(កំពង់ស្ពឺ)៖ ប្រជាពលរដ្ឋចំនួន២៩៩៦នាក់ ស្រុកសំរោងទង ខេត្តកំពង់ស្ពឺ បានសម្ដែងការរំភើបរីករាយ និងថ្លែងអំណរគុណ ចំពោះលោក ហ៊ុន ម៉ានី អ្នកតំណាងរាស្ត្រមណ្ឌលកំពង់ស្ពឺ ដែលបានចាត់ឲ្យក្រុមការងារ គ្រូពេទ្យស្ម័គ្រចិត្ត ចុះជួយពិនិត្យ និងព្យាបាលជំងឺ ជូនដល់ប្រជាពលរដ្ឋ ដោយឥតគិតថ្លៃ លើសពីនេះប្រជាពលរដ្ឋ ក៏បានស្នើសុំឲ្យក្រុមគ្រូពេទ្យ ចុះមកពិនិត្យជំងឺជូនពួកគាត់ ឲ្យបានញឹកញាប់។
នៅថ្ងៃទី ០៥ ខែមីនា ឆ្នាំ២០១៧ ក្រុមការងារគ្រូពេទ្យស្ម័គ្រចិត្ត របស់លោក ហ៊ុន ម៉ានី ប្រមាណ១៧២នាក់ ដឹកនាំដោយលោក លេង ផាលី ប្រធានក្រុមការងារគ្រូពេទ្យស្ម័គ្រចិត្ត លោក ហ៊ុន ម៉ានី បាននាំអំណោយថ្នាំពេទ្យ ចុះទៅពិនិត្យ ព្យាបាលជំងឺជូន ប្រជាពលរដ្ឋ ស្រុក សំរោងទង ខេត្តកំពង់ស្ពឺ ដោយឥតគិតថ្លៃ ចំនួន២៩៩៦នាក់ ក្នុងនោះស្រ្តីមានចំនួន ១៣៩១នាក់ ព្រមទាំងមានចែកនំបុ័ង និងទឹកសុទ្ធ ជូនដល់ពួកគាត់ថែមទៀតផងដែរ។
លោក ម៉ង សារិន ពលរដ្ឋម្នាក់ ក្នុងស្រុកសំរោងទងនេះ បានថ្លែងថា «ថ្ងៃនេះលោកខ្ញុំនឹងគ្រួសារចំនួន៤នាក់ បានមកពិនិត្យព្យាបាលជំងឺដោយក្នុងនោះមានជំងឺលើសឈាម ជំងឺឬសដូងបាត និងឈឺធ្មេញ។ ខ្ញុំឃើញថាក្រុមគ្រូពេទ្យស្ម័គ្រចិត្តឯកឧត្តម ហ៊ុន ម៉ានីបានយកចិត្តទុកដាក់ខ្លាំងណាស់ ក្នុងការជួយព្យាបាលដល់រូបខ្ញុំ និងគ្រួសារ»។
លោកបន្ថែមទៀតថា «ថ្ងៃនេះខ្ញុំនិងអ្នកភូមិសូមថ្លែងអំណរគុណយ៉ាងជ្រាលជ្រៅដល់ក្រុមគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី ជាខ្លាំង និងសូមសំណមពរឲ្យក្រុមគ្រូពេទ្យស្ម័គ្រចិត្ត ចុះជួយប្រជាពលរដ្ឋក្នុងភូមិសំរោងទងនេះឲ្យបានញឹកញាប់បំផុត»។
លោក ជ័យ សន ប្រជាពលរដ្ឋក្នុងស្រុកសំរោងទង ខេត្តកំពុងស្ពឺបានថ្លែងដែរថា ថ្ងៃនេះលោកមានសេចក្ដីត្រេកអរយ៉ាងខ្លាំង ដែលបានក្រុមគ្រូពេទ្យស្ម័គ្រចិត្តរបស់ លោក ហ៊ុន ម៉ានី ចុះមកពិនិត្យជំងឺ និងចែកថ្នាំពេទ្យដល់គាត់ដោយឥតគិតថ្លៃ លើសពីនេះគាត់បានស្នើសុំឲ្យ ចុះមកបានញឹកញាប់។
