(ភ្នំពេញ)៖ តុលាការកំពូល នៅព្រឹកថ្ងៃទី១៣ ខែមីនា ឆ្នាំ២០១៧នេះ បានប្រកាសសាលដីកា មិនអនុញ្ញាតឱ្យ មន្រ្តីគ.ជ.ប និង អាដហុក ទាំង៥នាក់ នៅក្រៅឃុំនោះទេ។
មន្រ្តីអាដហុក និង គ.ជ.ប ទាំងនោះរួមមាន ១៖លោក នី សុខា ២៖លោក ណៃ វង់ដា ៣៖លោក យី សុខសាន្ត
៤៖លោកស្រី លឹម មុន្នី និងមន្រ្តី គ.ជ.ប ០១នាក់ និង ៥៖លោក នី ចរិយា ដែលត្រូវបានតុលាការឃុំខ្លួន ពាក់ព័ន្ធនឹងសំណុំរឿងសូកប៉ាន់សាក្សី និងសមគំនិតសូកប៉ាន់សាក្សីក្នុងរឿងសញ្ចារកម្ម កាលពីឆ្នាំមុន។
សូមជំរាបថា មន្ត្រីអាដហុក៤រូប និងមន្ត្រីគជប ត្រូវបានតុលាការចោទពីបទសូកប៉ាន់សាក្សី និងសមគំនិតក្នុងអំពើសូកប៉ាន់ដល់ អ្នកនាង ខុម ចាន់តារ៉ាទី ហៅស្រីមុំ ដើម្បីកុំឲ្យអ្នកនាងនិយាយការពិតប្រាប់សមត្ថកិច្ចចំពោះរឿងអាស្រូវផ្លូវភេទរបស់ លោក កឹម សុខា។
ក្រុមជនត្រូវចោទទាំង៥នាក់ត្រូវបាន លោក ធាម ច័ន្ទពិសិដ្ឋ ចៅក្រមស៊ើបសួរសាលាដំបូងរាជធានីភ្នំពេញ សម្រេចកាលពីល្ងាចថ្ងៃទី០២ ខែឧសភា ឆ្នាំ២០១៦ ឃុំខ្លួនដាក់ពន្ធនាគារ ដើម្បីរង់ចាំការស៊ើបអង្កេតបន្តទៀត៕
