(សៀមរាប)៖ បាឡុងដឹកភ្ញៀវទេសចរបរទេសចំនួន៨នាក់ សម្រាប់មើលទេសភាព នៅតំបន់អង្គរវត្ត ​ខេត្តសៀមរាប បានធ្លាក់នៅជិតបារាយទឹកថ្លា ក្នុងទឹកដីសង្កាត់ទឹកវិល ក្រុងសៀមរាប នាព្រឹកថ្ងៃទី៣ ខែមីនា ឆ្នាំ២០១៧នេះ ប៉ុន្តែសំណាងល្អមិនបានអ្នករងរបួសនោះ។

មន្រ្តីនគរបាលមូលដ្ឋានសង្កាត់ទឹកវិល បានប្រាប់អង្គភាព Fresh News ឲ្យដឹងថា «ពិតជាហេតុការណ៍ធ្លាក់បាឡុងមែន ដោយដឹកភ្ញៀវទេសចរបរទេស ៨នាក់មានស្រី៧នាក់ (ជនជាតិអាស៊ី៤នាក់ និងអឺរ៉ុប៤នាក់) និងអ្នកបើកបាឡុងម្នាក់ជនជាតិខ្មែរ ប៉ុន្តែមិនមានគ្រោះថ្នាក់អីទេ ដោយសារតែធ្លាក់ទាប ហើយអាចមកពីខ្យល់បក់ ពីព្រោះព្រឹកមិញមានខ្យល់ខ្លាំង»។

មន្រ្តីនគរបាលបានបន្តទៀតថា បន្ទាប់ពីកើតហេតុ ជនរងគ្រោះទាំងអស់ បានឡើងរថយន្តទៅបាត់ មិនមានទៅមន្ទីរពេទ្យនោះទេ។ បើតាមសមត្ថកិច្ចបាឡុងដឹកភ្ញៀវទេសចរ​ជារបស់ក្រុមហ៊ុនចិនមួយ មានទីតាំងស្ថិតនៅស្រុកប្រាសាទបាគង។ សម្រាប់ហេតុការណ៍នេះ សមត្ថកិច្ចអះអាងថា មិនដែលធ្លាប់កើតមាននោះទេ៕