លោកបានបន្ដថា «ខ្ញុំសប្បាយចិត្តដែលក្រុមគ្រូពេទ្យ របស់ឯកឧត្តម ហ៊ុន ម៉ានី ចុះមកនេះ ហើយខ្ញុំសូមឲ្យពួកគាត់ចុះ មកឲ្យបានញឹកញាប់, ហើយសុំឲ្យឯកឧត្តម ហ៊ុន ម៉ានី និងក្រុមគ្រូពេទ្យ មានសុខភាពល្អផងដែរ»។
ការចុះពិនិត្យ និងព្យាបាលជំងឺជូនប្រជាពលរដ្ឋនេះ គឺជាស្មារតីមនុស្សធម៌សុទ្ធសាធ ដែលស្តែងចេញពីសេចក្តីស្រឡាញ់បងប្អូន ប្រជាពលរដ្ឋ ក្នុងនាមជាឈាមជ័រ ខ្មែរដូចគ្នា ខ្មែរស្រឡាញ់ខ្មែរ ខ្មែររួបរួមគ្នាតែមួយ អនាគតតែមួយ ពោលគឺការព្យាបាលមិនប្រកាន់បក្សពួក សាសនា ឬនិន្នាការនយោបាយណាមួយឡើយ សំដៅចូលរួមកាត់បន្ថយភាពក្រីក្រ របស់ប្រជាពលរដ្ឋមួយចំណែក។ បញ្ហាសុខភាព គឺជាមូលដ្ឋានគ្រឹះដើម្បីឆ្ពោះទៅរក ភាពជោគជ័យសុភមង្គល ជូនគ្រួសារ និងសង្គមជាតិ។
ក្រុមការងារគ្រូពេទ្យស្ម័គ្រចិត្ត លោក ហ៊ុន ម៉ានី បានចុះពិនិត្យ ព្យាបាលជូនប្រជាពលរដ្ឋមូលដ្ឋាន ក្នុងតំបន់ដាច់ស្រយាលតាមខ្នងផ្ទះ ដោយផ្ទាល់នេះ ដោយសារប្រទេសជាតិ មានសុខសន្តិភាពពេញលេញ ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ធ្វើឲ្យប្រជាពលរដ្ឋមានភាពសុខសាន្ត។ មានតែសម្តេចតេជោទេ ដែលមានទេពកោសល្យពីកំណើត ដឹកនាំប្រទេសជាតិឲ្យមានការរើកចំរើន ឥតឈប់ឈរមានការផ្សះផ្សាជាតិបង្រួបបង្រួមជាតិ មានស្ថិរភាព និងសន្តិភាពពិតប្រាកដ។ ដូច្នេះនេះប្រជាពលរដ្ឋទាំងអស់ ត្រូវតែរួមគ្នាថែរក្សាសុខសន្តិភាព និងស្ថិរភាពតាមគោលនយោបាយ ឈ្នះឈ្នះរបស់សម្តេចតេជោ ហ៊ុន សែន ឲ្យបានគង់វង្ស។
ការពិនិត្យ និងព្យាបាលជំងឺជូនប្រជាពលរដ្ឋ ដោយឥតគិតថ្លៃដែលទទួលបានជោគជ័យ យ៉ាងត្រចះត្រចង់បែបនេះ គឺដោយសារមានការ ចង្អុលបង្ហាញពី លោក ហ៊ុន ម៉ានី តំណាងរាស្ត្រនៃកម្ពុជា។
សូមបញ្ជាក់ថារយៈពេល៥១ខែ ឈានចូលឆ្នាំទី០៥ (២០១២-២០១៧) ក្រុមការងារគ្រូពេទ្យស្ម័គ្រចិត្ត លោក ហ៊ុន ម៉ានី ចំនួន១៥២១នាក់ ចុះពិនិត្យនិងព្យាលបានជូនប្រជាពលរដ្ឋដោយឥតគិតថ្លៃចំនួន៦៧លើក ក្នុងនោះព្យាលបាលជូនប្រជាពលរដ្ឋបានចំនួន៧៧៨៦៩នាក់ ចាប់តាំងពីខែធ្នូ ឆ្នាំ២០១២ រហូតដល់ថ្ងៃទី០៥ ខែមីនា ឆ្នាំ២០១៧៕
