(ភ្នំពេញ)៖ ខុសប្លែកពីអ្នកសិល្បៈដទៃ តារាចម្រៀងរាងតូចច្រឡឹង កញ្ញា រតនៈ ពិសី បានបង្ហាញពីទឹកចិត្តគួរឲ្យស្ញប់ស្ញែង ចំពោះកុមារកំព្រា និងក្មេងអនាថា នៅក្នុងថ្ងៃពិសេសរបស់ខ្លួន ដោយនាងបានយកថ្ងៃ​ខួបកំណើត​គម្រប់២៤ឆ្នាំ នៅថ្ងៃទី១៥ ខែមីនានេះ​ រៀបចំអាហារយ៉ាងឆ្ងាញ់ពិសារ ជូនដល់ក្មេងកំព្រា ដែលមកពីអង្គការមួយ នៅម្ដុំក្រុងតាខ្មៅ ចំនួន៣០​នាក់ ដើម្បីទទួលទាន​អាហារ និងភេសជ្ជៈ ក្នុងន័យបង្កើនភាពស្និទ្ធ និងផ្ដល់នូវភាពកក់​ក្ដៅដល់ពួកគេ​​ ខណៈដែលនាង ក៏បានទទូច​ស្នើ​ដល់អ្នកសិល្បៈ ផ្សេងទៀតគួរចេះធ្វើ​សកម្មភាព​មនុស្សធម៌ បែបនេះ ក្នុងថ្ងៃពិសេសរបស់ខ្លួន ដូចជារូបនាងដែរ។

តារាចម្រៀង កំពុងតែត្រៀមដំណើរ ចេញទៅច្រៀងនៅប្រទេសកាណាដា ក្នុងពេលឆាប់ៗខាងមុខនេះ កញ្ញា រតនៈ ពិសី បានថ្លែងប្រាប់ Khmertalking ​នៅក្នុងថ្ងៃខួបកំណើត​របស់នាងថា ជាការពិតក្មេងកំព្រា នៅក្នុងថ្ងៃធម្មតាៗ គឺមានសប្បុរសជន និងស្ថាប័នមួយចំនួន ជួយទំនុកបម្រុង ប៉ុន្តែនៅក្នុងថ្ងៃពិសេសរបស់នាង គឺនាងចង់ឲ្យមានវត្តមានពួកគេ មកចូលរួម ខណៈដែលអ្នកសិល្បៈដទៃទៀត នាងពុំធ្លាប់ដែលបានឃើញ មានការរៀបចំអាហារជូន ពួកគេដូច្នេះឡើយ។

ជាមួយ​នឹងការរៀបចំអាហារ ជូនដល់កុមារកំព្រា ដែលជាសកម្មភាពមនុស្សធម៌​មួយ គួរតែតារាសម្ដែង តារាចម្រៀង ក៏ដូចជាអ្នកសិល្បៈដទៃទៀត យកតម្រាប់តាមយើងនោះ តារាចម្រៀង រតនៈ ពិសី ក៏បានចែកជូនដល់កុមារទាំងអស់នោះ នូវសម្ភារៈសិក្សា មួយចំនួនដល់ពួកគេ ដើម្បីសម្រួលដល់ការសិក្សាផងដែរ។

រតនៈ ពិសី និយាយថា «អូ..! ព្រោះអីបង ក្មេងៗជាកុមារកំព្រាហ្នឹង តាមធម្មតាគឺមានគេជួយគាត់ តែខុសពីថ្ងៃធម្មតា គឺអត់មានអ្នកជួយ ដូចជាតារា ឬអ្នកសិល្បៈណា អញ្ជើញពួកគាត់មកថ្ងៃ Birthday បានទេ តែសម្រាប់ខ្ញុំ ខ្ញុំអត់ប្រកាន់ទេ ខ្ញុំញ៉ាំឆ្ងាញ់ គឺចង់ឲ្យគាត់ញ៉ាំឆ្ងាញ់​ដូចគ្នាដែរ អ៊ីចឹងខ្ញុំបានរៀបចំជូនគាត់ ចំនួន៣០ នាក់ ព្រមទាំងគ្រូៗ ចំនួន១០នាក់ទៀត។ ក្មេងទាំងនោះមកពីអង្គការ នៃក្ដីស្រឡាញ់ ដែលមានទីតាំងនៅក្នុងក្រុងតាខ្មៅ ខេត្តកណ្ដាល ហើយពួកគាត់អត់បាននៅដល់យប់ទេ ត្រឹមម៉ោង៧យប់ ពួកគេទៅវិញអស់ហើយ..!»។

រតនៈ ពិសី បន្ថែមទៀតថា ក្រោយកម្មវិធីខួបកំណើតនេះ នាងនឹងចាក់ចេញទៅកាន់ប្រទេស កាណាដា ដើម្បីសម្ដែង និងច្រៀងនៅទីនៅ ជូនដល់បងប្អូនខ្មែរ​បានទស្សនាកម្សាន្ត ហើយនាងចង់ធ្វើការងារ​មនុស្សធម៌ខ្លះ មុននឹងចាកចេញទៅ។ ពិសី ក៏បានសំណូមពរ និងស្នើសល់អ្នកសិល្បៈទាំងអស់ ដែលមានធនធាន ក្រៅពីមានកេរ្តិ៍ឈ្មោះ​ល្បីហើយនោះ គួរតែងាកមកធ្វើសកម្មភាពមនុស្សធម៌ ចែករំលែកក្ដីស្រឡាញ់ ចំពោះកុមារកំព្រា ចាស់ជរា ក្មេងអនាថា ជាដើម ដើម្បីបង្ហាញពីទឹកចិត្តសណ្ដោសប្រោសប្រណី ជួយចែលរំលែកធន់ធាន ក្នុងនាងជាខ្មែររស់នៅក្រោមដំបូលតែមួយ។

ទោះបីជាយ៉ាងណា តារាចម្រៀង រតនៈពិសី បានបន្ថែមទៀតថា ក្រៅពីអញ្ជើញក្មេងៗកំព្រាឲ្យចូលរួម ក្នុងកម្មវិធី ខួបកំណើតរបស់នាង ក្នុងនោះក៏មានការអញ្ជើញមិត្ត ជាសិល្បករ-សិល្បការិនីល្បីៗ ដែលជាអ្នករួមអាជីពជាច្រើននាក់ទៀត ដោយនៅក្នុងនោះ ក៏មានមិត្តជិតស្និទ្ធ តែមិនមែនជាអ្នកសិល្បៈ ចូលរួមផងដែរ៕