(ភ្នំពេញ)៖ ដោយមានការណែនាំបន្ថែមពីលោក ពេញ ធារម្យ​ ប្រធានសាខាកាំកុងត្រូលផែស្ងួតចុងទីភ្នំពេញ មន្ត្រីសាខាកាំកុងត្រូលផែស្ងួតចុងទីភ្នំពេញ សហការជាមួយជាមន្រ្តីមន្ទីរពាណិជ្ជកម្ម រាជធានីភ្នំពេញ និងអាជ្ញាធរដែនដី បានចុះត្រូតពិនិត្យទំនិញម្ហូបអាហារនៅផ្សារធំថ្មី​ ផ្សារកណ្តាល​ និងបណ្តាហាងស្តាម៉ាត ស្ថិតក្នុងខណ្ឌដូនពេញ ដើម្បីស្វែងរកនូវសារធាតុគីមីហាមឃាត់ ដែលអាជីវករមួយចំនួនតូចបានប្រើប្រាស់​ ដែលជាកង្វល់របស់បងប្អូនប្រជាពលរដ្ឋ​ ចំពោះសុវត្ថិភាពម្ហូបអារហារ​។

បន្ទាប់ពីបានត្រួតពិនិត្យមន្រ្តីជំនាញ បានដកយកគំរូចំនួន​១៦គំរូ បញ្ជូនមកមន្ទីរពិសោធន៍ អគ្គនាយកកាំកុងត្រូលកាលពីថ្ងៃទី១៤​ ខែមីនា​ ឆ្នាំ២០១៧​។​

ក្នុងប្រតិបត្តិការនេះដែរ​ មន្ត្រីកាំកុងត្រូលបានធ្វើការណែនាំអាជីវករឲ្យដាក់តាំងលក់ផលិតឲ្យត្រូវតាមលក្ខណបច្ចេកទេស​ ដោយញែកចេញពីគ្នា រវាងគ្រឿងប្រើប្រាស់ ដែលមានផ្ទុកសារធាតុ​ពុល និងម្ហូបអារហារ​ ហាមការដាក់តាំងផលិតផលភេសជ្ជៈ ត្រូវកំដៅថ្ងៃ​ និងការដាក់លក់ផលិតផលហួសកាលបរិច្ឆេទជាដើម។​

ទន្ទឹមគ្នានេះ មន្ត្រីកាំកុងត្រូល ក៏បានស្រាវជ្រាវរកវត្តមានអារហារបំប៉នឈ្មោះ​ «P C ORGANIC» ដែលធ្វើឲ្យប៉ះពាល់ដល់សុខភាពទារក និងកុមារតូចៗ តែជាលទ្ធផលពុំបានជួបប្រទះឡើយ៕​