(សៀមរាប)៖ ដោយទឹកចិត្តអាណិតអាសូរ ប្រកបដោយស្មារតី យកចិត្តទុកដាក់ ចំពោះប្រជាពលរដ្ឋ លោក ប៉ោ វណ្ណនិត មេបញ្ជាការកងរាជអាវុធហត្ថ ខេត្តសៀមរាប និងសហការី បានសហការគ្នាសាងសង់ផ្ទះ១ខ្នង ជូនលោកយាយ យ៉ម ដែលស្ដ្រីចំណាស់ម្នាក់ មានជីវភាពក្រីក្រគ្មានទីពឹង រស់នៅក្នុងខ្ទមស្លឹកទ្រុឌទ្រោម ស្ថិតនៅភូមិគោកក្ដុល ឃុំកំពុងភ្លុក ស្រុកប្រាសាទបាគង។

ផ្ទះមួយខ្នងនេះ ត្រូវបានចំណាយទឹកប្រាក់អស់ ជាង៣ពាន់ដុល្លារ ដែលចូលរួមសាងសង់ ដោយកម្លាំងអាវុធហត្ថ ស្រុកប្រាសាទបាគង និងស្នាក់ការអាវុធហត្ថ B8-2 ចំនួន១៥នាក់ ក្រោមការដឹកនាំដោយ លោកវរសេនីយ៍ទោ ថា ដាលុច ប្រធានមន្ទីរយុត្តិធម៌ និងមានការចង្អុលបង្ហាញពី លោកមេបញ្ជាការ ប៉ោ វណ្ណនិត។

លោកវរសេនីយ៍ទោ ថា ដាលុច បានឲ្យដឹងថា លំនៅដ្ឋានមួយខ្នងនេះ មានទំហំបណ្ដោយ៦ម៉ែត្រ ទទឹង៤ម៉ែត្រ ធ្វើពីឈើប្រក់ស័ង្កសី ចំណាយអស់ទឹកប្រាក់ ៣,១២០ដុល្លារ។

ក្រោយទទួលបានផ្ទះថ្មី ដែលចេញពីកម្លាំងកាយ កម្លាំងចិត្តសប្បុរសធម៌ របស់ក្រុមការងារខាងលើ លោកយាយ យ៉ម មានការសប្បាយចិត្តឥតឧប្បមា និងបានថ្លែងអំណរគុណដល់ លោកមេបញ្ជាការ ប៉ោ វណ្ណនិត លោកវរសេនីយ៍ទោ ថា ដាលុច និងសហការីដទៃទៀត ទាំងទឹកមុខញញឹមស្ទើរស្រក់ទឹកភ្នែក៕