(ភ្នំពេញ)៖ លោក ញឹក ប៊ុនឆៃ ប្រធានគណបក្សខ្មែររួបរួមជាតិ ដែលជាគណបក្សរាជានិយមមួយ នៅថ្ងៃទី១០ ខែកុម្ភៈ ឆ្នាំ២០១៧នេះ បានបង្ហាញជំហរគាំទ្រ ឱ្យមានយុទ្ធនាការទាមទារឱ្យសហរដ្ឋអាមេរិក លុបបំណុលដែលកម្ពុជាបានជំពាក់កាលពីសម័យសាធារណរដ្ឋខ្មែរ ដែលដឹកនាំដោយ លោកសេនាប្រមុខ លន់ នល់។

លោក ញឹក ប៊ុនឆៃ បានលើកឡើងថា គណបក្សខ្មែររួបរួមជាតិគាំទ្រ នូវគោលជំហររបស់រាជរដ្ឋាភិបាលកម្ពុជា ដែលទាមទារឱ្យសហរដ្ឋអាមេរិកលុបបំណុលដែលកម្ពុជាបានជំពាក់ ហើយលោកសង្កេតឃើញថា បន្ទាប់ពីការអំពាវនាវរបស់រាជរដ្ឋាភិបាលឱ្យលុបបំណុលនេះ មានប្រជាពលរដ្ឋជាច្រើនបានគាំទ្រ ហើយចេញមុខទាមទារឱ្យមានការលុបបំណុលនេះដែរ។

លោកបានថ្លែងប្រាប់អង្គភាពព័ត៌មាន Fresh News នៅថ្ងៃទី១០ ខែកុម្ភៈ ឆ្នាំ២០១៧នេះថា «យើងគាំទ្រនូវអ្វីដែល ប្រមុខរាជរដ្ឋាភិបាល ស្នើឱ្យរដ្ឋាភិបាលសហរដ្ឋអាមេរិកពិចារណា លុបបំណុលដែលកម្ពុជាបានជំពាក់កាលពីទស្សវត្សឆ្នាំ៧០»។

លោកបានបន្ថែមថា «ការជំពាក់បំណុលនេះ គឺជាការជំពាក់បំណុលយោធា បានន័យថា យកគ្រាប់រំសេវ និងគ្រប់ដទៃទៀត មកធ្វើឱ្យពលរដ្ឋខ្មែរស្លាប់ និងពិការ។ បំណុលនេះមិនមែនជាបំណុលដែលយកមកជួយដល់កម្ពុជានោះទេ»។

តាមសារព័ត៌មាន Cambodia Daily ដែលជាកាសែតមានខ្នងបង្អែក និងស្ថាបនិកជនជាតិអាមេរិក បានចេញផ្សាយ​នៅព្រឹកថ្ងៃទី១០ ខែកុម្ភៈ ឆ្នាំ២០១៧ ក្រោមចំណងជើងថា «សហរដ្ឋអាមេរិកគ្មានហេតុផលសីលធម៌ច្បាស់លាស់ ជុំវិញការទារ​បំណុលពីប្រទេសកម្ពុជា»។ ដោយក្នុងនោះបាន ដកស្រង់សម្តី លោកស្រី អេលីហ្សាបេត បេឃើ (Elizabeth Becker) ជាអ្នកកាសែត និងជាអ្នកនិពន្ធអាមេរិក ដែលបានចុះផ្សាយ និងរៀបរាប់​លម្អិត​អំពី​សង្រ្គាមអាមេរិក​​ទម្លាក់គ្រាប់បែក​នៅកម្ពុជាក្នុងឆ្នាំ១៩៧៣ បាននិយាយថា៖ «រដ្ឋាភិបាលអាមេរិកមិនដែលទទួលខុសត្រូវតាមផ្លូវច្បាប់ ចំពោះការ​ខូចខាតដ៏ធំធេង ដែលខ្លួនបានបង្កឡើងទៅលើជនស៊ីវិល និងប្រទេសកម្ពុជា​អំឡុងពេលសង្រ្គាម​នោះទេ»។

