(កំពង់ចាម)៖ មានប្រសាសន៍ឲ្យដឹងនៅក្នុងពិធីសម្ពោធ​អគារសិក្សា និងទីចាត់ការសរុប២១បន្ទប់ នៅវិទ្យាល័យ តេជោ ហ៊ុន សែន បឹងកុក ស្ថិតនៅក្នុងសង្កាត់ បឹងកុក ក្រុងកំពង់ចាម ខេត្តកំពង់ចាម នៅថ្ងៃទី២៨ ខែកុម្ភៈ ឆ្នាំ២០១៧នេះ សម្តេចតេជោ ហ៊ុន សែន បានថ្លែងការរំពឹងយ៉ាងពេញមាត់ថា «វិទ្យាល័យ តេជោ ហ៊ុន សែន បឹងកុក» នឹងក្លាយជាកន្លែងបណ្តុះបណ្តាល​ដ៏សំខាន់​សម្រាប់ កូនចៅប្រជាពលរដ្ឋខេត្តកំពង់ចាម។

បន្ថែមពីលើនោះ សម្តេចតេជោ ហ៊ុន សែន បានសម្រេចឧបត្ថម្ភឲ្យលោកគ្រូ អ្នកគ្រូពេទ្យ និងនិស្សិតពេទ្យ ក្នុងខេត្តកំពង់ចាម រួមទាំងគ្រូបង្រៀន នៅសាលាមួយចំនួនទៀត ក្នុងខេត្តកំពង់ចាម ទៅលេងកម្សាន្តនៅក្នុងខេត្តព្រះសីហនុ។ ក្រៅពីសាងសង់​សាលារៀន សម្តេចតេជោ ហ៊ុន សែន បានចាត់ចែងឲ្យកងវិស្វកម្មរបស់សម្តេច ជួសជុល និងរៀបចំតារាងបាល់ទាត់ នៅក្នុងក្រុងកំពង់ចាមឲ្យបានស្អាតផងដែរ។ សម្តេចនាយករដ្ឋមន្រ្តីថា ថវិកាសាងសង់ជាបន្ទុករបស់សម្តេច។ សម្តេចតេជោ ហ៊ុន សែន បានចាត់ចែងឲ្យធ្វើតារាងបាល់ទាត់ក្នុងខេត្តកំពង់ចាម ទៅជាកន្លែងបាល់ ទាត់ភូមិភាគ១។

សម្តេចតេជោ ហ៊ុន​ សែន បានមានប្រសាសន៍យ៉ាងដូច្នេះថា «លោកនាយក អ្នកគ្រូ លោកគ្រូ បានស្នើសុំឲ្យមានការ​ជួសជុល ពិដានចាស់ ហើយក៏សុំ Computer ២០គ្រឿង សម្របា់បង្រៀនដល់សិស្សានុសិស្ស និងសុំម៉ាស៊ីនដេរចំនួន ៥០គ្រឿង ប៉ុន្តែ ថ្ងៃនេះ ខ្ញុំបាននាំមកនូវសម្រាប់ ការធ្វើការរបស់សាលាមាន Computer ១០គ្រឿង Printer ៥គ្រឿង និងម៉ាស៊ីនថតចំលង ១គ្រឿង ហើយសម្រាប់ការសិក្សារបស់សិស្ស Computer ២០គ្រឿង និងម៉ាស៊ីនកាត់ដេរ​១០គ្រឿង សុំជូនតាមសំណូមពរ»។

នៅក្នុងកម្មវិធីដដែលនោះ សម្តេចតេជោ ហ៊ុន សែន ក៏បានថ្លែងឲ្យដឹងទាក់ទងនឹងតារាងបាល់ទាត់ នៅទីរួមខេត្តកំពង់ចាម ផងដែរ។ សម្តេចតេជោ មានប្រសាសន៍យ៉ាងដូច្នេះថា «និយាយរឿងអាតារាងបាល់នេះ មកពីចាហ្វាយខេត្ត​អត់ចេះទាត់​បាល់ អាលូវមិនបាច់ចាំអ្នកណាគេធ្វើទេ វិស្វកម្មតេជោ ចូលធ្វើភ្លាម ទាត់បាល់នៅកំពង់ចាម ពីព្រោះចុះមកមិញ សូម្បីស្បែកជើង​ខ្ញុំក៏ប្រឡាក់ដែរ ខេត្តនេះ មិនគួរជាខេត្តអន់ដល់ម្លឹង ខេត្តល្បីល្បាញ ហើយជាខេត្តស្រុកកំណើត​នាយករដ្ឋមន្រ្តីទៀត ចុះមកយ៉ាប់ម៉ាដោយ យ៉ាប់អន់ជាងស្វាយរៀង អាលូវធ្វើតារាងបាល់ឲ្យស្អាត ដាក់ភ្លើង ដាក់អីទៅ ឲ្យវិស្វកម្មតេជោធ្វើតែម៉ង់​កុំឲ្យច្រលំ។ធ្វើម៉េចធ្វើទៅឲ្យកំពង់ចាម ក្លាយជាកន្លែងទាត់បាល់ភូមិភាគ១ ឲ្យស្កឹមស្កៃម្តងមើល»។

ជាមួយគ្នានោះដែរ ប្រមុខដឹកនាំរាជរដ្ឋាភិបាលកម្ពុជា ក៏បានអំពាវនាវឲ្យយុវជន នៅខេត្តកំពង់ចាមទាំងអស់ ចូលរួមលេង​បាល់ទាត់​ឲ្យបានគ្រប់ៗគ្នា ជៀសវាងយកពេលវេលាទៅសេពគ្រឿងញៀន។ សម្តេចតេជោ មានប្រសាសន៍យ៉ាងដូច្នេះថា «លេងកីឡា ក្មួយ ចៅៗ លេងកីឡា កុំប្រព្រឹត្តគ្រឿងញៀន កុំដើរលេងផ្តេសផ្តាស នៅក្នុងនេះមានបាល់ទាត់ បាល់បោះ បាល់ទះ និងបាល់ទាត់ទៅលេងខាងក្រៅ នាំគ្នាលេងអាហ្នឹង ប៉ុន្តែនៅតាមស្រុកតាមអី គឺគេមានតារាងគួរសម អាលូវតេជោ ចូលធ្វើហើយ កុំឲ្យច្រឡំជាមួយគេ»៕

សូមស្តាប់ប្រសាសន៍សម្តេចតេជោ ហ៊ុន សែន៖