(ភ្នំពេញ)៖ នៅព្រឹកថ្ងៃទី២៣ ខែកុម្ភៈ ខាងមុខនេះ សាលាដំបូងរាជធានីភ្នំពេញ នឹងបើកសវនាការកាត់ទោស អ្នកស្រី ទេព វន្នី តំណាងសហគមន៍បឹងកក់ ពាក់ព័ន្ធបទល្មើសហិង្សាដោយចេតនាមានស្ថានទម្ងន់ទោស ។ នេះបើតាមការបញ្ជាក់ដោយមន្រ្តីតុលាការ។
សវនាការនេះ នឹងដឹកនាំដោយ លោក ឡុង កេសភីរម្យ ជាចៅក្រមជំនុំជម្រះ និង លោក សៀង សុខ ព្រះរាជអាជ្ញារង ជាតំណាងអយ្យការ។
មន្ត្រីអនុរក្សពន្ធនាគារព្រៃស (ម២) បញ្ជាក់ថា ក្រុមមន្ត្រីនឹងបញ្ជូនលោកស្រី ទេព វន្នី ចូលរួមសវនាការ។ រឿងក្ដីនេះ សាក្សី៣រូបក៏ត្រូវបានតុលាការកោះហៅចូលរួមសវនាការផងដែរ ក្នុងនោះមាន លោកស្រី ង៉ែត ឃុន ហៅយាយម៉ាប់មី លោកស្រី គង់ ចន្ថា និង លោកស្រី បូ ឆវី ។
សូមបញ្ជាក់ថា អ្នកស្រី ទេព វន្នី ត្រូវបានតុលាការចោទពីបទហិង្សាដោយចេតនាមានស្ថានទម្ងន់ទោស ប្រព្រឹត្តនៅក្បែរវិមានឯករាជ្យ សង្កាត់ទន្លេបាសាក់ ខណ្ឌដូនពេញ រាជធានីភ្នំពេញ កាលពីថ្ងៃទី១៣ ខែមីនា ឆ្នាំ២០១៣៕
