(កំពង់ស្ពឺ)៖ ឈើហ៊ុបមុខកាត់ធំប្រភេទរាជកុល (ម្រិញ) ចំនួន១២២កំណាត់ និងឈើប្រណិតធ្នុងចំនួន១៤កំណាត់ ត្រូវបានកម្លាំងចម្រុះខេត្តកំពង់ស្ពឺ រួមមាន៖ រដ្ឋបាលព្រៃឈើផ្នែកបសេដ្ឋ កម្លាំងកងរាជអាវុធហត្ថលើផ្ទៃប្រទេស អាវុធហត្ថខេត្តកំពង់ស្ពឺ មន្ត្រីខណ្ឌរដ្ឋបាលព្រៃកំពង់ស្ពឺ និងសង្កាត់ ក្រោមការបញ្ជាផ្ទាល់ពីលោក វ៉ី សំណាង អភិបាលខេត្ត និងជាប្រធានគណៈបញ្ជាការឯកភាពខត្តកំពង់ស្ពឺ បានបើកប្រតិបត្តិការចុះបង្ក្រាប និងរឹបអូស ដែលក្រុមឈ្មួញលាក់ទុកក្នុងព្រៃនៅភូមិបេង (ត្រពាំងក្រាញ់) ឃុំចំបក់ ស្រុកភ្នំស្រួច ខេត្តកំពង់ស្ពឺ។
ឈើទាំងនេះ ត្រូវបានវាស់វែងដឹកយកមករក្សាទុក ក្នុងផ្នែករដ្ឋបាលព្រៃឈើបសេដ្ឋ ដើម្បីធ្វើការស្រាវជ្រាវរកម្ចាស់ឈើចាត់ការតាមផ្លូវច្បាប់។
លោក ប៊ុន សម្បត្តិ នាយផ្នែករដ្ឋបាល ព្រៃឈើបសេដ្ឋ បានឲ្យដឹងនៅព្រឹកថ្ងៃទី០៨ ខែកុម្ភៈ ឆ្នាំ២០១៧នេះថា កម្លាំងចំរុះ បានចុះទៅបង្ក្រាប និងរឹបអូសបានឈើហ៊ុបជ្រុងរាជកុល (ម្រិញ) បានចំនួន១២២កំណាត់ ស្មើនឹង ៥១,១១៨ម៉ែត្រគូប និងឈើប្រណិតធ្នុងចំនួន ១៤កំណាត់ ស្មើនឹង ១,០០៧ម៉ែត្រគូប។
លោកបន្តថា ការបង្ក្រាបទីតាំងឈ្មួញលាក់ទុកឈើខុសច្បាប់ទាំងនោះ ដោយសារតែមានការចូលពីសំណាក់ប្រជាពលរដ្ឋ ប្រទះឃើញគំនរឈើនៅរាយប៉ាយក្នុងព្រៃ ខាងក្រោយភូមិ ហើយឈ្មួញរៀបចំមប្រុងដឹកចេញទើបសមត្ថកិច្ចចម្រុះ សហការគ្នាចុះបង្ក្រាបទាន់ពេលវេលាតែម្តង។
លោក ប៊ុន សម្បត្តិ បញ្ជាក់ថា ឈើហ៊ុបទាំងនោះ ត្រូវបានស្ទួចដឹកជញ្ជូនយកមករក្សាទុកនូវស្នាក់ការផ្នែក ដើម្បីបន្តនីតិវិធីស្រាវជ្រាវរកម្ចាស់ និងកសាងសំណុំរឿងដើម្បីបញ្ជូនបន្តទៅថ្នាក់លើ ចាត់ការតាមផ្លូវច្បាប់៕
