(ភ្នំពេញ)៖ កម្លាំងសមត្ថកិច្ច និងអាជ្ញាធររបស់ខណ្ឌសែនសុខ សហការជាមួយកម្លាំងសមត្ថកិច្ចរាជធានីភ្នំពេញជាច្រើននាក់ នៅព្រឹកថ្ងៃទី១១ ខែកុម្ភៈ ឆ្នាំ២០១៧នេះ បានបើកប្រតិបត្តិការ ទ្រង់ទ្រាយធំ ចូលរួមរុះរើផ្ទះជួល ដើម្បីបំចាត់សំបុកគ្រឿងញៀន នៅប្លុកត្រពាំងឈូក ស្ថិតក្នុងសង្កាត់ទឹកថ្លា ខណ្ឌសែនសុខ។
ប្រតិបត្តិការរុះរើផ្ទះជួលនៅតំបន់ត្រពាំងឈូកនេះ កម្លាំងគណៈបញ្ជាការឯកភាពខណ្ឌសែនសុខ ជាច្រើនរូប ក្រោមការដឹកផ្ទាល់របស់លោក ប៉ិល កុសល អភិបាលខណ្ឌ និងជាប្រធានគណៈបញ្ជាការឯកភាពខណ្ឌ បានរុះរើប៉ុន្មានថ្ងៃរួចមកហើយ ហើយមកទល់ព្រឹកនេះ បានរុះរើផ្ទះជួលបានជាង៣០ខ្នងផ្ទះហើយ ក្នុងចំណោមផ្ទះជូលជាង១០០ខ្នងផ្ទះ។
យុទ្ធនាការនេះ គឺជាយុទ្ធនាការអប់រំ ផ្សព្វផ្សាយ និងចូលរួមកាត់បន្ថយសំបុកគ្រឿងញៀន ដែលក្រោមការបញ្ជាផ្ទាល់ពី សម្ដេចក្រឡាហោម ស ខេង ឧបនាយករដ្ឋមន្ដ្រី និងរដ្ឋមន្ដ្រីក្រសួងមហាផ្ទៃ។
លោក ម៉ក់ ហុង អធិការខណ្ឌសែនសុខ បានឲ្យដឹងថា ក្រោយមានបញ្ជាផ្ទាល់ពីសម្ដេចក្រឡោហោម, នាយឧត្តមសេនីយ៍ ជួន សុវណ្ណ ស្នងការនគរបាលរាជធានីភ្នំពេញ បានបញ្ជាបន្ដមកកម្លាំងជំនាញ សហការជាមួយអាជ្ញាធរពាក់ព័ន្ធ ដើម្បីបំចាត់ចោលទាំងស្រុងនូវសំបុកគ្រឿងញៀន នៅប្លុកត្រពាំងឈូកនេះ។
លោកអធិការបញ្ជាក់ថា ក្នុងប្រតិបត្តិការរុះរើនេះ ម្ចាស់ផ្ទះជួលទាំងអស់ បានចូលរួមសហការជាមួយអាជ្ញាធរ និងសមត្ថកិច្ចពាក់ព័ន្ធ ដើម្បីរុះរើផងដែរ ដើម្បីបំបាត់នូវសំបុកគ្រឿងញៀននេះ៕