លោកស្រីថ្លែងថា «បើតាមការប៉ាន់ស្មាននេះ ប្រហែលជាដោយសារការព្រួយបារម្ភថា សហរដ្ឋអាមេរិក​ប្រហែល​ជាត្រូវ​សងសំណង សង្រ្គាមសម្រាប់ការ បំផ្លិចបំផ្លាញ និងខ្លាចអតីតមន្រ្តីអាមេរិកត្រូវគេប្តឹង» ហើយលោកស្រីបានបន្តថា ការទម្លាក់គ្រាប់បែក​ជាច្រើន បានធ្វើឡើងដោយគ្មានអ្នកដឹង ហើយភាគតិចណាស់ ដែលថា​អាចមានការព្រមព្រៀង​ពីអាជ្ញាធរកម្ពុជា។

លោកស្រីបានថ្លែងបន្តថា «ការបន្តចាប់ឲ្យកម្ពុជាទទួលខុសត្រូវតាមផ្លូវច្បាប់ចំពោះបំណុលចាស់ ក្នុងសង្រ្គាមគឺជា​ការលាក់​ពុតត្បុត និងអសីលធម៌»។ ប្រសិនបើមានការសងបំណុលមែនលោកស្រី​ អេលីហ្សាបេត បេឃើ បានស្នើឲ្យ​សហរដ្ឋអាមេរិក​យកប្រាក់ទាំងនោះ ទៅចែកចាយដល់សហគមន៍នានា នៅក្នុងប្រទេសកម្ពុជា ដែលជីវិតរស់នៅ​របស់ពួកគាត់​បានរងផលប៉ះពាល់ ដោយសារការទម្លាក់គ្រាប់បែក។ លោកស្រីបានបន្តថា «សហរដ្ឋអាមេរិកជំពាក់ កម្ពុជាច្រើនជាង​បំណុលសង្គ្រាម​ឆ្ងាយណាស់ ដែលមិនអាចទូទាត់សងជាសាច់ប្រាក់បាននោះទេ»។

ពាក់ព័ន្ធនឹងបញ្ហាបំណុលនេះ ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន នៅថ្ងៃទី០៨ ខែកុម្ភៈកន្លងទៅនេះ បានថ្លែងបន្ត​ស្នើក្នុងវេទិកាសាធារណៈ ដល់រដ្ឋាភិបាលអាមេរិក លោក ដូណាល់ ត្រាំ ឲ្យលុបបំណុលពីកម្ពុជា ដែលបានជំពាក់​នៅសម័យ​រដ្ឋាភិបាល​មិនស្របច្បាប់ លន់ នល់ ក្នុងទស្សវត្សរ៍៧០ ដែលអាមេរិកទម្លាក់គ្រាប់បែក ទាំងគ្រាប់បែកចង្កោម និងទាំង​គ្រាប់បែកគីមី សម្លាប់ខ្មែរហើយ ទារលុយថែមទៀត។

ការថ្លែងយ៉ាងដូច្នេះ របស់នាយករដ្ឋមន្ដ្រីនៃកម្ពុជា ធ្វើឡើងក្នុងឱកាសដែលសម្ដេចតេជោ អញ្ជើញជាអធិបតី​ក្នុងពិធីបញ្ចុះ​ខណ្ឌសីមាព្រះវិហារ ក្នុងវត្តព្រែកប្រា ស្ថិតក្នុងសង្កាត់ព្រែកប្រា ខណ្ឌច្បារអំពៅ ។

សម្តេចតេជោ ហ៊ុន សែន បានមានប្រសាសន៍យ៉ាងដូច្នេះថា «អាមេរិកកាំងកុំទារលុយខ្មែរ ! ឥឡូវរកកាន់តែឃើញហើយ មិនមែនត្រឹមតែគ្រាប់បែកចង្កោមទេ មានអាវុធគីមីទៀត។ អាមេរិកាំងអើយ...ប្រធានាធិបតី ដូណាល់ត្រាំ អើយ! យ៉ាងម៉េច​ទៅវាយគេ​ហើយទារលុយ! វាយយើងហើយទារលុយយើង វាមិនយល់ កន្លែងហ្នឹង!។ ឥឡូវមានចលនា ប្រជាពលរដ្ឋ​ច្រើនកន្លែង បានគាំទ្រឲ្យលុបបំណុល។ សង្ឃឹមថា បក្សនយោបាយនានា នៅកម្ពុជាក៏គាំទ្រឲ្យ​លុបបំណុល​នេះដែរ តែបក្សប្រឆាំងគឺជឿជាក់ថា មិនទាមទារទេព្រោះគាត់ជាកូនចៅអាមេរិក»។

