(តាកែវ)៖ ប៉ុន្មានថ្ងៃចុងក្រោយនេះ កម្លាំងមន្ត្រី នៃមជ្ឈមណ្ឌលកម្ចាត់មីនកម្ពុជា (CMAC) បានបន្តរំដោះគ្រាប់បែកទម្លាក់ពីយន្តហោះអាមេរិក ប្រភេទ MK82 ជាបន្តបន្ទាប់ ជាក់ស្តែងនៅថ្ងៃនេះ មន្ត្រី CMAC បានដោះគ្រាប់បែកដ៏គ្រោះថ្នាក់មួយគ្រាប់ទៀត នៅស្រុកបាទី ខេត្តតាកែវ។

លោក ហេង រតនា អគ្គនាយក CMAC បានបញ្ជាក់ថា នៅព្រឹកថ្ងៃសុក្រ ទី០៣ ខែមីនានេះ​ នៅភូមិ​ ឱភាសាំង​ ឃុំ​ កន្តឹង​ ស្រុកបាទី​ ខេត្តតាកែវ​ មន្ត្រី CMAC បានឃើញនិងដោះបន្សាបគ្រាប់បែកទំលាក់ពីយន្តហោះប្រភេទ​ MK82 បានមួយគ្រាប់ទៀតហើយ​។ គ្រាប់បែកទំលាក់ពីយន្តហោះនេះ​ បានឃើញពេលដែលប្រជាជនជីកស្រះដោយគ្រឿងចក្រ។

សូមរំលឹកថា កាលពីថ្ងៃទី០១ ខែមីនា ឆ្នាំ២០១៧ គ្រាប់បែកប្រភេទ MK82 ចំនួន៣គ្រាប់ ដែលកងទ័ពអាកាសអាមេរិក បានទម្លាក់យ៉ាងព្រៃផ្សៃ លើទឹកដីកម្ពុជា ត្រូវបានមន្ត្រីជំនាញ CMAC ដោះបាននៅភូមិគោកព្រីង​ ឃុំគោកត្រាប់​ ស្រុកកណ្តាលស្ទឹង​ ខេត្តកណ្តាល។

ជាមួយគ្នានេះ កាលពីល្ងាចថ្ងៃទី២៨ ខែកុម្ភៈ ឆ្នាំ២០១៧ CMAC បានដោះគ្រាប់បែក ប្រភេទ MK82 មួយគ្រាប់ នៅភូមិភ្នំបុរី​ ឃុំព្រែកទោល​ ស្រុកអង្គរបុរី ខេត្តតាកែវ។

អាមេរិកបានទម្លាក់គ្រាប់បែកលើទឹកដីកម្ពុជា ចាប់ពីដើមឆ្នាំ១៩៦៣ ដល់ដើមឆ្នាំ១៩៧៥ ហើយទិន្នន័យទម្លាក់គ្រាប់ទាំងនោះ ត្រូវបានឯកភាពនៅឆ្នាំ២០០០ ​ដោយប្រធានាធិបតីជំនាន់ក្រោយ គឺលោក Bill Clinton ដែលបានបញ្ចេញឯកសារចំហរថា អាមេរិកទម្លាក់គ្រាប់បែកនៅកម្ពុជាអស់ ២.៨លានតោន និងគ្រាប់បែកគីមីផងដែរ ក្រោមលេសថា​ តាមកម្ទេចពួកយៀកកុង​ ប៉ុន្តែស្លាប់តែប្រជាពលរដ្ឋខែ្មរ អស់ជាងកន្លះលាននាក់ និងកម្ទេចតែភូមិឋាន ផ្ទះសម្បែងខែ្មរ អស់រាប់ម៉ឺនកន្លែងទៀត៕