(បន្ទាយមានជ័យ)៖ អាជ្ញាធរខ្មែរ-ថៃ បានចុះទៅសម្របសម្រួលបញ្ចប់ ការតវ៉ាប្រឆាំងការតម្លើងថ្លៃពន្ធនាំចូលត្រី ពីសំណាក់ភាគីថៃ ដោយកម្មករខ្មែរអូសរទេះដឹកត្រី ត្រូវបានអនុញ្ញាតិឲ្យនាំចូលត្រី ជាបណ្តោះអាសន្នសិននៅថ្ងៃនេះ តែនឹងដឹងពីការតម្លើងពន្ធរបស់ថៃ ដែលពួកគេប្រកាសនៅថ្ងៃស្អែក។
ភ្នាក់ងារ Fresh News បានរាយការណ៍ថា «ការសម្របសម្រួលនោះ គឺជាលទ្ធផល ថៃបានអនុញ្ញាតិឲ្យកម្មករអូសរទេះខ្មែរដឹកត្រី ចូលជាធម្មតាសម្រាប់ថ្ងៃនេះ និងយកពន្ធដូចពីមុន (៣០០ទៅ៤០០បាត) តែនៅថ្ងៃទី២៤ ខែកុម្ភៈ ឆ្នាំ២០១៧ ខាងថៃនឹងជូនដំណឹងថា ពួកគេនឹងយកថ្លៃប៉ុន្មានទៀតសម្រាប់ពន្ធនាំចូល»។
សូមបញ្ជាក់ថា កម្មករខ្មែរអូសរទេះដឹកត្រីប្រមាណ១០០នាក់ បានផ្ទុះការតវ៉ាយ៉ាងខ្លាំង រហូតចាក់ត្រីចោល និងយកត្រីទាំងនោះ ចៀននៅលើស្ពាន ច្រកទ្វារអន្តរជាតិប៉ោយប៉ែត នាវេលាម៉ោង១១៖៣០នាទីព្រឹកថ្ងៃទី២៣ ខែកុម្ភៈ ឆ្នាំ២០១៧នេះ ដោយសារតែពួកខឹងមន្រ្តី និងសមត្ថកិច្ចថៃ សម្រេចតម្លើងថ្ងៃពន្ធខ្លាំងពេក។
តាមកម្មករអូសរទេះ បានប្រាប់ភ្នាក់ងារ Fresh News ថា ពីមុនត្រីមួយរទេះ២០០គីឡូក្រាម សមត្ថកិច្ចថៃយកពន្ធចន្លោះពី៣០០ ទៅ៤០០បាត តែនៅពេលនេះ ស្រាប់តែយកពន្ធរហូតដល់១៥០០បាតទៅវិញ ជាហេតុនាំពួកគេផ្ទុះការតវ៉ាតែម្តង៕
