(កំពង់ធំ)៖ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រមហកម្ពុជា នៅថ្ងៃទី១៥ ខែកុម្ភៈ ឆ្នាំ២០១៧ បានប្រគល់ផ្ទះថ្មីចំនួន១១ខ្នង ជូនទៅដល់ស្រ្ដីមេម៉ាយ និងចាស់ជរាទីទ័លក្រ ដែលគ្មានលំនៅដ្ឋានក្នុងភូមិ៣ ឃុំទីពោធិ៍ ស្រុកសន្ទុក ខេត្តកំពង់ធំ។
ផ្ទះថ្មីទាំង១១ខ្នងនេះ ត្រូវបានផ្ដល់ជូនជាផ្លូវការដោយលោកស្រី ខៀវ ស៊ីណា អនុប្រធានកិត្តិយសសាខាកាកបាទក្រហម
កម្ពុជាខេត្តកំពង់ធំ ជូនទៅដល់ស្រ្ដីមេម៉ាយ និងចាស់ជរា។ ការប្រគល់អំណោយនេះសរបញ្ជាក់ពីទឹកចិត្តស្មោះសរ ការគោរពអាណិត ស្រលាញ់ចំពោះ អ្នកស្រុកភូមិ ប្រជាពលរដ្ឋដែលជួបប្រទះភាពក្រីក្រ របស់សម្ដេចកត្តិព្រឹទ្ធបណ្ឌិត។
ផ្ទះទាំង១១ខ្នងនេះ ត្រូវបានប្រគល់ឲ្យអ្នកភូមិចំនួន៣រួមមាន៖ ភូមិសែនអភិវឌ្ឍន៍១, ភូមិសែនអភិវឌ្ឍន៍២, និងភូមិអូរធំ ដែលស្ថិតនៅក្នុងតំបន់ដីសម្បទាន សង្គមកិច្ច ក្នុងឃុំពោធិ៍ ស្រុកសន្ទុក ខេត្តកំពង់ធំ ដោយមានការនិមន្តចូលរួមពីសម្ដេចឧត្ដមចរិយាបណ្ឌិត ឈឹង ប៊ុនឈា សមាជិកថេរសភាសង្ឃនៃ ព្រះរាជាណាចក្រកម្ពុជា និងព្រះញ្ញាណវង្ស ឃឹម សន ព្រះមរគណរាជធានីភ្នំពេញផងដែរ។
ជាមួយនឹងការប្រគល់ផ្ទះថ្មីនេះដែរ សម្ដេចកិត្តិព្រឹទ្ធបណ្ឌិត ក៏បានផ្ដល់អំណោយ ដល់គ្រួសារដែលទទួលបានផ្ទះថ្មីទាំង១១គ្រួសារ ផងដែរ ក្នុងមួយគ្រួសារៗទទួលបាន៖ អង្ករ, មី, ស្កស, ទឹកត្រី, ទឹកស៊ីអ៊ីវ ,ទឹកសុទ្ធ, ប៊ីចេង, ថ្នាំពេទ្យ, សំម្លៀកបំពាក់ និងថវិកា២០ម៉ឺនរៀល ព្រមទាំងបានផ្ដល់ជូនថ្នាំពេទ្យ និងថវិកាមួយចំនួន ជូនដល់លោកយាយ លោកតា សិស្សានុសិស្សនិងអ្នកចូលរួមផងដែរ។
សូមរំលឹកថា កាលពីថ្ងៃទី២០ ខែធ្នូ ឆ្នាំ២០១៦ ផ្ទះ៤៥ខ្នង ក៏ត្រូវបានសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ផ្ដល់ជូនប្រជាពលរដ្ឋងាយរងគ្រោះ ជាស្ត្រីមេម៉ាយ និងចាស់ជរា ផងដែររស់នៅភូមិ៣ គឺភូមិសែន អភិវឌ្ឍន៍១, ភូមិសែនអភិវឌ្ឍន៍២និង ភូមិអូរធំ ស្ថិតក្នុងតំបន់ដីសម្បទានសង្គមមកិច្ច ក្នុងឃុំពោធិ៍ ស្រុកសន្ទុក ខេត្តកំពង់ធំតាមរយៈ លោកស្រី ខៀវ ស៊ីណា អនុប្រធានកិត្តិយសសាខាកាកបាទក្រហមកម្ពុជាខេត្តកំពង់ធំ។
លោក ឆាយ យូ មេឃុំទីពោធិ៍បានបញ្ជាក់ថា តំបន់ដីសម្បទានសង្គមកិច្ច ក្នុងឃុំពោធិ៍ ដែលប្រជាពលរដ្ឋបាន និងកំពុងស្នាក់នៅនាបច្ចុប្បន្ននេះ មានប្រជាពលរដ្ឋដែល ទទួលបានដីសម្បទានសង្គមកិច្ច និងកំពុងរស់នៅក្នុងភូមិទាំង៣នេះ មានចំនួន៤៤៧០នាក់ ស្មើនឹង៧៧៩គ្រួសារ ហើយភូមិទាំង៣នេះ ក៏បានទទួលស្គាល់ស្របច្បាប់ពីក្រសួងមហាផ្ទៃកាលពីថ្ងៃទី១២ ខែតុលា ឆ្នាំ២០១០។
សូមបញ្ជាក់ថាគិតចាប់ពីឆ្នាំ២០០៨ មកដល់ត្រឹមបំណាច់ឆ្នាំ២០១៦ តាមរយៈលោកស្រី ខៀវ ស៊ីណា សម្ដេចកិត្តិព្រឹទ្ធបណ្ឌិតបានជួយសាងសង់ផ្ទះជូនប្រជាពលរដ្ឋ ក្រីក្រ ចាស់ជរា និងគ្រួសារស្ត្រីមេម៉ាយនៅក្នុងស្រុកសន្ទុក រាប់បញ្ជូលទាំង៤៥ខ្នង នៅតំបន់ភូមិអភិវឌ្ឍន៏នេះ គឺមានចំនួន២៦៨ខ្នងហើយ៕
