(កំពង់ឆ្នាំង)៖ លោក ហេង រតនា អគ្គនាយកមជ្ឈមណ្ឌលកម្ចាត់មីនកម្ពុជា (CMAC) បានបញ្ជាក់ប្រាប់អង្គភាពព័ត៌មាន Fresh News ថា នៅព្រឹកថ្ងៃទី១៣​ ខែមិនា​ ឆ្នាំ​២០១៧នេះ​ កំលាំងជំនាញបោសសំអាតសំណល់ជាតិផ្ទុះ ក្រោមទឹករ​បស់អង្គភាព CMAC​ កំពុងប្រតិបតិ្តការយកគ្រាប់បែក ទំលាក់ពីយន្តហោះអាមេរិកកាំង នៅបឹងទន្លេសាប​ (នៅក្បែរភូមិក្នុងបឹងទន្លេសាប)​ភូមិបឹងព្រលូង​ ឃុំសំរោង​សែន ស្រុកកំពង់លែង​ នៃខេត្តកំពង់ឆ្នាំង​មានចំនួន២ទីតាំង​ អាចមានចំនួន២គ្រាប់​ ហើយអាចជាប្រភេទ MK2។

លោក ហេង រតនា បានបញ្ជាក់ថា ប្រតិបត្តិការចុះដោះគ្រាប់បែកដ៏គ្រោះថ្នាក់ ទម្លាក់ពីលើយន្តហោះរបស់អាមេរិនេះ ធ្វើឡើងបន្ទាប់ពីមានការផ្តល់ព័ត៌មានពីប្រជានេសាទ។

ជាមួយគ្នានេះ លោកបានអំពាវនាវដល់ ប្រជានេសាទទាំងឡាយ ក្នុងភូមិសាស្ត្រ​នេះ សូមមេត្តាជួយសហការជាមួយ កំលាំងនគរបាលមូលដ្ឋាន និងកំលាំង CMAC​ ដែលកំពុងប្រតិបតិ្តការនៅវេលានេះ។

សូមជម្រាបថា កម្លាំងមន្ត្រីជំនាញ CMAC បានរកឃើញ និងដោះគ្រាប់បែកទម្លាក់ពីយន្តហោះអាមេរិក ជាញឹកញាប់ ដែលគ្រាប់បែកទាំងនោះបាន គំរាមកំហែងដល់សុខសុវត្ថិភាព ដល់ប្រជាពលរដ្ឋខ្មែរ។

អាមេរិកបានទម្លាក់គ្រាប់បែកលើទឹកដីកម្ពុជា ចាប់ពីដើមឆ្នាំ១៩៦៣ ដល់ដើមឆ្នាំ១៩៧៥ ហើយទិន្នន័យទម្លាក់គ្រាប់ទាំងនោះ ត្រូវបានឯកភាពនៅឆ្នាំ២០០០ ​ដោយប្រធានាធិបតីជំនាន់ក្រោយ គឺលោក Bill Clinton ដែលបានបញ្ចេញឯកសារចំហរថា អាមេរិកទម្លាក់គ្រាប់បែកនៅកម្ពុជាអស់ ២.៨លានតោន និងគ្រាប់បែកគីមីផងដែរ ក្រោមលេសថា​ តាមកម្ទេចពួកយៀកកុង​ ប៉ុន្តែស្លាប់តែប្រជាពលរដ្ឋខែ្មរ អស់ជាងកន្លះលាននាក់ និងកម្ទេចតែភូមិឋាន ផ្ទះសម្បែងខែ្មរ អស់រាប់ម៉ឺនកន្លែងទៀត៕