(ពោធិ៍សាត់)៖ សាខាកាំកុងត្រូលខេត្តពោធិ៍សាត់ សហការជាមួយមន្ទីរពាណិជ្ជកម្ម នៅព្រឹកថ្ងៃទី៧ ខែមីនា ឆ្នាំ២០១៧នេះ បានចុះត្រួតពិនិត្យគុណភាព​ សុវត្ថិភាព​ផលិតផលម្ហូបអាហារ ​នៅផ្សារស្វាយដូនកែវ ក្នុងភូមិស្វាយដូនកែវ ឃុំស្វាយដូនកែវ ស្រុកបាកាន និងផ្សារអ៊ីផា (ផ្សារតូចបាកាន) ភូមិកោះស្វាយ ឃុំត្រពាំងជង ស្រុកបាកាន ព្រមទាំងការស្រាវជ្រាវ​នូវផលិតផល​អាហារសំរាប់ទារក និងកុមារតូច​ PC Organic Brand ដែលមានសក្តានុពលអំណោយផល ដល់ការលូតលាស់បាក់តេរី Clostridum Botulimum ក្នុងផលិតផលនៅតាមផ្ទះលក់អាហារបំប៉នទារក និងកុមារមួយចំនួន ក្នុងក្រុងពោធិ៍សាត់ ខេត្តពោធិ៍​សាត់។

មន្រ្តីសាខាកាំកុងត្រូលខេត្តពោធិ៍សាត់បានឲ្យដឹងថា ជាលទ្ធផលក្រុមការងារ បានធ្វើតេស្តបឋម​លើផលិតផលម្ហូប​អាហា​រ​មួយចំនួន(ពុំមាន​រកឃើញសារធាតុគីមីហាមឃាត់ឡើយ) និងបានស្រាវជ្រាវផលិតផលអាហារសំរាប់ទារក និងកុមារតូច​ PC Organic Brand ដែលមានសក្តានុពលអំណោយផលដល់ការលូតលាស់បាក់តេរី Clostridum Botulimum ក្នុងផលិតផល តែមិនមានចរាចរ​នៅផ្សារខាងលើនោះទេ។

ជាមួយគ្នានេះ ក្រុមការងារបានរឹបអូសផលិតផលខូចគុណភាព និងហួសកាលបច្ឆេទប្រើប្រាស់ចំនួនផងដែរ រួចយកមករក្សាទុក​ នៅសាខាកាំកុងត្រូលខេត្តដើម្បីកំទេចចោលតាមនីតិវិធីច្បាប់។

ដោយឡែកនៅថ្ងៃទី៦ ខែមីនា ឆ្នាំ២០១៧ សាខាកាំកុងត្រូលខេត្តពោធិ៍សាត់ សហការជាមួយមន្ទីរពាណិជ្ជកម្មខេត្ត បានចុះ​ត្រួតពិនិត្យ គុណភាពសុវត្ថិភាព ផលិតផលម្ហូបអាហារ បន្លែ ផ្លែឈើ ដែលតាំងលក់នៅស្តង់ពិព័រណ៍ ផ្សព្វផ្សាយផលិតផល កម្ពុជា-​អន្តរជាតិ នៅក្រុងពោធិ៍សាត់ ខេត្តពោធិ៍សាត់ ជាលទ្ធផល ពុំឃើញមានសារធាតុគីមីហាម​ឃាត់ណាមួយ​នៅលើផលិត​ផលនោះទេ៕