(ភ្នំពេញ)៖ តារាសម្ដែង តារាចម្រៀង និងពិធីករ-ពិធីការិនី ល្បីៗ ជាច្រើនរូប បានចូលរួមបំផុសស្មារតីដល់សិស្ស និស្សិត នៃសាកលវិទ្យាល័យភូមិន្ទកសិកម្ម (ចំការដូង) ដើម្បីឲ្យចូលរួមបរិច្ឆាគឈាម ជួយសង្គ្រោះជីវិតមនុស្ស និងជាការងារមនុស្សធម៌ ជួយដល់សង្គមមួយ ដែលមនុស្សគ្រប់រូប មិនថាតែអ្នកសិល្បៈនោះទេ ត្រូវតែចូលរួមទាំងអស់គ្នា។ កម្មវិធីបរិច្ឆាគឈាមនេះ មានការអញ្ជើញចូលរួមជាអធិបតីភាព ពីសំណាក់ លោក វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ ព្រមទាំងមន្រ្តីពាក់ព័ន្ធ និងសាស្រ្តាចារ្យ សិស្ស និស្សិតជាច្រើននាក់។
តារាសម្ដែង និងតារាចម្រៀង ដែលបានចូលរួមបំផុសចលនាបរិច្ចាគឈាមនេះ មានឈ្មោះថា «កម្មវិធីតន្ត្រីសប្បុរសធម៌ ក្នុងការបរិច្ចាគឈាម» រៀបចំដោយសាកលវិទ្យាល័យភូមិន្ទកសិកម្ម សហការជាមួយក្រសួងសុខាភិបាល និងក្រុមហ៊ុបអិនវីស៊ីខប ភើរេសិន នាពីព្រឹកថ្ងៃទី៧ កុម្ភៈ ឆ្នាំ២០១៧នេះ។
លោក ផាត់ ដារារដ្ឋ ប្រធានគ្រុប «គ្រួសារតារាកម្ពុជា» បានថ្លែងថា ជាធម្មតាតារាសម្ដែង តារាចម្រៀង ឬពិធីករ ពិធីការិនី ក្នុងគ្រុបរបស់លោក តែងតែចូលរួមក្នុងសកម្មភាពមនុស្សធម៌ ដូចជាសកម្មភាពជួយដល់ជនពិការ ស្វែងរកមូលនិធិជួយដល់មន្ទីរពេទ្យ «គន្ធបុប្ផា» ជួយដល់ជនក្រីក្រ និងការងារបំផុសស្មារតី ឲ្យចូលរួមបរិច្ឆាគឈាមនេះ ជាដើម។ ក្រុមអ្នកសិល្បៈ តែងតែចំណាយពេលវេលា មិនគិតពីការនឿយហត់ ដើម្បីចូលរួមចំណែក ក្នុងការងារសង្គម ហើយជាក់ស្ដែងក្នុងថ្ងៃនេះ អ្នកសិល្បៈដែលបានចូលរួម កម្មវិធីបំផុតស្មារតី ឲ្យបរិច្ឆាគឈាម នឹងទទួលបានប័ណ្ណសរសើរ ពីសាកលវិទ្យាធិការ ដែលផ្ដល់ជូនផ្ទាល់ដៃ ដោយលោករដ្ឋមន្រ្តី វេង សាខុន ផងដែរ។
សូមបញ្ជាក់ថា កម្មវិធីខាងលើ គឺដើម្បីផ្សព្វផ្សាយពីកម្មវិធីបរិច្ចាគឈាម ជួយដល់ជនរងគ្រោះនានា ត្រូវការឈាមសម្រាប់ឆ្លងផុតគ្រោះថ្នាក់ ដែលអ្នកជំងឺកំពុងស្រែកដង្ហើយរកជាបន្ទាន់។ សិល្បករ និងនិស្សិតសាលាកសិកម្ម ក្រៅពីការចូលរួមបំផុសការបរិច្ចាគឈាម ក៏បានរួមគ្នាឡើងច្រៀងរាំលេងកម្សាន្តកំដកម្មវិធី ឲ្យមានបរិយាកាសរីករាយ និងបង្កើនភាពស្និទ្ធស្នាល ជាមួយគ្នា ផងដែរ៕
