(សេអ៊ូល)៖ មន្ត្រីការទូតជាន់ខ្ពស់កូរ៉េខាងជើងមួយរូប បានធ្វើដំណើរទៅដល់ទីក្រុងប៉េកាំងនៅថ្ងៃអង្គារនេះ ហើយដែលវាជាដំណើរទស្សនកិច្ចលើកដំបូង គិតចាប់តាំងពីខែមិថុនា ឆ្នាំ២០១៦ ធ្វើឡើងនៅបន្ទាប់ពីចិនបានសម្រេចចិត្តផ្អាកការនាំចូលធ្យូងថ្មពីទីក្រុងព្យុងយ៉ាង នៅក្នុងក្របខ័ណ្ឌនៃការអនុវត្តន៍សេចក្ដីសម្រេចដាក់ទណ្ឌកម្ម នៃក្រុមប្រឹក្សាសន្តិសុខយូអិន។ នេះបើតាមទីភ្នាក់ងារ Kyodo ដកស្រង់ដោយសារព័ត៌មាន Channel News Asia នៅរសៀលថ្ងៃអង្គារ ទី២៨ ខែកុម្ភៈ ឆ្នាំ២០១៧។
យោងតាម Kyodo អនុរដ្ឋមន្ត្រីការបរទេសកូរ៉េខាងជើង លោក រី គីលសុង (Ri Kil Song) បានធ្វើដំណើរទៅដល់ទីក្រុងប៉េកាំង ខណៈគេពុំទាន់ដឹងនៅឡើយ ពីរបៀបវារៈនៃដំណើរទស្សនកិច្ចរបស់លោក។ ក៏ប៉ុន្តែលោក រី ត្រូវបានគេរំពឹងថា នឹងជួបពិភាក្សាការងារជាមួយមន្ត្រីជាន់ខ្ពស់ចិន ស្របពេលទំនាក់ទំនងរវាង មហាមិត្តទំាងពីរកំពុងជួបភាពតានតឹង ដោយសារតែទីក្រុងប៉េកាំងបានសម្រេចចិត្តផ្អាកការនំាចូលធ្យូងថ្មពីកូរ៉េខាងជើង ដែលបានចាត់ទុកថាការសម្រេចចិត្ត បែបនេះបានបង្ហាញពីភាពមិនស្មោះត្រង់របស់ចិន និងគ្រាន់តែជាការធ្វើតាមបង្គាប់បញ្ជាទីក្រុងវ៉ាស៊ីនតោនតែប៉ុណ្ណោះ។ ដូច្នេះនៅក្នុងជំនួបជាមួយមន្ត្រីជាន់ ខ្ពស់ចិន លោក រី ទំនងជានឹងលើកយកបញ្ហានេះមកពិភាក្សា ក៏ដូចជាចង់បញ្ជាក់ឱ្យច្បាស់ពីគោលជំហរ របស់ទីក្រុងប៉េកាំង ចំពោះរបបដឹកនាំលោក គីម ជុងអ៊ុន។
គួររំលឹកថាកាលពីសប្ដាហ៍មុន នៅក្នុងបទសម្ភាសន៍ជាមួយទីភ្នាក់ងារសារព័ត៌មាន Reuters ប្រធានាធិបតីអាមេរិក លោក ដូណាល់ ត្រាំ បានជំរុញឱ្យចិនដាក់ទណ្ឌកម្មបន្ថែមប្រឆាំងនឹងកូរ៉េខាងជើង ដោយលោកថែមទំាងនិយាយទៀតថា ចិនអាចដោះស្រាយបញ្ហាកូរ៉េខាងជើង បានយ៉ាងងាយស្រួល បើសិនជាចិនចង់ធ្វើវាមែននោះ។ ទោះបីជាយ៉ាងណាទីក្រុងប៉េកាំង បានច្រានចោលការដាក់សម្ពាធពីលោក ត្រាំ ចំពោះតួនាទីរបស់ខ្លួននៅក្នុងសំណុំរឿងកូរ៉េខាងជើង ដោយបញ្ជាក់ថាបញ្ហាដែលកំពុងកើតឡើងគឺជាជម្លោះរវាងកូរ៉េខាងជើង និងសហរដ្ឋអាមេរិក៕
