(ពោធិ៍សាត់)៖ ក្រោយសន្និបាតពីរបីថ្ងៃ ស្រាប់តែមានមន្ត្រីម្នាក់ដែលអះអាងថា ធ្វើការនៅក្នុងមន្ទីររៀបចំដែនដី នគរូបនីយកម្ម និងសំណង់ ខេត្តពោធ៌សាត់បានលួចខ្សឹបប្រាប់នាយខ្វែកថា បើចៅហ្វាយខេត្តផ្ដល់អនុសាសន៏ហើយ លោកប្រធានមន្ទីរនៅតែមិនកែទម្លាប់ដឹកនាំ ការងារក្ដោបយកផលប្រយោជន៏តែឯងទៀត ពួកគាត់នឹងនាំគ្នាធ្វើកូដកម្មប្រឆាំងជាចំហរហើយ។
អ្នកខ្សឹបបានអះអាងថា បច្ចុប្បន្នការងារនៅក្នុងមន្ទីររៀបចំដែនដី នគរូបនីយកម្ម និងសំណង់ខេត្តពោធ៌សាត់ ធ្វើការហាក់ដូចជាមិនសុី សង្វាក់គ្នាសោះ ជាពិសេសតាំងពីមេថ្មីចូលកាន់តំណែងនេះ បានជាងកន្លះឆ្នាំមក គាត់ក្ដោបការងារសេដ្ឋកិច្ច លុយកាក់ដកយកទៅកាន់ និងចាយវាយតែខ្លួនឯងលែងមានបែបបទរដ្ឋបាលចាយវាយតាមច្បាប់ហិរញ្ញវត្ថុ និងចាយតាមលទ្ធកម្មសាធារណៈអស់ហើយ។
ការងារណាពាក់ព័ន្ធលុយកាក់ លោកប្រធានប្រមូលយកទៅធ្វើ ឬអោយបក្ខពួករបស់ខ្លួនធ្វើប្រមូលប្រយោជន៍ ការងារណាសុីក្រដាសបានរុញអោយគេធ្វើ ខុសពីមេមុន។ អ្នកខ្សឹបបានបន្ថែមថា តាមពិតរឿងវាចង់ផ្ទុះឡើងតាំងពីថ្ងៃសន្និបាត របស់មន្ទីរកាលពីថ្ងៃទី៧ ខែកុម្ភៈ ឆ្នាំ២០១៧ កន្លងទៅនេះមកម៉្លេះ ដោយថ្នាក់ក្រោមប្រុងឡើងតវ៉ារាយការណ៏ អោយលោកអភិបាលខេត្តដឹង ដើម្បីគាត់ជួយដោះស្រាយ តែពេល លោកអភិបាលខេត្តឡើងថ្លែងចំណាប់អារម្មណ៏ លោកបានធ្វើការផ្ដល់អនុសាសន៏ក្រើនរំលឹកអោយមន្ត្រីថ្នាក់ដឹកនាំ បុគ្គលិកនៅក្នុងមន្ទីរទាំងអស់ ត្រូវមានវប្បធម៌សាមគ្គីភាពអោយបានទូលំទូលាយ ប្រើប្រាស់ក្រមសីលធម៌ ទើបនាំមកនូវភាពសុខសាន្ត និងអភិវឌ្ឍន៏ ទើបពួកគាត់រៀង ស្ងប់អារម្មណ៏ទៅវិញ ដោយរងចាំមើលថាតើ លោក លៀម ប៊ុនរឿន កែទំលាប់ដឹកនាំការងារតាមអនុសាសន៏ របស់លោកអភិបាលខេត្តឬអត់? តែមួយថ្ងៃពីរនេះ អ្វីៗហាក់ដូចជានៅដដែល ទើបពួកគាត់លួចទម្លាយតាមអង្គភាពសារព័ត៌មាន Fresh News ក្រែងលោ លោកប្រធានឃើញ នឹងកែ តែបើ នៅតែមិនកែទៀត ពួកគាត់នឹងទម្លាយឯកសារ ទម្លាយរឿងជាសាធារណៈហើយ។
តាមមន្ត្រីនៅខេត្តពោធិ៍សាត់ ដែលស្គាល់នាយខ្វែក ហើយលួចខ្សឹប បានអះអាងថានៅក្នុងមន្ទីរៀបចំដែនដី នគររូបនីយកម្ម និងសំណង់ ចាប់តាំងពី លោក លៀម ប៊ុនរឿន ឡើងកាន់តំណែង ហើយប្រមូលការងារលុយកាក់យកទៅកាន់ខ្លួនឯង និងដឹកនាំការងារតាមបែបអត្តនោម័តមក រវាងប្រធាន អនុប្រធានភាគច្រើន និងប្រធានការិយាល័យមួយចំនួនធ្វើការគឺដូចទឹក និងប្រេង អនុប្រធានខ្លះលែងចង់ចូលកន្លែងធ្វើការទៅហើយ។ ខាងលើនេះគឺគ្រាន់តែជាសារតូចមួយតែប៉ុណ្ណោះ ជូនទៅលោកប្រធានមន្ទីររៀបចំដែនដីអោយកែទម្លាប់ធ្វើការ បើមិនដូច្នេះទេ រឿងអាស្រូវនឹងផ្ទុះ នៅថ្ងៃណាមួយជាមិនខានឡើយ កុំអោយថាមិនបានប្រាប់មុន៕
លោក លៀម ប៊ុនរឿន ប្រធានមន្ទីររៀបចំដែនដី នគរូបនីយកម្មនិងសំណង់ខេត្តពោធ៌សាត់
