(ព្រះសីហនុ)៖ ស្នងការនគរបាលខេត្តព្រះសីហនុ លោកឧត្តមសេនីយ៍ទោ ជួន ណារិន្ទ បានដាក់បទបញ្ជាដល់កម្លាំងនគរបាលសន្តិសុខ និង ប្រឆាំងភេរវកម្ម ត្រូវក្តាប់សភាពការណ៍ ប្រមូលព័ត៌មានឲ្យបានគ្រប់ជ្រុងជ្រោយ ដើម្បីមានវិធានការ បង្ការ និងទប់ស្កាត់អំពើភេរវកម្មឲ្យបានទាន់ពេលវេលា។
ការប្រកាសដាក់បទបញ្ជានេះបានធ្វើឡើង នៅពេលលោកឧត្តមសេនីយ៍ស្នងការ បើកកិច្ចប្រជុំផ្សព្វផ្សាយសេចក្តីណែនាំ របស់អគ្គស្នងការនគរបាលជាតិ ស្តីពីការ «បង្ការ និងទប់ស្កាត់អំពើភេរវកម្ម» នៅរសៀលថ្ងៃទី២៧ ខែកុម្ភៈ ឆ្នាំ២០១៧នេះ។
ឧត្តមស្នងការ បានលើកឡើង អំពីសភាពការណ៍ថ្មីៗ នៅលើសកលលោក ពិសេសអំពើភេរវកម្មអន្តរជាតិ នៅតំបន់មជ្ឈិមបូព៌ា ដែលបាន នឹងកំពុងរីករាលដាល នៅក្នុងតំបន់ និងលើសកលលោកគួរឲ្យព្រួយបារម្ភ។
លោកឧត្តមស្នងការ បានបញ្ជាក់ថា «នៅក្នុងប្រទេសកម្ពុជា មានតំបន់ប៉ូលសំខាន់ៗ៣ មានរាជធានីភ្នំពេញ ខេត្តសៀមរាប និងខេត្តព្រះសីហនុ ដែលជាមជ្ឈមណ្ឌល នយោបាយ សេដ្ឋកិច្ច ឧស្សាហកម្ម និងទេសចរណ៍ រួមមានកាស៊ីណូផងដែរ។ អីចឹងនគរបាលសន្តិសុខ និងប្រឆាំងភេរវកម្ម ត្រូវក្តាប់សភាពការណ៍ ប្រមូលព័ត៌មានឲ្យបានគ្រប់ជ្រុងជ្រោយ ដើម្បីមានវិធានការ បង្ការ និងទប់ស្កាត់អំពើភេរវកម្មឲ្យបានទាន់ពេលវេលា»៕
