(ភ្នំពេញ)៖ តារាម៉ូដែលរបស់ប្រទេសថៃ ចំនួន៤ដួង បានបង្ហាញវត្តមានក្នុងព្រឹត្តិការណ៍ ពិព័រណ៌ពាណិជ្ជកម្មថៃ «ថបថៃប្រេន ២០១៧» នៅក្នុងប្រទេសកម្ពុជា ដែលបានរៀបចំឡើងរយៈពេល៥ថ្ងៃ នៅមជ្ឈមណ្ឌលពិព័រណ៍កោះពេជ្រ ដែលជាព្រឹត្តិការណ៍ តាំងពិព័រណ៍ផលិតផលដ៏ធំប្រចាំ ឆ្នាំ២០១៧នេះ។ ក្នុងនោះ គេកត់សម្គាល់ថា តារាម៉ូដែលថៃ៤រូប ដែលជាតារាល្បីឈ្មោះនៅប្រទេសថៃ គឺទទួលបានការចាប់អារម្មណ៍ខ្លាំង ព្រោះតែពួកគេ បានធ្វើការតុបតែងខ្លួនប្លែក និងមានភាពលេចធ្លោជាងគេ។
ក្នុងព្រឹត្តិការណ៍បង្ហាញផលិតផលថៃ នៅក្នុងប្រទេសកម្ពុជា ក្រោមវត្តមានតារាម៉ូដែលល្បីឈ្មោះ ទាំង៤របស់ថៃនេះ ត្រូវគេមើលឃើញថា មានជនជាតិថៃ ដែលរស់នៅស្រុកខ្មែរ ជាច្រើនទទួលការស្វាគមន៍យ៉ាងកក់ក្ដៅ ខណៈពួកនាងប្រកាសថា សប្បាយចិត្តដែលបានមកកាន់ប្រទេសកម្ពុជា។ ពួកគេមានគម្រោងចុះមកកម្សាន្ត នៅប្រទេសកម្ពុជា ក្នុងពេលវេលាកំណត់មួយ ប្រសិនបើដំណើរមកកាន់កម្ពុជា សម្រាប់ព្រឹត្តិការណ៍ពិរ័រណ៌នេះ មិនអាចឲ្យពួកនាងបានដើរទស្សនា ប្រទេសកម្ពុជាជុំគ្នា ជាពិសេសតំបន់ប្រាសាទអង្គរវត្ត។ ពួកគេនៅក្នុងប្រទេសថៃ គឺជាតំណាងផលិតផលប្រេនប្រេន នៅក្នុងប្រទេសថៃ ទើបត្រូវបានម្ចាស់ផលិតផលប្រេនប្រេន ដែលចុះមកតាំងពិព័រណ៌ នៅក្នុងប្រទេសកម្ពុជានាពេលនេះ ចំណាយទុនខ្ពស់អញ្ជើញមក។ ប៉ុន្តែនោះក៏ដោយសារតែស្ថានទូតកម្ពុជា ស្នើសុំផងដែរ។
អ្នករៀបចំកម្មវិធី ពិព័រណ៌ពាណិជ្ជកម្មថៃ «ថបថៃប្រេន ២០១៧» បានអះអាងប្រាប់បណ្ដាញសារព័ត៌មានថា ដោយសារតែតារាម៉ូដែលទាំង៤ មកកាន់កម្ពុជា តាមរយៈស្ថានទូតថៃ ប្រចាំនៅកម្ពុជា ដើម្បីតំណាងឲ្យតារាថៃ ក្នុងពិធីពិព័រណ៌ផលិតផលប្រេនប្រេន របស់ប្រទេសថៃនៅកោះពេជ្រ ទើបពួកនាងមិនច្បាស់ពីគម្រោង បានដើរកម្សាន្តនោះទេ។ អ្នកដឹកនាំតារាម៉ូដែលទាំង៤បញ្ជាក់ថា នៅក្នុងប្រទេសថៃពួកនាងទាំង៤ ជាកំពូលតារាម៉ូដែលកម្រិតប្រទេស ដោយក្រៅពីមានឱកាសមកកាន់កម្ពុជា ក៏ធ្លាប់តំណាងឲ្យប្រទេសថៃដូចគ្នានេះ ទៅបង្ហាញខ្លួននៅតាមបណ្ដាប្រទេសជាច្រើនទៀត នៅក្នុងព្រឹត្តិការណ៍ធំៗផងដែរ៕
