(សៀមរាប)៖ នៅព្រឹកថ្ងៃទី០៨ ខែកុម្ភៈ ឆ្នាំ២០១៧ នេះ នៅស្នាក់ការសាខាកាកបាទក្រហមខេត្តសៀមរាប មានបើកកិច្ចប្រជុំ លើកទី៦ របស់ខ្លួន ក្រោមកិច្ចដឹកនាំប្រជុំដោយលោកបណ្ឌិត ឃឹម ប៊ុនសុង ប្រធានគណៈកម្មាធិការសាខាកាកបាទក្រហមខេត្ត និងជាអភិបាលនៃគណៈអភិបាលខេត្តសៀមរាប លោកឧកញ៉ាបណ្ឌិត សៀង ណាំ ប្រធានកិត្តិយសសាខា លោកបណ្ឌិត នូ ផល្លា អនុប្រធានកិត្តិយសសាខា និងជាប្រធានក្រុមប្រឹក្សាខេត្ត ព្រមទាំងចូលរួមពីបណ្តាសមាជិក សមាជិកា គណៈកម្មាធិការ សាខាកាកបាទក្រហមខេត្ត និងមន្ត្រីប្រតិបត្តិសាខាកាកបាទក្រហមកម្ពុជាខេត្តផងដែរ ។
លោកបណ្ឌិត ឃឹម ប៊ុនសុង ក៏បានលើកឡើងអំពី របៀបវារៈនៃកិច្ចប្រជុំលើកទី៦ របស់គណៈកម្មាធិការ សាខាកាកបាទ ក្រហមខេត្ត ដោយធ្វើការពិនិត្យ ទៅលើលទ្ធផល និងសកម្មភាពរបស់សាខាឆ្នាំ២០១៦ និងទិសដៅអនុវត្តបន្តឆ្នាំ២០១៧ ព្រមទាំងធ្វើការដាក់ឆ្លង និងអនុម័តរបាយការណ៍ថវិកាឆ្នាំ២០១៦ និងផែនការថវិកាសាខាឆ្នាំ២០១៧ និងការត្រៀមរៀបចំ បើកសម្ពោធអគារទីស្នាក់ការអនុសាខាកាកបាទក្រហមស្រុកជីក្រែង និងត្រៀមសកម្មភាព ខួបលើកទី៦២ កំណើតកាកបាទ ក្រហមកម្ពុជា(១៨កុម្ភៈ ១៩៥៥-២០១៧) ព្រមទាំងខួបលើកទី១៥៤ ទិវាពិភពលោកកាកបាទក្រហម អឌ្ឍចន្ទក្រហមផងដែរ ។
លោកក៏បានសំណូមពរដល់សមាជិកកិច្ចប្រជុំទាំងមូល ត្រូវធ្វើការត្រួតពិនិត្យឲ្យបានស៊ីជម្រៅ ទៅលើគ្រប់រាល់ផែនការ សកម្មភាព ក្នុងការធានាបាន នូវការអនុវត្តបន្តឲ្យ ទទួលជោគជ័យ និងត្រឹមត្រូវតាមគោលដៅនៃយុទ្ធសាស្ត្រ ចលនាមនុស្សធម៌ កាកបាទក្រហមកម្ពុជា ។ ក្នុងនោះដែរលោក ក៏បានផ្តោតខ្ពស់ទៅលើ ការបណ្តុះបណ្តាលនូវធនធានមនុស្ស ក្នុងមូលដ្ឋាន ការស្វែងរកនូវដៃគូ លើការរកនូវចំណូលមូលនិធិសំខាន់ ក្នុងការផ្តល់ដំណឹង និងផ្សព្វផ្សាយជូនដល់បងប្អូនសប្បុរសជន ឲ្យបានច្បាស់លាស់ ក្នុងការចូលរួមប្រារព្ធពិធី ព្រមទាំងពង្រីកនូវសមាជិកភាព សាខាកាកបាទក្រហមកម្ពុជាខេត្ត ដើមី្បបង្កើន នូវថវិកាទ្រទ្រង់សកម្មភាពចលនាមនុស្សធម៌កាកបាទក្រហមកម្ពុជា ក្នុងការសង្គ្រោះដល់ប្រជាពលរដ្ឋរងគ្រោះ និងងាយ រងគ្រោះជាដើម ។
លោកបណ្ឌិត ក៏បានលើកនូវអនុសាស្ត្រ បទពិសោធន៍ល្អៗ មួយចំនួនរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា លើការស្វែងរកនូវមូលនិធិ សម្រាប់ទ្រទ្រង់កាកបាទក្រហម ទៅតាមគ្រប់រូបភាព ដែលធ្វើទៅ បានជាសំខាន់ចំពោះអង្គការដៃគូ សប្បុរសជន និងការពង្រីក សមាជិកភាពកាកបាទក្រហម ក្នុងការយកទៅ ប្រើប្រាស់ជួយសង្គ្រោះដល់ជនរងគ្រោះ ចាស់ជរា ពិការ គ្មានទីពឹង។
ព្រមជាមួយគ្នានោះ លោកបណ្ឌិត ក៏បានកំណត់យកថ្ងៃទី២៧ ខែកុម្ភៈ ឆ្នាំ២០១៧ ដើមី្បធ្វើពិធីសម្ពោធអគារ ទីស្នាក់ការ អនុសាខាកាកបាទក្រហមស្រុកជីក្រែង និងការត្រៀមលក្ខណៈឲ្យបានគ្រប់ជ្រុងជ្រោយ ដើមី្បរៀបចំអបអរសាទរ ខួបលើក ទី៦២ កំណើតកាកបាទក្រហមកម្ពុជា និងខួបលើកទី១៥៤ ទិវាពិភពលោកកាកបាទក្រហម អឌ្ឍចន្ទក្រហម ដោយត្រូវ ធ្វើការផ្សព្វផ្សាយជូនដំណឹង ដល់បងប្អូនសប្បុរសជនជាតិ អន្តរជាតិឲ្យបានចូលរួមផងដែរ ។
លោកបណ្ឌិត ក៏បានគូសបញ្ជាក់ទៀតថា ក្នុងបេសកកម្មវិស័យមនុស្សធម៌ គឺបានជម្រុញឲ្យគណៈកម្មាធិការ សាខាកាក បាទក្រហមខេត្ត បានធ្វើសកម្មភាព ជួយដល់វិស័យកាកបាទក្រហម រកនូវមូលនិធិទ្រទ្រង់ចលនាកាកបាទក្រហម និងជម្រុញ ឲ្យដល់អ្នកស្ម័ត្រចិត្ត និងរកដៃគូរថ្មី ក្នុងការជួយសង្រ្គោះដល់ប្រជាជនងាយរងគ្រោះ និងរងគ្រោះដោយ ឧបទ្ទវហេតុផ្សេងៗ ព្រមទាំងត្រូវខិតខំប្រឹងប្រែងទៅតាមរូបភាពជាក់ស្តែង លើការពង្រីកសមាជិកភាពនៅតាមមូលដ្ឋាន និងស្វែងរកមូលនិធិ ទ្រទ្រង់កាកបាទក្រហមកម្ពុជា សម្រាប់ទៅថ្ងៃអនាគតផងដែរ៕
