(ជប៉ុន)៖ ឆ្លៀតឱកាសនៃដំណើរទស្សនកិច្ច នៅប្រទេសជប៉ុន លោកទេសរដ្ឋមន្រ្តី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានចូលរួមក្នុងសិក្ខាសាលាវិនិយោគ ដែលរៀបចំឡើងដោយសមាគមជប៉ុន-កម្ពុជា ប្រចាំប្រទេសជប៉ុន ដែលមានការចូលរួមពីធុរជន និងវិនិយោគិនធំៗ របស់ជប៉ុនប្រមាណជាង១៣០រូប។
ក្នុងសិក្ខាសាលានោះ លោកទេសរដ្ឋមន្រ្តី អូន ព័ន្ធមុនីរ័ត្ន បានឆ្លើយនូវសំណួរនានា របស់វិយោគិនជប៉ុនដោយសង្កត់ធ្ងន់ថា ក្នុងឋានៈជាប្រទេសមួយ ក្នុងចំណោមប្រទេស ឯកទគ្គករកំណើនទាំង៨ នៅក្នុងពិភពលោក ដែលមានកំណើនរឹងមាំក្នុងអត្រា៧.៧% ក្នុងរយៈពេល២ទសវត្សរ៍កន្លងមកនេះ និងជាខ្លាសេដ្ឋកិច្ចថ្មីនៅអាស៊ី កម្ពុជាពិតជាផ្តល់នូវកាលានុវត្តភាពជាច្រើន ចំពោះវិនិយោគិន ពិសេសវិនិយោគិនមកពីជប៉ុន។
នៅក្នុងសិក្ខាសាលានេះ លោកទេសរដ្ឋមន្រ្តី បានបង្ហាញពីស្ថានភាពបច្ចុប្បន្ននៃសេដ្ឋកិច្ចកម្ពុជា ក៏ដូចជាគោលនយោបាយ វិនិយោគរបស់កម្ពុជា ក៏ដូចជាវិស័យអាទិភាពនានា ដែលជាសក្តានុពលរបស់កម្ពុជាក្នុងការទាក់ទាញអ្នកវិនិយោគបរទេស ជាពិសេសវិនិយោគិនពីប្រទេសជប៉ុន។
ក្នុងឱកាសនោះ លោកទេសរដ្ឋមន្ត្រី បានលើកឡើងពីវឌ្ឍនភាព និងគោលនយោបាយសំខាន់ៗចំនួន៦ចំណុច ដូចខាងក្រោម៖
១៖ ការបន្តខិតខំថែរក្សាស្ថេរភាព និងកំណើនម៉ាក្រូសេដ្ឋកិច្ច ឱ្យបានក្នុងរង្វង់៧% ក្នុងរយៈពេលមធ្យម និងវែង។
២៖ ការលើកកម្ពស់ការអភិវឌ្ឍវិស័យកម្មន្តសាល។
៣៖ ការបន្តអភិវឌ្ឍវិស័យ ហេដ្ឋារចនាសម្ព័ន្ធ ដើម្បីបង្កើនភាពប្រកួតប្រជែងរបស់កម្ពុជា។
៤៖ ការបន្តសម្របសម្រួល និងផ្តល់ការលើកទឹកចិត្ត ដោយមានភាពប្រកួតប្រជែងបំផុត ក្នុងការទាក់ទាញវិនិយោគិន។
៥៖ ការបន្តផ្តល់អាទិភាពខ្ពស់ ចំពោះការពង្រីក និងពង្រឹងការអប់រំ និងបណ្តុះបណ្តាលវិជ្ជាជីវៈ។
៦៖ ការបន្តពង្រីកយន្តការពិគ្រោះយោបល់រវាងរាជរដ្ឋាភិបាល និងវិស័យឯកជន។
បន្ទាប់ពីបានស្តាប់បទបង្ហាញរបស់លោកទេសរដ្ឋមន្ត្រី អូន ព័ន្ធមុនីរ័ត្ន រួចមក សហគ្រិនជប៉ុនមួយចំនួន បានចាប់អារម្មណ៍ ចំពោះឱកាសវិនិយោគនៅកម្ពុជា ព្រមទាំងសន្យានឹងមកពិនិត្យស្ថានភាពជាក់ស្ដែង នៅពេលដ៏ខ្លីខាងមុខ។
សូមជម្រាបថា ឆ្លើយតបតាមការអញ្ជើញ របស់រាជរដ្ឋាភិបាលជប៉ុន នៅរាត្រីថ្ងៃទី០៥ ខែកុម្ភៈ ឆ្នាំ២០១៧ លោកទេសរដ្ឋមន្ត្រី អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងលោកស្រី បានដឹកនាំ គណៈប្រតិភូជាន់ខ្ពស់ក្រសួងសេដ្ឋកិច្ច និងហិរញ្ញវត្ថុ អញ្ជើញទស្សនកិច្ចផ្លូវការ នៅប្រទេសជប៉ុនពីថ្ងៃទី០៥ ដល់ថ្ងៃទី១១ ខែកុម្ភៈ ឆ្នាំ២០១៧ ដើម្បីបន្តជម្រុញ និងពង្រឹងបន្ថែមទៀតនូវកិច្ចសហប្រតិបត្តិការជា ប្រពៃណីរវាងកម្ពុជា និងជប៉ុន៕
