(ភ្នំពេញ)៖ ក្រុមហ៊ុន​Kerry Worldbridge Logistics និងក្រុមហ៊ុន InSITE BAVARIA របស់អាល្លឺម៉ង់ បានចាប់ដៃសហការគ្នា ដើម្បីអភិវឌ្ឍន៍វិស័យឧស្សាហកម្មនៅកម្ពុជា ពិសេស តំបន់សេដ្ឋកិច្ចពិសេសថ្មីមួយ ដែលមានទំហំដីដ៏ធំគឺ ឃេរី វើលដ៏ប្រ៊ីជ ឡូជិស្ទីក( Kerry Worldbridge Logistics ) ដែលស្ថិតនៅលើទឹកដី រាធានីភ្នំពេញ ហើយជឿជាក់ថា នឹងទទួលបាន​ការចាប់​អារម្មណ៍ខ្ពស់ ពីសំណាក់អ្នកវិនិយោគិន ក្នុងស្រុក និងក្រៅស្រុក កាន់តែច្រើនបន្ថែមទៀត។

លោក​ឧកញ៉ា សៀ ឬទ្ធី ប្រធានក្រុមហ៊ុនប្រឹក្សា​ភិបាល​ក្រុមហ៊ុន Worldbridge Group និងជាអគ្គនាយកក្រុមហ៊ុន Kerry Worldbridge Logistics បានថ្លែងថា​ដើម្បីទាក់ទាញ​វិនិយោគិន បន្ថែម​ពីបរទេស និងវិនិយោគិន​ក្នុងស្រុក ក្រុមហ៊ុនយើងទាំងពីរ បានចុះហត្ថលេខា យោគយល់គ្នានៅទី២០ ខែកុម្ភៈនេះ​ក្នុងការចាប់ដៃគ្នា ដើម្បីអភិវឌ្ឍន៍វិស័យឧស្សាហកម្មនៅកម្ពុជា ក្នុងតំបន់សេដ្ឋកិច្ច​ពិសេស Kerry Worldbridge មានលក្ខណៈពិសេស​ខុសពីតំបន់សេដ្ឋកិច្ច​ពិសេសផ្សេងៗ​ ហើយកាលណា​បើនិយាយពីតំបន់សេដ្ឋកិច្ចពិសេស គឺមានទំហំដីធំៗ តែ Kerry Worldbridge មានទំហំតែជាង​៦៣ហិចតាទេ  ។

លោកបន្ដថា «យើងចង់ឱ្យ​អ្វីៗទាំងអស់ នៅក្នុងតំបន់សេដ្ឋកិច្ចពិសេសរបស់យើង ហើយយើងមិនចង់ឱ្យអ្នកវិនិយោគ ដែលបង្កើតរោងចក្រឬផលិត នៅក្នុងតំបន់សេដ្ឋកិច្ចពិសេស​មានភាពខ្វាយខ្វល់ ដូចជា​ដឹកជញ្ជូន ឬមធ្យោបាយ​នាំចេញនាំចូលនោះទេ គឺយើងមានជាដំណោះស្រាយ​ជូនពួកគាត់ស្រាប់ ដូចនេះនៅពេលអ្នកវិនិយោគចូលមក ពួកគាត់ដឹងតែពីការផលិតដោយមិនបាច់ខ្វល់​រឿងការងារ​ផ្សេងៗនោះទេ»

លោកបន្តថា «ការចាប់ដៃជាមួយ ក្រុមហ៊ុន អាល្លឺម៉ង់ InSITE BAVARIA នេះ គឺដើម្បីធ្វើកិច្ចការទាំងឡាយ ដែលសម្រួលដល់អ្នកវិនិយោគ ដែលមកបណ្ដាក់ទុន នៅកម្ពុជា ពិសេសក្នុងតំបន់សេដ្ឋកិច្ច Kerry Worldbridge Logistics ផ្ទាល់តែម្ដង ដូច្នេះ កិច្ចសហការនេះ ជាការគិតគូរ​ពីដំណោះស្រាយទាំងអស់ ចំពោះវិនិយោគិន ដែលចូលមកវិនិយោគ​ ក្នុងតំបន់សេដ្ឋកិច្ចរបស់យើង ហើយ InSITE BAVARIA គឺធ្វើកិច្ចការ ដែលស្របជាមួយគោលនយោបាយ​របស់រាជរដ្ឋាភិបាល ព្រោះពួកយើងចង់បានការផលិតដែលមានរយៈពេលវែង​ នៅក្នុងតំបន់សេដ្ឋកិច្ចពិសេសរបស់យើង ម្យ៉ាងទៀត​កា​រចុះហត្ថលេខាជាមួយ InSITE BAVARIA នេះ ដើម្បីរៀនពីគ្នា និងសហការគ្នា​នាំអ្នកវិនិយោគ​ចូលមកក្នុងតំបន់សេដ្ឋកិច្ចពិសេសរបស់យើង»

