(ព្រៃវែង)៖ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានដាក់អនុសាសន៍បន្តក្រើនរំលឹក ដល់កម្លាំងប្រដាប់អាវុធ និងមន្រ្តីរាជការតាមមូលដ្ឋានទាំងអស់ ឱ្យយកចិត្តទុកដាក់តាមបង្ក្រាបបទល្មើសផ្សេងៗ ជាពិសេសបទល្មើសគ្រឿងញៀន ចោរកម្មឆក់ប្លន់ ឲ្យដូចភ្លៀងរលឹម ដើម្បីផ្តល់ភាពកក់ក្តៅ និងធានាដល់សុវត្ថិភាពជូនប្រជាពលរដ្ឋ។

សម្តេចតេជោ ហ៊ុន សែន មានប្រសាសន៍យ៉ាងមុតមាំបែបនេះ នៅក្នុងឱកាសអញ្ជើញជួបសំណេះសំណាល ជាមួយ​ក្រុមប្រឹក្សាឃុំ-សង្កាត់ ក្រុង-ស្រុក ខេត្ត និងមន្ត្រីរាជការ កងកម្លាំងប្រដាប់អាវុធក្នុងខេត្តព្រៃវែង នាថ្ងៃទី១០ ខែកុម្ភៈ ឆ្នាំ២០១៧នេះ។

សម្តេចតេជោ ហ៊ុន សែន បានក្រើនរំលឹកថា «ត្រូវយកចិត្តទុកដាក់រក្សាសន្តិសុខ សណ្ដាប់​ធ្នាប់សង្គម រួមមានការបង្ក្រាប​នូវ​បទល្មើសផ្សេងៗ ជាពិសេសគឺការបង្ក្រាបបទល្មើសគ្រឿងញៀន ចោរកម្មឆក់ប្លន់ ដើម្បីផ្តល់ភាពកក់ក្តៅ និងធានាដល់​សុវត្ថិភាព​នៃការរស់នៅ និងការប្រកបរបរការងារផ្សេងៗរបស់ប្រជាពលរដ្ឋ»​។

សម្ដេចតេជោ នាយករដ្ឋមន្រ្តី ថែមទាំបានផ្ដាំផ្ញើដល់កម្លាំងសមត្ថកិច្ច និងមន្រ្តីរាជការបន្តថា ត្រូវបន្ត​យកចិត្តទុកដាក់លើការផ្តល់​សេវាសាធារណៈ ជូនប្រជាពលរដ្ឋឲ្យបានលឿន និងមានប្រសិទ្ធភាព ជាពិសេសការផ្ដល់សេវាតម្រូវការ ហើយត្រូវអនុវត្ត​តាមច្បាប់កំណត់។​ សម្តេចថ្លែងថា «ក្នុងនាមជា​មន្ត្រី ត្រូវយកចិត្តទុកដាក់បម្រើប្រជាពលរដ្ឋ ហើយត្រូវខិតខំបំបាត់ឲ្យ​អស់នូវភាពអសកម្មនានា ដែលអាចធ្វើឲ្យថ្នាំងថ្នាក់ដល់ប្រជាពលរដ្ឋ ត្រូវសហការគាំទ្រគយ និងពន្ធដា ក្នុងការប្រមូលពន្ធឲ្យមានប្រសិទ្ធភាព ដើម្បីពង្រឹងចំណូលថវិកាជាតិ»