(ភ្នំពេញ)៖ លោក ឡុង ឌីម៉ង់ ឯកអគ្គរាជទូតកម្ពុជាប្រចាំកូរ៉េខាងត្បូង បានដឹកនាំក្រុមការងារ ប្រារព្ធមីទ្ទិញ អបអរសាទរទិវាសិទ្ធិនារីអន្ដរជាតិ៨ មីនា ជាលើកដំបូង នៅទីក្រុងថេចុន ខេត្តឆុនឆង ជាមួយនឹងបងប្អូនស្រ្តីខ្មែរមានស្វាមីកូរ៉េ ចូលរួមប្រមាណ១៥០នាក់។
នៅក្នុងមីទ្ទិញអបអរសាទរទិវាសិទ្ធិនារីអន្ដរជាតិ៨មីនា ពោរពេញដោយ «ស្នាមញញឹម ក្ដីសង្ឃឹម និងសំណើចក្អាកក្អាយ» បានសាយភាយ និងលាន់រំពង ពេញសាលប្រារពមីទ្ទិញអបអរសាទរខួបអនុស្សាវរីយ៍លើកទី ១០៦ ទិវាសិទ្ធិនារីអន្ដរជាតិ៨ មីនា ក្រោមប្រធានបទ «ស្រ្តីដើម្បីសុខសន្ដិភាព និងវឌ្ឍនភាព»។
លោក ឡុង ឌីម៉ង់ ឯកអគ្គរាជទូតកម្ពុជា បានលើកឡើងដែរថា «មីទ្ទិញដែលយើងបានរៀបចំលើកដំបូងនាពេលនេះ នឹងក្លាយជាកិច្ចប្រជុំធំមួយប្រចាំឆ្នាំ និងជាទៀងទាត់ ដើម្បីផ្ដល់ឱកាសសម្រាប់ការផ្លាស់ប្ដូរគំនិត ការពិគ្រោះយោបល់រវាង បងប្អូនជាស្រ្តីខ្មែរដែលកំពុងរស់នៅ ធ្វើការ និងសិក្សា នៅសាធារណរដ្ឋកូរ៉េ ក្នុងចេតនាពង្រឹង និងចងក្រងបណ្ដាញស្រ្តីខ្មែរ រួមគ្នាជួយដោះស្រាយបញ្ហាប្រឈមសម្ពាធ និងពង្រឹងសាមគ្គីភាព របស់ស្រ្តីខ្មែរយើង ក្នុងស្មារតីខ្មែរតែមួយ អនាគតតែមួយ»។
ជាមួយគ្នានោះដែរ ស្រ្តីខ្មែរម្នាក់ ដែលបានរៀបអាពាហ៍ពិពាហ៍ជាមួយស្វាមីកូរ៉េ បានលើកឡើងថា «គាត់បានមករស់នៅលើទឹកដី នៃសាធារណរដ្ឋកូរ៉េនេះ រយៈពេល ជាង១០ឆ្នាំមកហើយ នេះជាលើកទីមួយហើយដែរគាត់បានចូលរួម និងបានឃើញ ផ្ទាល់ភ្នែក នៅកម្មវិធីអបអរសាទរសិទ្ធិនារី ដែលរៀបចំ ឡើងដោយក្រុមការងារស្ថានទូត»។ គាត់បានសំណូមពរ ដល់ស្ថានទូតសូមបន្ដយកចិត្តទុកដាក់ និងរៀបចំកម្មវិធីនេះបន្ដទៀត ឱ្យបានរៀងរាល់ឆ្នាំ៕
