(ភ្នំពេញ)៖ លោក អ៉ិត សំហេង រដ្ឋមន្រ្តីក្រសួងការងារ និងបណ្ដុះបណ្ដាលវិជ្ជាជីវៈ បានប្រកាសជំរុញឲ្យកម្លាំងសមត្ថកិច្ចពាក់ព័ន្ធ ត្រូវតាមចាប់អ្នកនៅពីក្រោយខ្នង ករណីកម្មកររោងចក្រជុងហ្វៃ នៅថ្ងៃនេះឲ្យខាងតែបាន ដែលនាំគ្នាបិត​ផ្លូវជាតិលេខ២ នៅសង្កាត់​ចាក់អង្រែក្រោម ខណ្ឌ​មានជ័យ នៅថ្ងៃទី១៤ ខែកុម្ភៈ ឆ្នាំ២០១៧ ម្សិលម៉ិញ ដើម្បីយកមកផ្ដន្ទាទោសតាមច្បាប់ជាកំហិត។

បញ្ជាដ៏ម៉ឺងម៉ាត់នេះ ត្រូវបានលោករដ្ឋមន្រ្តីលើកឡើងក្នុងពិធីសន្និបាតបូកសរុបការងារ ឆ្នាំ២០១៦ និងលើកទិសដៅការងារ ឆ្នាំ២០១៧ នាព្រឹកថ្ងៃទី១៥ ខែកុម្ភៈ ឆ្នាំ២០១៧ នៅទីស្ដីការក្រសួងការងារ។

លោករដ្ឋមន្រ្តី អ៉ិត សំហេង បានសង្កត់ធ្ងន់ថា «អ្វីដែលជារឿងខុសច្បាប់ បិតផ្លូវនេះ ត្រូវតែរកមុខឲ្យឃើញ ដូចពីម្សិលម៉ិញ បិទផ្លូវអីហ្នឹង គឺថាអត់បានទេ ត្រូវតែរកឲ្យឃើញនៅថ្ងៃនេះ បើមិនឃើញរកបន្តទៀត ត្រូវស្រាវជ្រាវឲ្យឃើញមុខអ្នកដែលបង្ករឿងហ្នឹង ហើយចាត់វិធានការទៅតាមច្បាប់»។

សូមជម្រាបថា នៅព្រឹកថ្ងៃទី១៤ ខែកុម្ភៈ ម្សិលម៉ិញ កម្មករ-កម្មការិនីរោងចក្រជុងហ្វៃ ស្ថិតនៅតាមផ្លូវជាតិលេខ២ សង្កាត់ចាក់អង្រែក្រោម ខណ្ឌមានជ័យ បាននាំគ្នាមកឈរបិតផ្លូវជាតិតែម្តង បណ្តាលឲ្យមានការកកស្ទះចរាចរណ៍យ៉ាងខ្លាំង ដល់ប្រជាពលរដ្ឋទូទៅដែលធ្វើដំណើរឆ្លងកាត់។

ភ្នាក់ងារ Fresh News បានរាយការណ៍ថា មូលហេតុដែលនាំក្រុមកម្មករបិតផ្លូវ គឺពួកគេទាមទារឲ្យថៅកែរោងចក្រផ្តល់​ប្រាក់សំណង ក្រោយរោងចក្រក្ស័យធន់ ហើយមិនទាន់មានដំណោះស្រាយ។

ជាមួយនឹងការបិតផ្លូវនេះ ក៏មានការប៉ះទង្គិចរវាងអ្នកដំណើរ ជាមួយក្រុមកម្មករផងដែរ ហើយកម្លាំងសមត្ថកិច្ច និងអាជ្ញាធរក៏បានកំពុងចេញជួយសម្រួលចរាចរណ៍ដែរ៕