(ព្រះសីហនុ)៖ លោកឧត្តមសេនីយ៍ទោ ជូន ណារិន ស្នងការនគរបាលខេត្តព្រះសីហនុ បានប្រាប់អង្គភាព Fresh News នៅថ្ងៃទី១០ ខែកុម្ភៈ ឆ្នាំ២០១៧ នេះថា កម្លាំងនគរបាលរបស់លោក បានបន្តប្រតិបត្តិការបង្ក្រាបគ្រឿងញៀន ចំនួន២ករណីផ្សេងគ្នា ឃាត់ខ្លួនជនសង្ស័យចំនួន៤នាក់ និងថ្នាំញៀន៦កញ្ចប់ ព្រមទាំងសម្ភារមួយចំនួនទៀត។
លោកឧត្តមសេនីយ៍ទោ បានឲ្យដឹងថា ករណីទី១៖ ធ្វើឡើងនៅថ្ងៃទី០៩ ខែកុម្ភៈ នៅក្នុងភូមិរាម ឃុំរាម ស្រុកព្រៃនប់ ដោយកម្លាំងជំនាញឃាត់ខ្លួន ជនសង្ស័យម្នាក់ឈ្មោះ នង វិរៈ អាយុ១៨ឆ្នាំ បានដកហូតថ្នាំញៀន១កញ្ចប់ធំ និងសម្ភារសម្រាប់ប្រើប្រាស់គ្រឿងញៀនមួយចំនួន។
ករណីទី២៖ធ្វើឡើងនៅថ្ងៃដដែលនៅក្នុងភូមិ៤ សង្កាត់៤ ក្រុងព្រះសីហនុ។ កម្លាំងជំនាញឃាត់ខ្លួនជនសង្ស័យចំនួន ៣នាក់៖ ១.ឈ្មោះ សាំង ភ័ក្រ្ត អាយុ៣៣ឆ្នាំ, ២.ឈ្មោះ សេង លីណា ភេទស្រី អាយុ៣៩ឆ្នាំ, ៣.ឈ្មោះ ណុប គីនីន អាយុ៣៥ឆ្នាំ។ ដកហូតបានម្សៅក្រាមពណ៌សថ្លា ចំនួន៥កញ្ចប់ ប្រាក់៤០ដុល្លារ និង១០០,០០០រៀល និងសម្ភារផ្សេងៗមួយចំនួនទៀត។
ក្រោយឃាត់ខ្លួនបានជាបន្តបន្ទាប់ហើយ កម្លាំងនគរបាលបាននាំខ្លួនជនសង្ស័យ និងវត្ថុតាងខាងលើ ទៅសួរនាំនៅស្នងការដ្ឋាននគរបាលខេត្ត ដើម្បីកសាងសំណុំរឿងបន្តនីតិវិធីនៅតុលាការ៕
