(ព្រៃវែង)៖ កម្លាំងកងរាជអាវុធហត្ថខេត្តព្រៃវែងដឹកនាំដោយ លោកវរសេនីយ៍ត្រី ផាត់ សុជោត ប្រធានមន្ទីរយុត្តិធម៌ ក្រោមបញ្ជាផ្ទាល់ពីលោក ឧត្ដមសេនីយ៍ត្រី ម៉ែន ស៊ីប៊ន មេបញ្ជាការអាវុធហត្ថខេត្ត និងមានការសម្របសម្រួលពី លោក មាស សុភក្តិ ព្រះរាជអាជ្ញានៃអយ្យការអមសាលាដំបូងខេត្ត បានចុះប្រតិបត្តិការ បង្ក្រាបបទល្មើសចែកចាយគ្រឿងញៀន ដោយឃាត់ខ្លួនជនសង្ស័យចំនួន២នាក់ ព្រមទាំងដកហូតបានម៉ូតូចំនួន២គ្រឿង ថ្នាំញៀនចំនួន៤កព្ចាប់ និងសម្ភារមួយចំនួនទៀត។

ការចុះប្រតិបត្តិការបង្ក្រាបបទល្មើសចែកចាយគ្រឿងញៀនខាងលើនេះ បានធ្វើឡើងកាលពីវេលាម៉ោង០៣៖២៥នាទី រសៀលថ្ងៃទី១៩ ខែកុម្ភៈ ឆ្នាំ២០១៧ នៅចំណុចរង្វង់មូល ទួលបារាយណ៍អណ្តែត ស្ថិតក្នុងភូមិ​បារាយរណ៍លិច​ សង្កាត់​បារាយរណ៍​ ក្រុងព្រៃវែង​ ខេត្ត​ព្រៃវែង និងនៅ​ចំណុច​ភូមិ​ថ្គូវ​ ឃុំ​មេបុណ្យ​ ស្រុក​ស្វាយអន្ទរ​ ខេត្ត​ព្រៃវែង។​

ជនសង្ស័យទាំង២នាក់នេះ ឈ្មោះ លន់​ ឆឺន​ ភេទ​ប្រុស​ អាយុ​៣៤ឆ្នាំ​ រស់នៅភូមិ​បារាយរណ៍លិច​ សង្កាត់​បារាយណ៍​ ក្រុង​ព្រៃវែង​ ខេត្ត​ព្រៃវែង និងម្នាក់ទៀតឈ្មោះ លាប វណ្ឌី​ ភេទ​ប្រុស​ អាយុ​២៩ឆ្នាំ​ រស់​នៅ​ភូមិ៨ ​សង្កាត់​កំពង់លាវ​ ក្រុង​ព្រៃវែង​ ខេត្ត​ព្រៃវែង។ វត្ថុតាងរួមមាន៖ ម្សៅក្រាមពណ៍ស​ចំនួន០៤កញ្ចប់ ទូរសព្ទ័ដៃចំនួន​០២គឿង​ ម៉ូតូ​ម៉ាក​ហុងដា​សេរី​២០១៥​ ចំនួន០១គ្រឿង និងម៉ូតូ​សណ្ដោងរម៉ក០១​គ្រឿង។

បច្ចុប្បន្ន ​ជនសង្ស័យទាំង២នាក់ រួមទាំងវត្ថុតាងត្រូវបានអាវុធហត្ថ​ខេត្តព្រៃវែង ឃាត់ខ្លួនដើម្បីកសាងសំណុំរឿងតាមនីតិវិធី៕