(ភ្នំពេញ)៖ កន្លងទៅថ្មីៗនេះសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានសម្រេចផ្តល់ថវិកាចំនួន ៣៧,៥១៨.៧៨ដុល្លារអាមេរិក ដើម្បីខួងអណ្តូងទឹកស្អាត ចំនួន ១៣ ទៀត ជូនប្រជាពលរដ្ឋខ្វះខាតទឹកប្រើប្រាស់ចំនួន ២៤២គ្រួសារ ស្មើនឹងមនុស្ស ១,២០៣នាក់ រស់នៅភូមិចំនួន ៦ ក្នុងឃុំចំនួន ៣ នៃស្រុកកែវសីមា ខេត្តមណ្ឌលគិរី។
សូមបញ្ជាក់ថា គិតចាប់តាំងពីឆ្នាំ ២០១០ ដល់ឆ្នាំ ២០១៦ កាកបាទក្រហមកម្ពុជា បានដោះស្រាយបញ្ហាទឹកស្អាត ជូនប្រជាពលរដ្ឋរាប់ម៉ឺនគ្រួសារ នៅទូទាំងប្រទេស តាមរយ:ការផ្តល់អណ្តូងទឹកស្អាត (អណ្តូងស្នប់-លូចំរុះ) ស្រះទឹកសហគមន៍ និងបានផ្ដល់ស៊ីទែនទឹកបានចំនួនរាប់ពាន់ ហើយបច្ចុប្បន្ននេះ បាននិងកំពុងផ្តល់ជូនប្រជាពលរដ្ឋជាបន្តបន្ទាប់ទៀត។ ដោយឡែក សម្រាប់ខេត្តមណ្ឌលគីរី ចាប់តាំងពីឆ្នាំ ២០១១ រហូតដល់ឆ្នាំ២០១៦ កាកបាទ ក្រហមកម្ពុជា បានផ្ដល់អណ្តូងទឹកស្អាតសរុបចំនួន ៦៥ និងស្រះសហគមន៍មួយ ជូនដល់ប្រជាពលរដ្ឋទុកសម្រាប់ប្រើប្រាស់៕
