(ឧត្តរមានជ័យ)៖ សកម្មភាពគណបក្សសង្គ្រោះជាតិ ស្រុកអន្លង់វែង នាំគ្នាដុតស្លាកគណបក្សកម្ទេចចោល ដោយសារតែ​ខឹងសម្បា នឹងថ្នាក់ដឹកនាំរបស់ខ្លួនដែលគ្មានទំនួលខុសត្រូវ ពុករលួយស៊ីសំណូក និងបក្ខពួកនិយម។

ការដុតកម្ទេចស្លាកនេះ​ លោក សួន សំណាង ប្រធានគណបក្សសង្គ្រោះជាតិឃុំ និងជាជំទប់ទី២ ឃុំត្រពាំងប្រីយ៍ ជានាំដឹកនាំក្រុមការងារដុតបំផ្លាញ នៅថ្ងៃទី៥ ខែមីនា ឆ្នាំ២០១៧នេះ។

បើតាមបដារបស់សកម្មជន CNRP បានអះអាងថា មូលហេតុដែលពួកគេដុតកម្ទេចចោលបែបនេះ ព្រោះតែមេបក្ស​មិនដោះស្រាយនូវបញ្ហារបស់សកម្មជន មេពុករលួយ មេបក្ខពួកនិយម មេស៊ីសំណូកសូកប៉ាន់។ ជាមួយគ្នានោះ ​បដាដដែលបញ្ជាក់ថា «លាហើយសង្គ្រោះជាតិ»។

សូមបញ្ជាក់ថា ​ស្លាកគណបក្សសង្គ្រោះជាតិ ដែលត្រូវបានហែក និងដុតកម្ទេចចោលមាន៤​ស្លាក ស្ថិតនៅភូមិទួលកណ្តាល ឃុំត្រពាំងប្រិយ៍ ស្រុក​អន្លង់វែង ខេត្តឧត្តរមានជ័យ៕