(ភ្នំពេញ)៖ កិច្ចប្រជុំពេញអង្គគណៈរដ្ឋមន្ត្រីប្រចាំសប្តាហ៍ ដែលគ្រោងប្រជុំ នៅព្រឹកថ្ងៃសុក្រ ទី១៧ ខែមីនា ឆ្នាំ២០១៧ ស្អែកនេះ ត្រូវបានលើកទៅពេលក្រោយវិញ។ នេះបើតាមការបញ្ជាក់របស់ លោក ផៃ ស៊ីផាន អ្នកនាំពាក្យរាជរដ្ឋាភិបាលកម្ពុជា នៅព្រឹកថ្ងៃទី១៦ ខែមីនានេះ។
ការសម្រេចផ្អាកនេះ បានធ្វើឡើងបន្ទាប់ពី សម្តេចវិបុលបញ្ញា សុខ អាន ឧបនាយករដ្ឋមន្រ្តី និងជារដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី ទទួលមរណភាព នៅវេលាម៉ោង០៦៖៣២នាទី ល្ងាច នាថ្ងៃទី១៥ ខែមីនា ឆ្នាំ២០១៧ ម្សិលមិញ នៅមន្ទីរពេទ្យទីក្រុងប៉េកាំង ប្រទេសចិន។
បើតាមគម្រោង កិច្ចប្រជុំគណៈរដ្ឋមន្រ្តីនៅសប្តាហ៍ននេះ មានរបៀបវារៈសំខាន់ៗ ក្នុងនោះរួមមាន៖ សេចក្ដីព្រាងច្បាប់ ស្តីពីឧបាស្រ័យពាណិជ្ជកម្ម, សេចក្តីព្រាងក្របខណ្ឌគោលនយោបាយជាតិគាំពារសង្គម ឆ្នាំ២០១៦-២០២៥ រួមនឹងបញ្ហាផ្សេងៗ៕