នេះជាលើកទី៣ហើយ ដែលសម្តេចតេជោ ហ៊ុន សែន នាយករដ្ឋមន្ត្រី បានអំពាវនាវជាសាធារណៈឲ្យអាមេរិកលុបចោលបំណុលដែលកម្ពុជាជំពាក់ ដោយលើកទី១ ធ្វើឡើងក្នុងពិធី​បុណ្យសមុទ្រ កាលពីខែធ្នូ ឆ្នាំ២០១៦ និងលើកទី២ ក្នុងវេទិកាសេដ្ឋកិច្ចពិភពលោក នៅប្រទេសស្វីស កាលពីថ្ងៃទី២០ ខែមករា ឆ្នាំ២០១៧ សម្តេចតេជោចាត់ទុកថា ជាបំណុលកខ្វក់។

អាមេរិកបានទម្លាក់គ្រាប់បែកនៅកម្ពុជា ពីដើមឆ្នាំ១៩៦៣ ដល់ដើមឆ្នាំ១៩៧៥ ហើយទិន្នន័យ ដែលត្រូវបានឯកភាព​ដោយ ប្រធានាធិបតី Bill Clinton នៅឆ្នាំ២០០០ បញ្ចេញជាឯកសារចំហរថា អាមេរិកទម្លាក់គ្រាប់បែកនៅកម្ពុជា ២លាន៨សែនតោន និងគ្រាប់បែកគីមីផងដែរ ក្រោមលេសថា​ តាមកំទេចពួកយៀកកុង​ យួនឈ្លានពាន​ ប៉ុន្តែស្លាប់តែខែ្មរជាង ៥០០,០០០នាក់់ ​សម្លាប់ដោយផ្ទាល់និងកំទេចភូមិ និងផ្ទះសម្បែងខែ្មររាប់ម៉ឺន​កន្លែង។

អគ្គរដ្ឋទូតសហរដ្ឋអាមេរិកប្រចាំនៅកម្ពុជា លោក William A. Heidt  បានអះអាងថា នៅក្នុងសន្និសីទតុមូលមួយនៅឯស្ថានទូតអាមេរិកប្រចាំនៅកម្ពុជា កាលពីថ្ងៃទី០៣ ខែកុម្ភៈ ឆ្នាំ២០១៧ថា រហូតដល់ពេលនេះបំណុលដែលកម្ពុជាជំពាក់នោះ បានកើនឡើងដល់ជិត៥០០លានដុល្លារហើយ។

ប្រជាពលរដ្ឋ អ្នកនយោបាយ ក៏ដូចជាសមាគមជាច្រើន នៅកម្ពុជាបានសម្តែងការខឹងសម្បានឹងសហរដ្ឋអាមេរិក ដែលអះអាងថា មិនបានពិចារណាចំពោះសំណើសុំលុបបំណុលរបស់រាជរដ្ឋាភិបាលកម្ពុជា ប៉ុន្តែទោះជាយ៉ាងណាប្រជាពលរដ្ឋខ្មែរ អ្នកនយោបាយ និងសមាគមនានា នៅតែទទូចទាមទារឱ្យសហរដ្ឋអាមេរិក យោគយល់និងពិចារណាឡើងវិញ។

បើតាមយោបល់ លោក ញឹក ប៊ុនឆៃ,  ពេលនេះគួរតែថ្នាក់ដឹកនាំសហរដ្ឋអាមេរិក ពិចារណាក្នុងការលុបបំណុល ឬបង្វែរបំណុលទាំងនោះ ទៅជាជំនួយវិញ ដើម្បីអភិវឌ្ឍកម្ពុជា ឬជួយពលរដ្ឋខ្មែរដែលរងគ្រោះកាលពីសម័យនោះ ឬក៏ជួយដល់ការដោះមីនដែលសេសសល់ពីសម័យសង្រ្គាម៕

សូមស្តាប់ប្រសាសន៍សម្តេចតេជោ ហ៊ុន សែន ថ្លែងអំពីបំណុលកម្ពុជាជំពាក់អាមេរិក៖