(ប៉ៃលិន)៖ លោកឧត្តមសេនីយ៍ត្រី ជា ចាន់ឌិន ស្នងការនគរបាលខេត្តប៉ៃលិន នៅព្រឹកថ្ងៃទី២១ ខែកុម្ភៈ ឆ្នាំ២០១៧ បានឲ្យដឹងថា កម្លាំងនគរបាលប្រឆាំងបទល្មើសគ្រឿងញៀន របស់លោក បានចុះបង្ក្រាបករណីប្រើប្រាស់ និងរក្សាទុកនូវសារធាតុញៀនខុសច្បាប់ចំនួនមួយកន្លែង ដោយឃាត់ខ្លួនជនសង្ស័យបានចំនួន០៦នាក់ រួមនិងវត្ថុតាងថ្នាំញៀនប្រភេទមេតំហ្វេតាមីនICE ចំនួន១០កញ្ចប់ នៅចំណុចខាងក្រោយការ៉ាស់សាំង LSC ស្ថិតក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន។
លោកស្នងការខេត្តបានបញ្ជាក់ថា ជនសង្ស័យទាំងនោះរួមមានឈ្មោះ១- វណ្ណា តុលា អាយុ២១ឆ្នាំ ២-បាន សុភ័ក្រ អាយុ២១ឆ្នាំ ៣-កន ភារម្យ អាយុ ២១ឆ្នាំ ៤- ញ៉ែម ពិសី ភេទស្រី អាយុ១៧ឆ្នាំ ៥-ឡុង សុខភី អាយុ២២ឆ្នាំ និង៦-ហែម មករា អាយុ២១ឆ្នាំ។
បច្ចុប្បន្នសមត្ថកិច្ចជំនាញកំពុងសាងសំណុំរឿងជនសង្ស័យ និងវត្ថុតាងខាងលើបញ្ជូន ទៅកាន់សាលាដំបូងខេត្តចាត់ការតាមនិតិវិធីច្បាប់៕
