(ឧត្តរមានជ័យ)៖ ក្រោយចុះព័ត៌មានទាក់ទិននឹងក្រុមអ្នកជម្រិតទារលុយ ពីអ្នកដឹកឈើរួចមក លោក ប៉ែន នួន អ្នកយកព័ត៌មានប្រចាំខេត្តឧត្តរមានជ័យ នៅថ្ងៃទី២២ ខែកុម្ភៈ ឆ្នាំ២០១៧នេះ ត្រូវសាលាដំបូងខេត្តឧត្តរមានជ័យ កោះហៅឲ្យចូលបំភ្លឺជាលើកទី២ ពីបទចោទបរិហាកេរ្ដិ៍ ដែលដើមបណ្ដឹង ត្រូវបានគេស្គាល់ថា សកម្មខាងជម្រិតទារលុយពីអ្នកដឹកឈើ ហើយអាងខ្នងអភិបាលស្រុកអន្លង់វែង។
មូលហេតុដែលលោក ប៉ែន នួន រងនូវបណ្ដឹងខាងលើនេះ ដោយសារលោកបានចុះផ្សាយព័ត៌មានតាមការសែត និងប្រព័ន្ធ ចែកចាយព័ត៌មាន មានឈ្មោះរបស់អ្នកជម្រិតទារលុយពីអ្នកដឹកឈើខាងលើ កាលពីថ្ងៃទី១៦ ខែវិច្ឆិកា ឆ្នាំ២០១៦ កន្លងទៅ។
ដើមបណ្ដឹងមានឈ្មោះ លឹម អូ ដើរជម្រិតទារលុយពីពលរដ្ឋដឹកឈើតាមម៉ូតូអាងខ្នងពីក្រោយគឺ លោក ហោ ជិនវីរៈយុទ្ធ អភិបាលស្រុកអន្លង់វែង។
ប្រជាពលរដ្ឋរងគ្រោះម្នាក់ ឈ្មោះ រឿន អាយុជាង៣០ឆ្នាំ រស់នៅក្នុងភូមិស្រះឈូក ឃុំត្រពាំងប្រិយ ស្រុកអន្លង់វែង ខេត្តឧត្តរមានជ័យ បានរៀបរាប់ឲ្យដឹងថា កាលពីថ្ងៃទី០៨ ខែវិច្ឆិកា ឆ្នាំ២០១៦ កន្លងទៅ សកម្មជនមាន៣នាក់ ម្នាក់ឈ្មោះ តឹក រ៉ាឌូ ឈ្មោះ ផន បេនផរ និងឈ្មោះ លឹម អូ បានយករថយន្ដម៉ាកកាមរី សេរីឆ្នាំ១៩៩៥ ទៅប្រដេញម៉ូតូដឹកឈើក្រញូងរបស់គាត់ ស្ទាក់ចាប់ដោយគម្រាមឲ្យគាត់បង់ប្រាក់ចំនួន ៣០ម៉ឺនរៀល ទាំងយប់។
គាត់បានបញ្ជាក់បន្ថែមថា ស្របពេលដែលគាត់កំពុងតែអត់លុយ រត់ខ្ចីគេបង់ឲ្យទាំងយប់ ពីព្រោះគេបានដើរតួជាសមត្ថកិច្ច ដោយធ្វើការគម្រាមចាប់។ ៧ថ្ងៃក្រោយមក លោក ប៉ែន នួន បានធ្វើការចុះផ្សាយជាសាធារណៈថា ឈ្មោះ លឹម អូ ដែលអាង ខ្នងអភិបាលស្រុកអន្លង់វែងបាននាំបក្សពួក ២នាក់ខាងលើ ទៅប្ដឹងនៅទីបញ្ជាការមូលដ្ឋានស្រុកអន្លង់វែង រួចក៏ប្ដឹងទៅសាលាដំបូងខេត្តឧត្តរមានជ័យ បន្ថែមទៀត។
បើតាមការឲ្យដឹងពី លោក ហោ ជិនវរៈយុទ្ធ បានបញ្ជាក់ប្រាប់ថា លោកបញ្ជាឲ្យឈ្មោះ លឹម អូ ដើស៊ើបអង្កេតលើអ្នកនៅពី ខាងក្រោយខ្នងបទល្មើសឈើ គឺគ្មានតួនាទីអី នៅក្នុងសាលាស្រុកទេ៕
