(សៀមរាប)៖ លោក ឃឹម ប៊ុនសុង អភិបាលខេត្តសៀមរាប នៅរសៀលថ្ងៃទី១៣ ខែមីនា ឆ្នាំ២០១៧នេះ បានស្នើតាមរយៈលោក ហ្វីលីព កូរ៉ាដ ប្រធានសភាសហព័ន្ធវ៉ាល់ឡូនីប្រ៊ូហ្សែល នៃប្រទេសប៊ែលហ្សិក ជំរុញឲ្យប្រជាជនអឺរ៉ុបខាងលិចមួយនេះ មកវិនិយោគ និងទស្សនាកម្ពុជាឲ្យតែច្រើន ថែមទៀត ព្រោះកម្ពុជាអនុគ្រោះដល់វិនិយោគិនបរទេស មានតំបន់ទេសចរណ៍ច្រើនសម្បូរបែប។

ការស្នើសុំនេះ ធ្វើឡើងនាឱកាស លោកអភិបាលខេត្ត រៀបចំលាងសាយភោជន៍ ទទួលស្វាគមន៍គណៈប្រតិភូជាន់ខ្ពស់ នៃសភាសហព័ន្ធវ៉ាល់ឡូនីប្រ៊ូហ្សែល ដែលដឹកនាំដោយលោក ហ្វីលីព កូរ៉ាដ ក្នុងដំណើរទស្សនកិច្ចផ្លូវរដ្ឋ នៅលើទឹកដីប្រវត្តិសាស្រ្តខេត្តសៀមរាប នៅសណ្ឋាគារបុរីអង្គរ។

លោក ឃឹម ប៊ុនសុង បានបញ្ជាក់ថា ក្នុងដំណើរបំពេញទស្សនកិច្ចផ្លូវរដ្ឋ នៅកម្ពុជា សំខាន់ខេត្តសៀមរាប ក្នុងគោលបំណងពង្រឹង និងពង្រីកនៃកិច្ចសហប្រតិបត្តការជាមិត្តភាព រវាងប្រទេសទាំងពីរ ឲ្យកាន់តែប្រសើរឡើងថែមទៀត។ នេះគឺជាសខីភាពមួយ ដែលបានឆ្លុះបញ្ចាំងឲ្យឃើញចំណង់មិត្តភាព សាមគ្គីភាព កិច្ចសហប្រតិបត្តិការយ៉ាងស្អិតរមួត និងល្អផូរផង់ រវាងរដ្ឋសភា រាជរដ្ឋាភិបាល និងប្រជាជននៃប្រទេសទាំងពីរ ដែលកំពុងមានភាពស្និទ្ធស្នាលទ្វេឡើង។

ប្រមុខខេត្តសៀមរាបរូបនេះ បានសំណូមពរដល់គណៈប្រតិភូប៊ែលហ្សិក «ជួយជំរុញដល់អ្នកវិនិយោគ ក៏ដូចប្រជាជនរបស់ខ្លួន ឲ្យចូលមកវិនិយោគ និងមកទស្សនាកម្ពុជា ពិសេសខេត្តសៀមរាបនេះផ្ទាល់តែម្ដង»។

លោក ឃឹម ប៊ុនសុង ក៏បានលើកឡើងពីស្ថានភាពភូមិសាស្រ្ត សេដ្ឋកិច្ច សន្តិសុខ និងជីវភាពរស់នៅរបស់ប្រជាជន ខេត្តសៀមរាប ដែលពឹងផ្អែកលើសេដ្ឋកិច្ចស្នូលពីរ គឺវិស័យទេសចរណ៍ និងកសិកម្ម។ ម្យ៉ាងទៀត ដោយខេត្តសៀមរាប ជាតំបន់គោលដៅទេសចរណ៍សម្រាប់ពិភពលោក ចូលមកទស្សនាកម្សាន្ត នៅតាមរមនីយដ្ឋានវប្បធម៌ និងធម្មជាតិ ដែលសម្បូរទៅដោយប្រាង្គប្រាសាទ និងរមនីយដ្ឋានធម្មជាតិ មានភ្នំគូលែន និងបឹងទន្លេសាប។

លោកអភិបាលខេត្ត ក៏បានសម្ដែងនូវអំណរគុណ ចំពោះរាជរដ្ឋាភិបាលប៊ែលហ្សិក ដែលជានិច្ចកាល តែងតែផ្ដល់នៅការគាំទ្រលើវិស័យអប់រំសិក្សាធិការ និងសាលាក្កីខ្មែរក្រហម ព្រមទាំងគាំទ្រដល់មជ្ឈមណ្ឌលកំចាត់មីនកម្ពុជា (CMAC) ក៏ដូចផ្ដល់ជូនដល់ខេត្តសៀមរាបផងដែរ។

ឆ្លើយតបនឹងការលើកឡើងខាងលើ លោក ហ្វីលីព កូរ៉ាដ បានធ្វើការកោតសើរពីកិច្ចអភិវឌ្ឍរបស់ខេត្តសៀមរាប សំខាន់លើហេដ្ឋារចនាសម្ព័ន្ធ វិស័យទេសចរណ៍ និងសោភ័ណភាពក្រុងសៀមរាប។

លោក ហ្វីលីព ក៏បានសម្ដែងនូវភាពស្ញប់ស្ញែង អំពីស្នាដៃសំណង់ស្ថាបត្យកម្មរបស់បុព្វបុរសខ្មែរ ដែលបានបន្សល់ទុកជាកេរ្តិ៍មរតក មានតម្លៃដ៏មហាសាល ជាអច្ឆរិយៈមួយគ្មានពីរលើលោក ហើយបាននឹងកំពុងទាក់ទាញអារម្មណ៍របស់ភ្ញៀវទេសចរណ៍ នៅលើពិភពលោក ចូលមកទស្សនាកម្សាន្ត និងជាប្រភពចំណូលមិនចេះរីងសស្ងួតរបស់ជាតិកម្ពុជា។

លោក ហ្វីលីព កូរ៉ាដ បានបញ្ជាក់ថា ក្នុងដំណើរទស្សនកិច្ចនៅលើទឹកដីប្រវត្តសាស្ត្រ នៃកម្ពុជា ជាការពង្រឹង និងពង្រីកនូវចំណង់មិត្តភាពនៃប្រទេសទាំងពីរ ឲ្យកាន់តែមានភាពរឹងមាំថែមទៀត៕