(កណ្ដាល)៖ នៅរសៀលថ្ងៃទី១៦ ខែមីនា ឆ្នាំ២០១៧នេះ មានពិធីប្រកាសផ្លាស់ប្ដូរ ព្រះរាជអាជ្ញាអមសាលាដំបូងខេត្តកណ្ដាល ក្រោមអាធិបតីភាព លោក ហ៊ី សោភា រដ្ឋលេខាធិការក្រសួងយុត្តិធម៌ និងមានការចូលរួមពី លោក ម៉ៅ ភិរុណ អភិបាលខេត្ត​កណ្ដាល ព្រមទាំងថ្នាក់ដឹកនាំ និងមន្រ្តីពាក់ព័ន្ធជាច្រើននាក់ទៀត។

យោងតាមការសម្រេច លោក លឹម សុគន្ថា ព្រះរាជអាជ្ញាសាលាដំបូងខេត្តកណ្ដាល ត្រូវបានតែងតាំងជាអគ្គព្រះ​រាជអាជ្ញា​រងសាលាឧទ្ធរណ៍ ជំនួសដោយ លោក លាវ ស្រេង ព្រះរាជអាជ្ញាខេត្តរតនគិរី។

សូមបញ្ជាក់ថា នៅក្នុងពេលកាន់តំណែង ជាព្រះរាជអាជ្ញាអមសាលាដំបូងខេត្តកណ្ដាល ក្នុងរយៈពេលប៉ុន្មានឆ្នាំមកនេះ គេសង្កេតឃើញថា លោក លឹម សុគន្ថា បានបង្កើតស្នាដៃជាច្រើន ក្នុងការជួយរកយុត្តិធម៌ជូនប្រជាពលរដ្ឋ បានយ៉ាងច្រើនព្រមទាំងធ្វើការចោទប្រកាន់ ជនល្មើសជាច្រើនសំណុំរឿងផងដែរ។

ប្រជាពលរដ្ឋដែលមានរឿងក្ដី ខ្លះបាននិយាយថា លោកព្រះរាជអាជ្ញាខេត្តកណ្ដាល បានជួយដោះស្រាយយ៉ាងពេញចិត្ត និងមានភាពយុត្តិធម៌ជូនពួកគាត់ ដែលធ្វើឡើងតាមនីតិវិធី តាមផ្លូវច្បាប់យ៉ាងត្រឹមត្រូវ៕