(សៀមរាប)៖ រដ្ឋបាលខេត្តសៀមរាប មន្ទីរទេសចរណ៍ខេត្ត រួមជាមួយដៃគូពាក់ព័ន្ធ មានអង្គការ GIZ របស់អាល្លឺម៉ង់ បានមូលមតិគ្នាដាក់ផែនការ រៀបចំផែនទី និងព័ត៌មានស្ដីពី រមណីយដ្ឋានទេសចរណ៍ធម្មជាតិ និងសហគមន៍ទេសចរណ៍ ដើម្បីផ្ដល់ភាពងាយស្រួល ដល់ដំណើរកម្សាន្តរបស់ភ្ញៀវទេសចរអន្តរជាតិ នៅតំបន់ទេសចរណ៍ជាច្រើន ក្នុងភូមិសាស្រ្តខេត្តសៀមរាប។
ផែនការរៀបចំផែនទី និងព័ត៌មានស្ដីពី រមណីយដ្ឋានទេសចរណ៍ធម្មជាតិ និងសហគមន៍ទេសចរណ៍នេះ ត្រូវបានលើកឡើងដោយ លោកស្រី អេង សាលត ទីប្រឹក្សាបច្ចេកទេសកម្ម វិធីអភិវឌ្ឍសេដ្ឋកិច្ចតំបន់ នៃអង្គការ GIZ ក្នុងកិច្ចប្រជុំផ្សព្វផ្សាយ លើការពង្រឹងគុណភាពសេវាកម្ម នៅតាមរមណីយដ្ឋានទេសចរណ៍ ក្នុងភូមិសាស្ត្រខេត្តសៀមរាប ជូនដល់គណៈកម្មការ រមណីយដ្ឋានទេសចរណ៍ធម្មជាតិ និងសហគមន៍ទេសចរណ៍ រួមនិងអាជ្ញាធរពាក់ព័ន្ធ។
កិច្ចប្រជុំនេះ បានរៀបចំនៅសាលប្រជុំសាលាខេត្តសៀមរាប នារសៀលថ្ងៃទី០៣ ខែមីនា ឆ្នាំ២០១៧នេះ ស្ថិតក្នុងអធិបតីភាពរបស់ លោក ពៅ ពិសិដ្ឋ អភិបាលរងខេត្តសៀមរាប និងវត្តមានរបស់ លោក ង៉ូវ សេងកាក់ ប្រធានមន្ទីរទេសចរណ៍ខេត្ត រួមនិងមន្ត្រីជំនាញមកពី មន្ទីរ ស្ថាប័ន អង្គភាព អាជ្ញាធរ ក្រុមហ៊ុន សហគមន៍ រមណីយដ្ឋានទេសចរណ៍ធម្មជាតិ សរុប៦០រូប។
ផែនការនានានៅក្នុងកិច្ចប្រជុំនេះ គឺធ្វើឡើងយោងទៅតាមភាពចាំបាច់ និងដើម្បីពង្រឹងគុណភាពសេវាកម្ម នៅតាមរមណីយដ្ឋានធម្មជាតិ និងសហគមន៍ទេសចរណ៍ ក្នុងភូមិសាស្ត្រខេត្តសៀមរាប និងយោងតាមសេចក្ដីប្រកាសស្ដីពី ស្ដង់ដារអប្បបរមា សម្រាប់រមណីយដ្ឋានទេសចរណ៍ និងឈានឆ្ពោះ ក្នុងការចូលរួមចលនាប្រឡងប្រណាំង «ទីក្រុងស្អាត រមណីយដ្ឋានស្អាត សេវាល្អ និងបដិសណ្ឋារកិច្ចល្អ» ដែលបានដាក់ចេញ ដោយក្រសួងទេសចរណ៍។
