(កំពង់ធំ)៖ ជនឆបោកម្នាក់ត្រូវ បានកម្លាំងអាវុធហត្ថខេត្តកំពង់ធំ ចាប់វាយខ្នោះបញ្ជូនទៅតុលាការ បន្ទា​​ប់ពីជននេះ បានយកឈ្មោះ ព្រះរាជអាជ្ញាអមសាលាដំបូងខេត្តកំពង់ធំ លោក អ៊ិត​ សុធា និងព្រះរាជអាជ្ញារងរបស់លោក ​យកគំរាមទារយកលុយពីប្រជាពលរដ្ឋ ពាក់ព័ន្ធ នឹងបទល្មើសមួយចំនួន។

ជនឆបោករូបនេះ ត្រូវបានចៅក្រមសាលាដំបូងខេត្តកំពង់ធំ សម្រេចឃុំខ្លួនដាក់ពន្ធនាគារហើយនៅថ្ងៃទី១៩ ខែកុម្ភៈ ឆ្នាំ២០១៧ បន្ទា​ប់ពីសួរនាំចប់ និងបន្ទាប់ពីមានការចោទប្រកាន់ ពីតំណាងអយ្យការមកនោះ។

នៅថ្ងៃទី២០ ខែកុម្ភៈ ឆ្នាំ២០១៧នេះ លោក អ៊ិត សុធា បានថ្លែងប្រាប់អង្គភាព Fresh News ឲ្យដឹងថា «ជននេះត្រូវបានឃុំខ្លួនហើយ តាំងពីម្សិលមិញ ដែលបានយកឈ្មោះខ្ញុំ និងព្រះរាជអាជ្ញារងរបស់ខ្ញុំ ទៅបោកយកពីប្រជាពលរដ្ឋ ដែលមើលទៅជនរងគ្រោះនោះ មានចំណុចខ្សោយណាមួយ។ ឧទាហរណ៍ ដូចជា បើប្រជាពលរដ្ឋទាំងនោះ មានការជាប់ពាក់ព័ន្ធបទល្មើស ជនឆបោកបានទៅប្រាប់ និងទារលុយ តែបើមិនឲ្យនឹងគំរាមថា ប្រាប់ព្រះរាជអាជ្ញា និងសមត្ថកិច្ចមកចាប់ខ្លួន»។

បើតាមលោកព្រះរាជអាជ្ញា នេះជាលើកទី១ហើយ ដែលមានជនឆបោកបានយកឈ្មោះរបស់លោក ទៅយកលុយពីប្រជាពលរដ្ឋ ប៉ុន្តែកាលពីពេលក​ន្លងទៅក៏មានជនសង្ស័យខ្លះទៀត បានយកឈ្មោះថ្នាក់ដឹកនាំខេត្ត និងសមត្ថកិច្ចទៅបោកលុយប្រជាពលរដ្ឋផងដែរ។

សូមបញ្ជាក់ថា ព្រះរាជអាជ្ញាអម​សាលា​ដំបូង​ខេត្តកំពង់ធំ​ បានបញ្ជាឲ្យកម្លាំងកងរាជអាវុធហត្ថ ឃាត់ខ្លួន​ជន​សង្ស័យ​ម្នាក់​ដែល​យកឈ្មោះរបស់លោក ដើរទៅ​គំរាមគំហែងទារលុយ​ពី ប្រ​ជា​​ពលរដ្ន​ចំនួន​៥០០ដុល្លារ ជាថ្នូរ និង​ការមិនចាប់ខ្លូន​កូន ដែលធ្លាប់លួចប្រើប្រាស់ថ្នាំញៀន​កន្លង​មក។ ការឃាត់ខ្លួននេះ បានធ្វើឡើងនៅថ្ងៃទី១៨ ខែកុម្ភៈ ឆ្នាំ២០១៧ នៅនិង​ផ្ទះជនរងគ្រោះតែម្ដងក្នុងភូមិបល្ល័ង្គ សង្កាត់ដំរីជាន់ខ្លា ក្រុងស្ទឹងសែន ខេត្តកំពង់ធំ។

ជនសង្ស័យឈ្មោះ ហ៊ុង ហេន អាយុ៤៤ឆ្នាំ រស់នៅក្រុងស្ទឹងសែន ខេត្តកំពង់ធំ ហើយជននេះតែងតែបោកលុយពីប្រជាពលរដ្ឋជាញឹកញ៉ាប់ តាមរូបភាពផ្សេងៗ៕