(ភ្នំពេញ)៖​​ ឧបនាយករដ្ឋមន្រ្តី​ កែ​ គឹមយ៉ាន​ និងជាប្រធានអាជ្ញាធរជាតិ ប្រយុទ្ធប្រឆាំងគ្រឿងញៀន នៅថ្ងៃទី១៤​ ខែមីនា​ ឆ្នាំ២០១៧នេះ បានលើកយកបញ្ហាគ្រឿងញៀននៅកម្ពុជា ទៅពិភាក្សាជាមួយភាគីចិន ដោយក្នុងនោះ លោកបានស្នើសុំជាជំនួយឧបករណ៍ត្រួតពិនិត្យគ្រឿងញៀន នៅតាមច្រកទ្វារព្រំដែនអន្តរជាតិ តាមផ្លូវគោក ផ្លូវអាកាស ព្រមទាំងសម្ភារបរិក្ខាមួយចំនួនទៀត។

ជំនួបពិភាក្សានេះ ធ្វើឡើងជាមួយ​ប្រតិភូ នៃក្រសួងសន្តិសុខសាធារណៈ នៃសាធារណរដ្ឋប្រជាមានិតចិន ​ដឹកនាំដោយ លោក​ Zheng Bai Gang អគ្គនាយក នៃអគ្គនាយកដ្ឋានទំនាក់ទំនងកិច្ចការអន្តរជាតិ នៃក្រសួងសន្តិសុខសាធារណៈ នៅទីស្ដីការគណៈរដ្ឋមន្រ្តី។

សម្ភារបរិក្ខាបច្ចេកទេស ដែលនាយឧត្តមសេនីយ៍​ កែ គឹមយ៉ាន បានស្នើទៅភាគីចិននោះ រួមមាន៖ ឧបករណ៍បចេ្ចកទេសត្រួតពិនិត្យ គ្រឿងញៀន តាមច្រកទ្វារ​អន្តរជាតិ​ តាមផ្លូវគោក​ និងផ្លូវអាកាស​ នៅ​រាជធានីភ្នំពេញ ខេត្តសៀមរាប​ និងខេត្តព្រះសីហនុ, សម្ភារតេស្តត្រួតពិនិត្យរកសារធាតុញៀន, ការព្យាបាលមុខសញ្ញានៅក្នុងពន្ធនាគារ។

ក្រៅពីនេះ លោកបានស្នើសុំថ្នាំព្យាបាល​ ឧបករណ៍ប្រើប្រាស់សុខាភិបាលបរិក្ខាវិជ្ជសាស្រ្ត ​និងមធ្យោបាយសម្រាប់អ្នកញៀន គ្រឿងញៀន​ តាមសហគមន៍ ​ដោយប្រឹក្សាជាមួយមូលដ្ឋានសុខាភិបាលចំនួន ១៧៧កន្លែង​ មណ្ឌលសុខភាពរដ្ឋ​-ឯកជន​ចំនួន ១១កន្លែង​ និងការសង់មណ្ឌលសម្រាប់អ្នកញៀនកម្រិតធ្ងន់ ស្នាក់នៅយូរ ​(មន្ទីរពេទ្យ​ សាលារៀនវិជ្ជាជីវៈ និងជួយរកការងារឲ្យធ្វើ) ព្រមជាមួយសម្ភារបណ្តុះបណ្តាល​ដល់ មន្រ្តីអនុវត្តច្បាប់ និងពង្រឹងកិច្ចសហការក្របខណ្ឌទន្លេមេគង្គ ផងដែរ។

នាយឧត្តមសេនីយ៍​ កែ​ គឹមយ៉ាន​ បានប្រាប់មន្ត្រីក្រសួងសន្តិសុខសាធារណៈថា​ កម្ពុជាមានសមត្ថភាពបង្រ្កាបបទល្មើស គ្រឿងញៀន​ និងចាប់អ្នកជួញដូរគ្រឿងញៀនឆ្លងដែន​ ដូចជានៅតាមព្រលានយន្តហោះជាដើម​ ដែលប្រទេសមួយចំនួន មិនមានសមត្ថភាពចាប់បាននោះទេ​ ប៉ុន្តែទោះបីយ៉ាងណា កម្ពុជាមិនទាន់មានសម្ភារៈគ្រប់គ្រាន់
ដើម្បីត្រួតពិនិត្យឲ្យបានត្រឹមត្រូវ​នៅឡើយទេ។

​នាយឧត្តមសេនីយ៍ កែ គឹមយ៉ាន បានបន្តថា ឈ្មួញគ្រឿងញៀនភាគច្រើន មកពីបណ្តាប្រទេសនៅជុំវិញកម្ពុជា ដូចជា ឡាវ ថៃ វៀតណាម មិនតែប៉ុណ្ណោះ មានឈ្មួញគ្រឿងញៀនមួយចំនួនធំ មកពីអាមេរិចខាងត្បួង អាព្រិក មានឈ្មួញគ្រឿងញៀនខ្លះ បានលេបថ្នាំញៀនចូលក្នុងពោះក៏មាន តាមរយៈបញ្ញើតាមយន្តហោះ និងប្រៃសណីយ៍។

សូមជម្រាបថា រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ជាប្រមុខ បានដាក់ចេញផែនការ ស្តីពីយុទ្ធនាការ ប្រយុទ្ធប្រឆាំង គ្រឿងញៀន​ខុសច្បាប់លើកទី១ រយៈពេល៦ខែ (ចាប់ពីថ្ងៃទី០១ ខែមករា ដល់ថ្ងៃទី៣០ ខែមិថុនា ឆ្នាំ២០១៧) ដើម្បីប្រយុទ្ធប្រឆាំងគ្រឿងញៀននៅកម្ពុជា ឲ្យកាន់តែខ្លាំងក្លា និងទទួល​បាន​លទ្ធផល​ល្អឡើងថែមទៀត។

យុទ្ធនាការប្រយុទ្ធប្រឆាំងគ្រឿងញៀននេះ ដឹកនាំដោយសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួង មហាផ្ទៃ ជាប្រធាន និងឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំង គ្រឿងញៀនជាអនុប្រធាន។

ដោយឡែក ក្នុងខែកុម្ភៈ ឆ្នាំ២០១៧ កម្លាំងសមត្ថកិច្ចបង្ក្រាបបទល្មើសគ្រឿងញៀន បានចំនួន ៩២១ករណី ថយ២២៣ករណី ស្មើនឹង១៩.៤៩% (ធៀបនឹងខែមករា ឆ្នាំ២០១៧) ឃាត់ខ្លួនជនសង្ស័យ ២,០៥៣នាក់ ដកយកសារធាតុញៀនសរុប ៧,២៥១.២៨ក្រាម និងកញ្ឆា ៩៧,៤៧៨ដើមទៀត៕