(ភ្នំពេញ)៖ លោក ហេង រតនា អគ្គនាយកមជ្ឈមណ្ឌលកម្ចាត់មីនកម្ពុជា (CMAC) បានបញ្ជាក់ថាឲ្យដឹងថា ប្រទេសកូឡុំប៊ី និងប្រទេសកម្ពុជា សិ្ថតនៅឆ្ងាយពីគ្នា មួយចំហៀងផែនដីម្នាក់ ពោលម៉ោងខុសគ្នា១២ម៉ោងក៏ដោយ ក៏កម្ពុជានិងកូឡុំប៊ី ផ្តើមកិច្ចសហប្រតិបតិ្តការ អន្តរជាតិលើសកម្មភាពកំចាត់មីនរវាងប្រទេសទាំងពីរផងដែរ។
លោក ហេង រតនា បានបញ្ជាក់ថា ក្រោយមានសង្គ្រាមជាង៥០ឆ្នាំ ប្រទេសកូឡុំប៊ី ទើបបានបញ្ចប់សង្គ្រាមស៉ីវិល ហើយចាប់ផ្តើមអនុវត្តសន្តិភាពពេញលេញក្នុងទូទាំងប្រទេស ហើយមានបញ្ហាគ្រាប់មីន និងស្តារសន្តិភាពឡើងវិញ តែងតែនឹកឃើញកម្ពុជា ដែលអ្នកមានបទពិសោធន៍ លើការធ្វើសមាហរកម្មសង្គមឡើងវិញ។
លោកបន្តថា នាយករដ្ឋមន្ត្រីជប៉ុន បានប្រកាសក្នុងរដ្ឋសភាជប៉ុន ឲ្យពិចារណាស្នើសុំកំលាំង CMAC ជួយគាំទ្រដល់សកម្មភាពមីនរបស់កូឡុំប៊ី។ ផ្អែកតាមសំណូពរនេះ CMAC បានបញ្ជូនគណៈប្រតិភូទៅប្រទេសកូឡុំប៊ី ដឹកនាំពិភាក្សាអំពីកិច្ចសហការ និងផ្តល់ការហ្វឹកហ្វឺននេះ។
លោកបញ្ជាក់ទៀតថា CMAC នឹងផ្តល់កំលាំងគាំទ្រដល់ប្រទេសកូឡុំប៊ីតាម៣រូបភាព៖
១៖ ផ្តល់ការហ្វឹកហ្វឺនការងារ គ្រប់គ្រងសកម្មភាពមីន ចំនួន៤ឆ្នាំ (២០១៧-២០២០) ក្រោមជំនួយរបស់ទីភ្នាក់ផ្តល់ជំនួយអន្តរជាតិជប៉ុន (JICA) ។
២៖ បញ្ជូនកំលាំង CMAC ចំនួនប្រមាណ៣០នាក់ ក្នុងមួយវគ្គៗ ដើម្បីដឹកនាំអនុវត្តការដោះមីន និងហ្វឹកហ្វឺន ក្រោមជំនួយ និងការដោះមីនរបស់ក្រសួងការបរទេសជប៉ុន ផ្តល់ជូនប្រទេសកូឡំប៊ីចុងឆ្នាំ២០១៧ និងឆ្នាំ២០១៨។
៣៖ ដៃគូរមួយចំនួនកំពុងទំនាក់ទំនង CMAC ឲ្យជួយផ្តល់អ្នកជំនាញកំរិតតូចៗ រយៈពេល៣-៦ខែ ជួយដល់ការដឹកនាំ និងហ្វឹកហ្វឺនការដោះមីន សំរាប់អង្គការដោះមីនជាតិ និងអន្តរជាតិនៅតាមខេត្ត របស់ប្រទេសកូឡុំប៊ី។
លោក ហេង រតនា បានឲ្យដឹងទៀតថា នេះជាភារកិច្ចចែករំលែកបទពិសោធន៍ ហើយ CMAC មោទនភាពដែលអាចជួយធ្វើសកម្មទាំងនេះបាន ជាពិសេសមោទនភាពជាតិ ដែលមានសុខសន្តិភាពពេញផ្ទៃប្រទេស ធ្វើឲ្យជាតិសាសន៍ដទៃ ទទួលស្គាល់ និងបានផ្តល់ឲ្យយើងមានឱកាស ជួយប្រជាជាតិខ្លះទៀតលើពិភពលោកយើងនេះ ដែលកំពុងហែលឆ្លងសង្គ្រាម ឬទើបបញ្ចប់សង្គ្រាម៕
