(ភ្នំពេញ)៖ MV ថ្មីប្រភេទជាសាច់រឿង របស់កំពូលតារាចម្រៀង សំនៀងស្រទន់ បង្កប់ដោយមន្តស្នេហ៍ កញ្ញា សុខ ពិសី មានចំណងជើងថា បទ «អូនមិនល្អ ស្រឡាញ់អូនអត់» ដែលមានការចូលរួមសម្ដែង ជាមួយនឹងលោក ខេមរៈ សិរីមន្ត និងតារាល្បីៗមួយចំនួនទៀត ពេល​បានទស្សនាឈុតឆាកដំបូងហើយ ពិតជារំជួលចិត្ត ព្រោះតែសាច់រឿងក្នុងបទនេះ មានសភាពប្រទាក់ក្រឡាគ្នា និយាយពីចំណងស្នេហា គួរឲ្យឈឺចាប់។

បទចម្រៀង មានចំណងជើងថា «អូនមិនល្អ ស្រឡាញ់អូនអត់» ជាប្រភេទបទចម្រៀង បែបយុវវ័យសម័យថ្មី ហើយបង្កើតជាចម្ងល់ថា តើខ្សែជីវិតរបស់ «វែនតា» នឹងទៅជាយ៉ាងណា បើស្នហារបស់គេ ជួបបញ្ហាច្រើនយ៉ាងនេះ? ក្នុងនោះក៏មានបង្ហាញពីឈុតឆាក​ដំបូង គួរឲ្យជក់ចិត្ត និងរំជួលចិត្ត ពេលទស្សនិកជន បានទស្សនា។

ក្នុងអាល់ប៊ុម​មាន​ឈ្មោះថា «ខ្សែជីវិតវែនតា» របស់ផលិតកម្ម សាន់ដេ មិនត្រឹមតែមាន​បទរំជួលចិត្ត «អូនមិនល្អ ស្រឡាញ់អូនអត់» ប៉ុណ្ណោះទេ ក្នុងនោះ ក៏មាននបទពីរោះរណ្ដំចិត្ត​មួយចំនួនទៀត រួមមានបទ «ខ្ញុំខ្លាចបាត់បង់អ្នកទើបខ្ញុំអត់ធន់​,​ សូមកុំទៅចោលមនុស្សល្ងង់ម្នាក់​នេះបានអត់?» និង​បទ «ខ្ញុំពិតជាឈឺចាប់ខ្លាំងណាស់» ជាដើម។

អ្វីដែលធ្វើឲ្យទស្សនិកជន កាន់តែជក់ចិត្ត និងត្រៀមខ្លួនសប្បាយរីករាយ ទាំងអស់គ្នានោះ គឺនៅក្នុងព្រឹត្តិការណ៍ប្រគំតន្រ្តី​ដ៏ធំប្រចាំឆ្នាំ «Leo Beer Concert 2017» ទស្សនិកជន នឹងបានជួបជាមួយ តារាចម្រៀងល្បីៗ​ដែលស្ថិតក្នុងដួងចិត្តអ្នក ដូចជា កញ្ញា មាស​ សុខសោភា,លោក ឆាយ វីរ:យុទ្ធ, កញ្ញា សុខ ពិសី, លោក ខាន់ ជែមស៍, កញ្ញា យូរី និងនាយ ចឺម ​ដែលកម្មវិធីនេះ នឹងប្រព្រឹត្តទៅនៅថ្ងៃ អាទិត្យ ទី១២ ខែកុម្ភៈ ឆ្នាំ២០១៧នេះ នៅក្នុងបរិវេណសាលាគរុកោសល្យ ក្នុងទីរួមខេត្តកំពង់ចាម ចាប់​ពី​ម៉ោង៦ ល្ងាច​ត​ទៅ។ ក្នុងនោះក៏នឹង​មានការផ្សាយផ្ទាល់​ពិសេស តាមកពា្ចក់​ទូរទស្សន៍ MyTV ផងដែរ៕