន្តថា «ខ្ញុំសូមធ្វើការលើកទឹកចិត្ត និងផ្តល់កម្លាំងចិត្តដល់បងប្អូនជនពិការ និងយុវជនទាំងអស់ក្នុងខេត្តប៉ៃលិន និងសូមឲ្យប្អូនៗ យុវជនជំនាន់ក្រោយពិនិត្យមើលជាប្រវត្តិសាស្រ្ត ដើម្បីជៀសវាងការកកើតឡើងវិញនូវសង្គ្រាមជាប្រវត្តិសាស្រ្តនេះជាថ្មីម្តងទៀត ទន្ទឹមនឹងនោះ លោកស្រី ក៏សូមធ្វើការលើកទឹកចិត្តដល់សិស្សានុសិស្ស និងយុវជនទាំងអស់ ត្រូវខិតខំសិក្សារៀនសូត្រ ស្តាប់ដំបូន្មានឪពុកម្តាយ លោកគ្រូ អ្នកគ្រូ ជៀសវាងការប្រើប្រាស់គ្រឿងញៀន និងគ្រឿងឧបាយមុខផ្សេងៗ ដើម្បីក្លាយជាអ្នកបន្តវេន ប្រកបដោយចំណេះដឹងសុជីវធម៌ ចូលរួមការពារ ថែរក្សាសន្តិភាព និងការអភិវឌ្ឍន៍ប្រទេសជាតិ ឲ្យកាន់តែរីកចម្រើន ប្រកបដោយ សុខសន្តិភាព ស្ថេរភាព និងភាពសុខដុម»។
សូមបញ្ជាក់ថា តាមរយៈលោកស្រី យឹម ឆៃលីន បាននាំយករទេះពិការមួយគ្រឿង ដែលជាអំណោយរបស់សម្តេចតេជោ ហ៊ុន សែន នាយករដ្ឋមន្រ្តី មកផ្តល់ជូនប្អូនស្រី កែវ តូនី ជនពិការជើងទាំងសងខាង សម្រាប់ងាយស្រួលដល់ប្អូនស្រីបានធ្វើដំណើរទៅសាលារៀន ដែលបច្ចុប្បន្នប្អូនស្រី កំពង់សិក្សានៅថ្នាក់ទី១២ នៃវិទ្យាល័យ ហ៊ុន សែន ក្រុងទេពនិម្មិតប៉ៃលិនផងដែរ៕