លោក​Daniel A. Gottschald នាយកគ្រប់គ្រង​ក្រុមហ៊ុន InSITE BAVARIA បានថ្លែងផងដែរថា «កិច្ចសហការប្រតិបត្តិការ​ជាមួយ ឃើរី វើល​ដ៏ប្រ៊ីជ អាចជំរុញឱ្យសេដ្ឋកិច្ចកម្ពុជាខ្លាំងឡើង ដោយផ្ដល់​ជូននូវឱកាស​អាជីវកម្ម​ថ្មីទាំងសម្រាប់ក្រុមហ៊ុនអាល្លឺម៉ង់ និងក្រុមហ៊ុន នៅក្នុងប្រទេសកម្ពុជាផងដែរ ពិេសស នៅពាសពេញ​ពិភពលោក គម្រោងរបស់យើង បានបង្ហាញឱ្យឃើញថា យុទ្ធសាស្ត្របង្កើត​ជាក្រុម​ប្រកបដោយនិរន្តរភាព រួមបញ្ចូលទាំងគម្រោង​គ្រប់គ្រងសាកលវិទ្យាល័យ កីឡាករ​សកល​និងអ្នកផ្ដល់សេវាបច្ចេកវិទ្យាតូច និងមធ្យមបង្កើតឲ្យមានការ​វិនិយោគ​ដ៏មានឥទ្ធិពលពិតប្រាកដ និងនាំមកនូវការងារ និងជីវភាពរស់នៅសមរម្យ ដល់ប្រជាជន »

ទន្ទឹមនឹងនោះ លោក​Ingo Karsten អគ្គរដ្ឋទូតសាធារណៈរដ្ឋ​អាល្លឺម៉ង់ប្រចាំកម្ពុជា បានលើកឡើងផងដែរថា វត្តមាន​ម៉ាកសញ្ញាផលិតផល​របស់អាល្លឺម៉ង់​ នៅលើទឹកដីប្រទេសកម្ពុជា​ចាប់ផ្ដើមមានច្រើន នៅក្នុងរយៈពេល​ពីរបីឆ្នាំចុងក្រោយនេះ តែវិយោគិន​អាល្លឺម៉ង់​នៅកម្ពុជា នៅមិនទាន់មានច្រើនប៉ុន្មានទេ ដូចនេះការចាប់ដៃរវាងក្រុមហ៊ុនអាល្លឺម៉ង់ និងកម្ពុជា​នៅពេលនេះ​រំពឹងថា​វិនិយោគិន​អាល្លឺម៉ង់ នឹងចាប់ផ្ដើមបណ្ដាក់ទុន​នៅក្នុងប្រទេសកម្ពុជា​កាន់តែច្រើន ។

លោក Tassilo Brinzer ប្រធានក្រុមពាណិជ្ជកម្ម​អាល្លឺម៉ង់ ប្រចាំកម្ពុជា បានឱ្យដឹងដែរថា « ជាការពិតណាស់​យើងពិតជាមានភាពរីករាយ​ក្នុងការបង្កើត​បានកិច្ចព្រមព្រៀង សហប្រតិបត្តិការ​ យ៉ាងសំខាន់​ក្នុងប្រទេសកម្ពុជា។ វាជាលើកដំបូងហើយ ដែលអង្គការ​អាល្លឺម៉ង់​មួយដ៏មាន​អានុភាព កំពុងពិចារណាចូលរួម​ក្នុងទីផ្សារ​រីកចម្រើន​យ៉ាងលឿន​របស់កម្ពុជា  ហើយវាជាសញ្ញា​នៃទំនុកចិត្ត​នៅក្នុងសេដ្ឋកិច្ច​កម្ពុជា និងជាការ​អភិវឌ្ឍន៍​គួរឱ្យកត់សម្គាល់​ សម្រាប់សហគមន៍ ពាណិជ្ជកម្ម​អាល្លឺម៉ង់នៅកម្ពុជាទាំងមូលទៀតផង »