(ព្រះវិហារ)៖ លោក អ៊ុន ចាន់ដា អភិបាលខេត្តព្រះវិហារ បានស្នើដល់អាជ្ញាធរក្រុង-ស្រុក និងកម្លាំងសមត្ថកិច្ចក្នុងខេត្ត មិនត្រូវចូលរួមសហការជាមួយគ្រឹះស្ថានមីក្រូហិរញ្ញវត្ថុ និងធានាគារឯកជននានា ដើរទារបំណុលពីប្រជាពលរដ្ឋ ដែលគ្មានលទ្ធភាពសងបំណុលឡើយ។
ថ្លែងក្នុងប្រជុំបូកសរុបលទ្ធផលកាងារយោធា ឆ្នាំ២០១៦ និងទិសដៅការងារយោធា ឆ្នាំ២០១៧ ក្នុងតំបន់ប្រតិបត្តិការសឹករងខេត្តព្រះវិហារ នៅរសៀលថ្ងៃទី១៧ ខែកុម្ភៈ ឆ្នាំ២០១៧ លោក អ៊ុន ចាន់ដា បានឲ្យដឹងថា ប្រមុខរាជរដ្ឋភិបាលកម្ពុជា សម្តេចតេជោ ហ៊ុន សែន បានស្នើឲ្យធានាគារជាតិ ធ្វើការត្រួតពិនិត្យឡើងវិញ ចំពោះគ្រឹះស្ថានមីក្រូហិរញ្ញវត្ថុ និងធានាគារឯកជននានា ត្រូវប្រើឈ្មោះ និងស្លាកសញ្ញាឲ្យបានច្បាស់លាស់ ព្រោះកន្លងមកមានមតិរបស់ប្រជាពលរដ្ឋយល់ច្រឡំថា «ប្រជាពលរដ្ឋជំពាក់លុយរដ្ឋ ជំពាក់លុយអង្កការទៅវិញ»។
លោក អ៊ុន ចាន់ដា បានបន្តថា «ករណីប្រជាពលរដ្ឋគ្មានលទ្ធភាពសងបំណុលបែរជាសមត្ថកិច្ចយើងចូលរួមសហការជាមួយគេ តែធាតុពិតលុយរបស់គេសោះ ដល់ពេលអាក្រក់ឈ្មោះសមត្ថកិច្ច និងអាជ្ញាធរយើង ជាអ្នកទទួលទៅវិញ»។ ត្រង់ចំណុចនេះ លោកអភិបាលខេត្ត បានសំណូមពរឲ្យអាជ្ញាធរក្រុង-ស្រុក ត្រូវធ្វើការផ្សព្យផ្សាយឲ្យបានទូលំទូលាយ ដើម្បីមានការជ្រួតជ្រាបដល់ប្រជាពលរដ្ឋ។
នៅក្នុងឱកាសនោះ លោក អ៊ុន ចាន់ដា ក៏បានសំណូមពរឲ្យអាជ្ញាធរ និងសមត្ថកិចពាក់ព័ន្ធក្នុងខេត្ត ត្រូវធ្វើការចូលរួមទប់ស្កាត់ការកាប់បំផ្លាញព្រៃឈើ បទល្មើសធនធានរ៉ែ បទល្មើសគ្រឿងញៀន និងបទល្មើសផ្សេងៗទៀត ឲ្យមានប្រសិទ្ធភាព៕