លោក ង៉ូវ សេងកាក់ បានបញ្ជាក់ថា រមណីយដ្ឋានទេសចរណ៍ និងសហគមន៍ទេសចរណ៍ នៅខេត្តសៀមរាប គឺមាននៅតំបន់ទន្លេសាបចុងឃ្នៀស និងភ្នំក្រោម សមាគមសហគមន៍ ទេសចរណ៍វប្បធម៌ធម្មជាតិ បឹងពារាំង សហគមន៍ទេសចរណ៍ធម្មជាតិមេជ្រៃ កំពង់ភ្លុក កំពង់ឃ្លាំង ចុងឃ្នៀស សហគមន៍ទេសចរណ៍ធម្មជាតិ-កែច្នៃ ត្រាវកុដិ សហគមន៍ទេសចរណ៍ បារាយណ៍ទឹកថ្លា ខ្នារពោធិ៍ ចាន់សរជើង ចង្ក្រានរយ ពើងតានាន់ សហគមន៍ភូមិទេសចរណ៍ រុនតាឯក សហគមន៍ទេសចរណ៍ ភូមិវប្បធម៌កម្ពុជា ឧទ្យានជាតិភ្នំគូលេន ជាដើម។
លោកស្រី អេង សាលត ទីប្រឹក្សាបច្ចេកទេសកម្មវិធី អភិវឌ្ឍសេដ្ឋកិច្ចតំបន់ នៃអង្គការ GIZ បានឲ្យដឹងថា «ខាងអង្គការ GIZ នឹងបន្តសហការជាមួយមន្ទីរទេសចរណ៍ និងស្ថាប័ន អង្គភាព ដែលជាប់ពាក់ព័ន្ធ ក្នុងការរៀបចំផែនទី និងព័ត៌មានស្ដីពី រមណីយដ្ឋានទេសចរណ៍ធម្មជាតិ និងសហគមន៍ទេសចរណ៍» និងការចូលរួមក្នុងការពង្រឹងសមត្ថភាព និងការអភិវឌ្ឍធនធានមនុស្ស ដល់គណៈកម្មការ និងអ្នកគ្រប់គ្រងរមណីយដ្ឋានទេសចរណ៍ធម្មជាតិ និងសហគមន៍ទេសចរណ៍ផងដែរ។
លោកអភិបាលរងខេត្ត ពៅ ពិសិដ្ឋ បានបន្តថា វិស័យទេសចរណ៍ ត្រូវបានរាជរដ្ឋាភិបាល ទទួលស្គាល់ថា «ជាមាសបៃតង» ជាផ្នែកសំខាន់នៃសេដ្ឋកិច្ចបៃតង ដែលនាំចំណូលទៅក្នុងចរន្ដសេដ្ឋកិច្ចជាតិ និងបានរួមចំណែកជំរុញកំណើនផលិតផលក្នុងស្រុកសរុប។
លោក ពៅ ពិសិដ្ឋ បានបន្ថែមថា ការអភិវឌ្ឍទេសចរណ៍របស់ខេត្ត ត្រូវជំរុញអនុវត្តផ្ដោតទៅលើយុទ្ធសាស្ត្រជាអាទិភាព ៦ចំណុច រួមមាន៖ ១.ការងារអភិវឌ្ឍផលិតផលទេសចរណ៍, ២.ការសិក្សាទីផ្សារ និងផ្សព្វផ្សាយទេសចរណ៍, ៣.ការតភ្ជាប់ និងសម្របសម្រួលការធ្វើដំណើរដឹកជញ្ជូនភ្ញៀវទេសចរ, ៤.ការងារសន្ដិសុខ សុវត្ថិភាពដល់ភ្ញៀវទេសចរ និងអ្នកដំណើរ, ៥.ពង្រឹងការអនុវត្តប្រព័ន្ធច្បាប់ និងយន្ដការគ្រប់គ្រងរមណីយដ្ឋានធម្មជាតិ សហគមន៍ទេសចរណ៍ និង៦.ការអភិវឌ្ឍធនធានមនុស្ស ទាក់ទងនឹងវិស័យទេសចរណ៍។ ក្នុងនោះ ការរៀបចំដំណើរទស្សនកិច្ចសិក្សា ទៅតំបន់រមណីយដ្ឋាន សហគមន៍ទេសចរណ៍ ដែលមានបទពិសោធន៍ មានសក្ដានុពល និងវិសាលភាពខ្ពស់ ទាំងក្នុងប្រទេស និងនៅក្រៅប្រទេសផងដែរ៕
