(ឧត្តរមានជ័យ)៖ លោកស្រី ហ៊ុន ម៉ាណា ប្រធានមូលនិធិបាយ័ន នៅព្រឹកថ្ងៃទី១៩ ខែកុម្ភៈ ឆ្នាំ២០១៧នេះ បានចុះសួរសុខទុក្ខប្រជាពលរដ្ឋ និងប្រគល់ផ្ទះទេវតាមួយខ្នង ជូនលោកតា អ៊ុំ ហាន់ អាយុ៨៨ឆ្នាំ និងលោកយាយ ជួន សារេត អាយុ៨៧ឆ្នាំ ដែលរស់នៅភូមិអំពិលថ្មី ឃុំអំពិល ស្រុកបន្ទាយអំពិល ខេត្តឧត្តរមានជ័យ។
ក្នុងឱកាសនោះ ក៏មានការចូលរួមពី លោក ស ថាវី អភិបាលខេត្ត លោក យឹម ធិន ប្រធានក្រុមប្រឹក្សាខេត្ត មន្ត្រីរាជការជុំវិញខេត្ត-ស្រុក លោកគ្រូ អ្នកគ្រូ លោកយាយ លោកតា សិស្សានុសិស្ស ជាច្រើននាក់ផងដែរ។
ក្រៅពីផ្ទះមួយខ្នងជូនលោកតា អ៊ុំ ហាន់ អាយុ៨៨ឆ្នាំ និងលោកយាយ ជួន សារេត អាយុ៨៧ឆ្នាំ លោកស្រី ហ៊ុន ម៉ាណា បានឧបត្ថម្ភបន្ថែមនូវ អង្ករ២ការ៉ុង មី៥កេះ ទឹកស៊ីអ៊ីវ៣យួរ ត្រីខ១កេស ទឹកដោះគោឆៅ១កេស និងមុង ភួយ មួយឈុត ដោយឡែកតាជី យាយជី ក្នុងម្នាក់ៗ ទទួលបានក្រម៉ា១ សារុង១៕
