(ភ្នំពេញ)៖ មន្រ្តីជាន់ខ្ពស់មួយរូបនៅក្រសួងកសិកម្ម បានទម្លាយឯកសារមួយច្បាប់បានឲ្យដឹងថា ក្រសួងកសិកម្មបានអនុញ្ញាតឲ្យក្រុមហ៊ុនឯកជនមួយឈ្មោះ «លីម រ៉ូយ៉ាល់ ជ័ញ ស្តុក» បង្កើតរោងម៉ាស៊ីនកែច្នៃឈើ និងផលិតគ្រឿងសង្ហារិមជាបណ្តោះអាសន្នមួយចំនួន ស្ថិតនៅទីតាំងក្នុងភូមិត្រពាំងស្រែ ឃុំ២ធ្នូ ស្រុកស្នូល ខេត្តក្រចេះ។
ការអនុញ្ញាតឲ្យបើកអាជីវកម្មកែច្នៃឈើនេះ ត្រូវបានមន្រ្តីជាន់ខ្ពស់ដដែលសុំមិនបញ្ចេញឈ្មោះបានលើកឡើងថា នេះជាការលើកទឹកចិត្តឲ្យមានបទល្មើស ការកាប់បំផ្លាញព្រៃឈើបន្តទៀត ដែលបញ្ហានេះផ្ទុយពីគោលនយោបាយរបស់រដ្ឋាភិបាលដែលខិតខំអភិរក្សព្រៃឈើ ខណៈគណកម្មាការពិសេសបង្ក្រាប បទល្មើសព្រៃឈើដឹកនាំ ដោយនាយឧត្តមសេនីយ៍ សៅ សុខា មេបញ្ជាការកងរាជអាវុធហត្ត បាននឹងកំពុងដឹកនាំប្រតិបត្តិការបង្ក្រាប បទល្មើសនេះពេញផ្ទៃប្រទេស។
សូមបញ្ជាក់ថា តាមព័ត៌មានមួយចំនួនបានឱ្យដឹង ដើម្បីបានឈើយកមកកែឆ្នៃ ឈ្មួញរកស៊ីបានផ្តល់ប្រាក់ដល់ពលរដ្ឋមួយចំនួនដើម្បីចូលទៅកាប់ឈើ។
លិខិតដែលអង្គភាពព័ត៌មាន Fresh News ទទួលបាននេះបានបង្ហាញថា ក្រុមហ៊ុន លីម រ៉ូយ៉ាល់ ជ័ញ ស្តុក ខាងលើនេះ បានដាក់សំណើទៅកាន់ ក្រសួងកសិកម្មនៅថ្ងៃទី៣០ ខែមករា ឆ្នាំ២០១៧ តាមរយៈប្រតិភូរាជរដ្ឋាភិបាលទទួលបន្ទុករដ្ឋបាលព្រៃឈើ៕
