(ភ្នំពេញ)៖ ជំលោះរឿងរ៉ាវទិញ លក់អាជ្ញាប័ណ្ណខ្សាច់រវាងឧកញ៉ា យិន សុវណ្ណី និង លោក ឡៅ ស៊ុនប៉ា អតីតអភិបាលខេត្តកណ្ដាល មកពីកូតាគណបក្សហ៊្វុនសិនបុិច កាលពីជិត១០ឆ្នាំមុន រហូតមកដល់ពេលនេះនៅមិនទាន់ចប់នៅឡើយនោះទេ ព្រោះតែភាគីលោកឧកញ៉ា យិន សុវណ្ណី ដែលជាអ្នកចាញ់ក្ដីត្រូវតុលាការរឹបអូសយកផ្ទះ ទៅលក់ឡៃឡុងផ្ដល់ជាសំណងដល់ភាគីឈ្នះក្ដីនោះ នៅតែព្យាយាមស្វែងរកយុត្តិធម៌ តាមផ្លូវច្បាប់តាមរយៈការក្រាបបង្គំទូលថ្វាយ សូមព្រះរាជអន្តរាគមន៏ពីព្រះមហាក្សត្រ ក្នុងនាមព្រះអង្គជាប្រធានឧត្តមក្រុមប្រឹក្សា នៃអង្គចៅក្រមអោយមានការសើរើជំនុំជំរះជាថ្មី លើសាលក្រមស្ថាពរឡើងវិញ ព្រោះលោកចាត់ទុកថាការជំនុំជំរះកន្លងមកមាន ភាពមិនប្រក្រតី។
ក្រោយមានការស្នើសុំព្រះរាជអន្តរាគមន៏ពីព្រះមហាក្សត្រតាមរយៈលោកអង្គ វង្សវឌ្ឍានា សមាជិកឧត្តមក្រុមប្រឹក្សា នៃអង្គចៅក្រម និងជារដ្ឋមន្ត្រីក្រសួងយុត្តិធម៌រួចមក នៅថ្ងៃទី២៦ ខែមករា ឆ្នាំ២០១៧ ព្រះមហាក្សត្របានផ្ញើ ព្រះរាជសារមួយច្បាប់ពាក់ព័ន្ធករណីបណ្ដឹងរបស់ឈ្មោះ យិន សុវណ្ណី សុំសើរើជំនុំជំរះសារជាថ្មីលើសាលក្រម ស្ថាពរលេខ០១(វ\ហ)ចុះថ្ងៃទី១៥ ខែ០១ ឆ្នាំ២០១១ របស់សាលាដំបូងខេត្តកណ្ដាលខាងលើនេះ ជូនទៅលោកអង្គ វង្សវឌ្ឍានា សមាជិកឧត្តមក្រុមប្រឹក្សា នៃអង្គចៅក្រម និងជារដ្ឋមន្ត្រីក្រសួងយុត្តិធម៌ ពិនិត្យតាមនីតិវិធីច្បាប់។
ក្រោយទទួលបានព្រះរាជសារ របស់ព្រះមហាក្សត្រ នៅថ្ងៃទី១០ ខែកុម្ភះ ឆ្នាំ២០១៧ថ្មីៗនេះ លោកអង្គ វង្សវឌ្ឍានា បានធ្វើលិខិតជំរាបជូនទៅប្រធានសាលាដំបូង និងព្រះរាជអាជ្ញាអមសាលាដំបូងខេត្តកណ្ដាល ដោយយោងតាមព្រះរាជសារ លោកបានស្នើសុំអោយប្រធានតុលាការ និង អយ្យការខេត្តកណ្ដាលពិនិត្យពិចារណាលើសំណូមពរ របស់ម្ចាស់បណ្ដឹងអោយស្របតាមនីតិវិធី នៃច្បាប់។
រហូតមកដល់ពេលនេះ គេនៅមិនទាន់ដឹងថាប្រធានតុលាការ និងព្រះរាជអាជ្ញាអមសាលាដំបូងខេត្តកណ្ដាល ចាត់ការយ៉ាងណានៅឡើយនោះទេ។
ខាងក្រោមនេះ ជាព្រះរាជសាររបស់ព្រះមហាក្សត្រផ្ញើជូន លោក អង្គ វង្សវឌ្ឍានា សមាជិកឧត្តមក្រុមប្រឹក្សា នៃអង្គចៅក្រម និងជារដ្ឋមន្ត្រីក្រសួងយុត្តិធម៌ កាលពីថ្ងៃទី២៦ ខែមករា ឆ្នាំ២០១៧ និងលិខិតរបស់ លោក អង្គ វង្សវឌ្ឍានា ផ្ញើជូនប្រធានតុលាការ និងព្រះរាជអាជ្ញាអមសាលាដំបូងខេត្តកណ្ដាល៖
