(ភ្នំពេញ)៖ លោក ម៉ក់ ហុង អធិការនគរបាលខណ្ឌសែនសុខ បានដឹកនាំកម្លាំងនគរបាល ចុះបង្ក្រាបបទល្មើសគ្រឿងញៀនមួយ ក្នុងបន្ទប់មួយ ស្ថិតតាមបណ្ដោយផ្លូវ៥៨p ភូមិដីថ្មី សង្កាត់ភ្នំពេញថ្មី ខណ្ឌសែខសុខ ឃាត់ខ្លួនបានជនសង្ស័យប្រុសស្រីចំនួន ៤នាក់ រួមជាមួយថ្នាំញៀន និងវត្ថុតាងមួយចំនួនទៀត។
ជាមួយគ្នានេះ លោកអធិការ បានប្រកាសជូនដំណឹងដល់ប្រជាពលរដ្ឋ ដែលបាត់អត្តសញ្ញាណបណ្ណ សូមអញ្ជើញមកយកក្រោយពីកម្លាំងរបស់លោក បានដកហូតពីក្រុមគ្រឿងញៀន។
លោកអធិការ ម៉ក់ ហុង បានឲ្យដឹងថា ប្រតិបត្តិការនេះធ្វើឡើងនៅថ្ងៃទី០៥ ខែមីនា ឆ្នាំ២០១៧ ដែលជនសង្ស័យទាំង៤នាក់ រួមមាន៖ ១.ឈ្មោះ ជី សុជាតិ អាយុ៣៥ឆ្នាំ, ២.ឈ្មោះ ឈិន ស្រីនី ភេទស្រី អាយុ៥០ឆ្នាំ, ៣.ឈ្មោះ សេង ណារី ភេទស្រី អាយុ២៨ឆ្នាំ, ៤.ឈ្មោះ ពិន ណារី ភេទស្រី អាយុ២៧ឆ្នាំ។
លោកអធិការបានបន្តថា កម្លាំងសមត្ថកិច្ចបានដកហូតម្ស៉ៅក្រាមសថ្លា១កញ្ចប់ ឧបករណ៍ជក់គ្រឿងញៀន និងវត្ថុតាងមួយចំនួន។ បច្ចុប្បន្ន ជនសង្ស័យទាំង៤នាក់ខាងលើ កំពុងឃាត់ខ្លួននៅអធិការដ្ឋាននគរបាលខណ្ឌសែនសុខ ដើម្បីចាត់ការតាមនីតិវិធីផ្លូវច្បាប់។
សូមជម្រាបថា កាលពីថ្ងៃទី១៣ ខែធ្នូ ឆ្នាំ២០១៦ កន្លងទៅ ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន បានដាក់ចេញផែនការស្តីពី យុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី១ រយៈពេល៦ខែ (ចាប់ពីថ្ងៃទី០១ ខែមករា ដល់ថ្ងៃទី៣០ ខែមិថុនា ឆ្នាំ២០១៧) ដើម្បីប្រយុទ្ធប្រឆាំងគ្រឿងញៀននៅកម្ពុជា ឲ្យកាន់តែខ្លាំងក្លា និងទទួលបានលទ្ធផលល្អឡើងថែមទៀត។
យុទ្ធនាការប្រយុទ្ធប្រឆាំងគ្រឿងញៀននេះ ដឹកនាំដោយសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ជាប្រធាន និងឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន ជាអនុប្រធាន៕
