(ភ្នំពេញ)៖ ក្នុងសន្និបាតបូកសរុបការងាររបស់ក្រសួងមហាផ្ទៃ នាថ្ងៃទី២២ ខែកុម្ភៈ ឆ្នាំ២០១៧នេះ សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានបញ្ជាក់ថា នៅឆ្នាំ២០១៦ សមត្ថកិច្ចកម្ពុជាបានស្រាវជ្រាវ ឃាត់ខ្លួន និងបណ្ដេញចេញជនអន្តោប្រវេសន៍ខុសច្បាប់ ជិត៣ពាន់នាក់។
សម្តេចក្រឡាហោម បានថ្លែងថា «ឆ្នាំ២០១៦ ចំពោះការងារអន្តោប្រវេសន៍ បានបង្កើតការគ្រប់គ្រងជនបរទេស, បង្កើតគ្រប់គ្រងការចេញចូលឆ្លងកាត់ព្រំដែន និងពង្រឹងការគ្រប់គ្រងជនអន្តោប្រវេសន៍ ដោយធ្វើបច្ចុប្បន្នភាពជនអន្តោប្រវេសន្ត ដោយបន្តពិនិត្យនូវឯកសារ លិខិតស្នាម ដែលជនអន្តោប្រវេសន៍ កំពុងកាន់កាប់ ពិសេសការកាន់កាប់ឯកសារ លិខិតស្នាមមិនស្របច្បាប់ ក្រោមរូបភាពផ្សេងៗ»។
សម្ដេចក្រឡាហោមបានបន្តថា ដើម្បីបង្កភាពងាយស្រួលក្នុងការគ្រប់គ្រង និងការផ្ដល់បណ្ណស្នាក់នៅអចិន្ត្រៃយ៍ តាមប្រព័ន្ធអេឡិចត្រូនិច ដល់ជនបរទេសអន្តោប្រវេសន៍ អគ្គនាយកដ្ឋានអន្តោប្រវេសន៍ កំពុងរៀបចំប្រព័ន្ធទិន្នន័យជនបរទេសអន្តោប្រវេសន៍ទាំងអស់ ដែលកំពុងស្នាក់នៅកម្ពុជា ការបញ្ចូលទិន្នន័យមុខសញ្ញា ទៅក្នុងប្រព័ន្ធគ្រប់គ្រងមុខសញ្ញា។
សម្តេច ស ខេង បានបញ្ជាក់ទៀតថា កងកម្លាំងនគរបាលអន្តោប្រវេសន៍ បានសហការជាមួយកងកម្លាំងសមត្ថកិច្ច និងអាជ្ញាធរគ្រប់លំដាប់ថ្នាក់ ចុះស្រាវជ្រាវ ឃាត់ខ្លួន និងបណ្ដេញជនអន្តោប្រវេសន៍ខុសច្បាប់ ចេញពីកម្ពុជា «ជិត៣,០០០នាក់» ក្នុងឆ្នាំ២០១៦ កន្លងទៅ៕
