(ភ្នំពេញ)៖ កាសែតអាមេរិកាំងឈ្មោះ Daily News នៅទីក្រុងញូវយ៉កបានចេញផ្សាយនៅថ្ងៃសុក្រ ទី០១ ខែឧសភា ឆ្នាំ១៩៧០ ដោយដាក់ចំណងជើងធំៗថា «Nixon Sends GIs into Cambodia ឬមានន័យថា ប្រធានាធិបតីអាមេរិក និចសុន បញ្ជូនកងទ័ពអន្តរាគមន៍ពិសេស (GIs) ទៅកាន់ប្រទេសកម្ពុជា»។
កងទ័ពអន្តរាគមន៍ពិសេសរបស់អាមេរិករាប់ពាន់នាក់ បានឆ្លងកាត់ព្រំដែនវៀតណាម-កម្ពុជា ដោយទទួលបានបទបញ្ជាភ្លាមៗពីប្រធានាធិបតទី៣៧របស់អាមេរិក លោក រីឆាដ និចសុន (Richard Nixon) ទាំងយប់ក្នុងការចូលវាយប្រហារ និងទម្លាក់គ្រាប់បែកកម្ទេចទីស្នាក់ការសំខាន់ៗ ដែលមានជម្រៅជាង៣០គីឡូម៉ែត្រ ចូលទៅក្នុងទឹកដីកម្ពុជា។ កងកម្លាំងអាមេរិក នឹងធ្វើប្រតិបត្តិការនៅក្នុងទឹកដីកម្ពុជាពីចម្លោះ០៦ ទៅ ០៨សប្តាហ៍។
លោកស្រី អេលីហ្សាបេត បេឃើ (Elizabeth Becker) ជាអ្នកកាសែត និងជាអ្នកនិពន្ធអាមេរិក ដែលបានចុះផ្សាយ និងរៀបរាប់លម្អិតអំពីសង្រ្គាមអាមេរិកទម្លាក់គ្រាប់បែកនៅកម្ពុជាក្នុងឆ្នាំ១៩៧៣ បាននិយាយថា៖ «រដ្ឋាភិបាលអាមេរិកមិនដែលទទួលខុសត្រូវតាមផ្លូវច្បាប់ ចំពោះការខូចខាតដ៏ធំធេង ដែលខ្លួនបានបង្កឡើងទៅលើជនស៊ីវិល និងប្រទេសកម្ពុជាអំឡុងពេលសង្រ្គាមនោះទេ»។
លោកស្រីថ្លែងថា «បើតាមការប៉ាន់ស្មាននេះ ប្រហែលជាដោយសារការព្រួយបារម្ភថា សហរដ្ឋអាមេរិកប្រហែលជាត្រូវសងសំណង សង្រ្គាមសម្រាប់ការ បំផ្លិចបំផ្លាញ និងខ្លាចអតីតមន្រ្តីអាមេរិកត្រូវគេប្តឹង» ហើយលោកស្រីបានបន្តថា ការទម្លាក់គ្រាប់បែកជាច្រើន បានធ្វើឡើងដោយគ្មានអ្នកដឹង ហើយភាគតិចណាស់ ដែលថាអាចមានការព្រមព្រៀងពីអាជ្ញាធរកម្ពុជា។
លោកស្រីបានថ្លែងបន្តថា «ការបន្តចាប់ឲ្យកម្ពុជាទទួលខុសត្រូវតាមផ្លូវច្បាប់ចំពោះបំណុលចាស់ ក្នុងសង្រ្គាមគឺជាការលាក់ពុតត្បុត និងអសីលធម៌»។ ប្រសិនបើមានការសងបំណុលមែនលោកស្រី អេលីហ្សាបេត បេឃើ បានស្នើឲ្យសហរដ្ឋអាមេរិកយកប្រាក់ទាំងនោះ ទៅចែកចាយដល់សហគមន៍នានា នៅក្នុងប្រទេសកម្ពុជា ដែលជីវិតរស់នៅរបស់ពួកគាត់បានរងផលប៉ះពាល់ ដោយសារការទម្លាក់គ្រាប់បែក។ លោកស្រីបានបន្តថា «សហរដ្ឋអាមេរិកជំពាក់ កម្ពុជាច្រើនជាងបំណុលសង្គ្រាមឆ្ងាយណាស់ ដែលមិនអាចទូទាត់សងជាសាច់ប្រាក់បាននោះទេ»៕
